އިދިކޮޅު ޕީޕީއެމް ޕީއެންސީ ކޯލިޝަނުން ކުރި މުޒާހަރާއެއް ކަވަރު ކުރަމުންދިޔަ "ހުވަދޫ" ނޫހުގެ އަންހެން ނޫސްވެރިޔާ ފާތިމަތު ތައުފީޤް އަށް މުޒާހަރާ ކޮންޓްރޯލް ކުރަން މަސައްކަތްކުރި ފުލުހުން ޖިންސީ ފުރައްސާރަކޮށްފި ކަމަށް އެ ނޫސްވެރިޔާ ބުނެފިއެވެ.

މިކަމާއި ގުޅޭ ގޮތުން އޭނާ ކޮށްފައިވާ ޓްވީޓެއްގައި ބުނެފައިވަނީ ފުލުހުން މުޒާހަރާގެ ބައިވެރިއެއް ހައްޔަރުކުރާ މަންޒަރުގެ ވީޑިއޯ ނެގުމަށް ހުއްޓިލައިގެން ހުރިވަގުތު ވީޑިއޯ ނެގުމަށް ހުރަސްއެޅުމަށް އިސް އޮފިސަރަކު ކޮމާންޑް ދިން ކަމަށާއި، އެކޮމާންޑަށް ޢަމަލުކުރަން އައި ޕޮލިސް އޮފިސަރުވަނީ އޭނާގެ މޭމަތީގައި އަޅައި ދެފަހަރަކަށް ފަހަތަށް ކޮށްޕާލައިފައި ކަމަށެވެ.

އަދި އޭނާއަކީ ބްރޮޑްކޮމްގައި ރެޖިސްޓަރ ވެފައިވާ ނޫސްވެރިއެއް ކަމަށްވެސް އޭނާ ބުނެފައިވެއެވެ. އަދި މިމައްސަލަ ބެލުމަށް ކަމާއިބެހޭ ފަރާތްތަކަށް އޭނާ ވަނީ ގޮވާލައިފައެވެ.

މި މައްސަލަ ކަމާއިބެހޭ ފަރާތްތަކަށް ހުށައެޅުމަށް ތައްޔާރުވަމުން އަންނަ ކަމަށް ހުވަދޫ ނޫހުންވެސް ބުނެފައެވެ. އަދި އެނޫހުގެ ނޫސްވެރިޔާ އަށް ޖިންސީ ފުރައްސާރަ ކުރި މައްސަލަ ހަރުކަށި އިބާރާތުން ކުށްވެރިކުރާ ކަމަށްވެސް އެނޫހުން ބުނެފައިވެއެވެ.

މުޒާހަރާ ތަކާއި ސިޔާސީ އެހެނިހެންވެސް ކަންކަން ކަވަރުކުރުމަށް ހަރަކާތްތެރިވ ނޫސްވެރިންނަށް ފުލުހުންގެ ފަރާތުން އެކި ކަހަލަ ގެއްލުންތައް ލިބޭ ކަމަށް ދެކެވޭ ވާހަކަތައް މިދުވަސްވަރު ވަނީ ގިނަވެފައެވެ.