ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހާއި ދެކޮޅު މީހުން ގޮވައިގެން އެމަނިކުފާނަށް ރިޔާސީ އިންތިޚާބު ކާމިޔާބު ނުކުރެވޭނެކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ސިފަކުރައްވައިފި އެވެ. 

މޫކޭ މިފަދައިން ވިދާޅުވެފައިވަނީ ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގައި ހުންނެވި ވެރިކަންކުރާ އެމްޑީޕީގެ ނައިބުރައީސް މުޙައްމަދު ޝިފާޒު އެމަޤާމުން ވަކިކޮށް އެ މަގާމް އެމްޑީޕީގެ ޗެއާޕާސަން ގެ ނާއިބު އިބްރާޙީމް ވަހީދު (އިބުރޭ)އަށް ދޭން ސަރުކާރުން ނިންމެވުމާއި ގުޅިގެން މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ފާޑުވިދާޅުވުން، އެބޭފުޅާއަށް ރައްދުދެއްވާ ކުރެއްވި ޓްވީޓެއްގަ އެވެ. 

އެގޮތުން މޫކޭ ވިދާޅުވީ އެމްޑީޕީ ތެރޭގައި ފަނިއަޅާ، މުޅި ޕާޓީ ފަނިކާން ދޫކޮށްލައްވައިގެން ރައީސް ޞާލިހު ހުންނަވާނެކަމަށް މަޖިލީހުގެ ރައީސް މުޙައްމަދު ނަޝީދުގެ ގޮފި ފިކުރެއްގެ ދިރުމުގެ ބޭފުޅުން ޤަބޫލުކުރައްވާނަމަ އެއީ މޮޔަ ޤަބޫލުކުރެއްވުމެއް ކަމަށެވެ. 

މިހާ ދުވަސްވަންދެން ފިކުރެއްގެ ދިރުމުގެ ބޭފުޅުން ސަރުކާރުގައި ތިއްބެވީ ރައީސް ޞާލިހުގެ ރަނގަޅުކަމުން ކަމަށާއި، އަބަދު އެ ދޫ ދެއްވައިގެން އެމަނިކުފާނު ނުހުންނަވާނެކަމަށް މޫކޭ ވިދާޅުވި އެވެ. 

ނަޝީދުގެ ގޮފި "ފިކުރެއްގެ ދިރުމުގައި" ތިއްބެވީ ހުސްވެސް މުނާފިގުންކަމަށް ސިފަކުރައްވާ މޫކޭ ވިދާޅުވީ (ރިޔާސީ މައިދާނަށް) ނިކުންނައިރު މުނާފިގުން ގޮވައިގެން ހަނގުރާމަ ނުކުރެވޭނެ ކަމަށެވެ. 

ރިޔާސީ އިންތިޚާބު ބޯމަތިވެފައިވާއިރު ސަރުކާރުން ގެންދަނީ ސަރުކާރުގެ އިސް ބައެއް މަގާމުތަކުގައި ތިއްބެވި ބޭފުޅުން މަގާމުތަކުން ވަކިކުރަމުންނެވެ. 

ސަރުކާރުގެ މި ނިންމުމަށް މަރުހަބާ ކިޔުއްވާ ބައެއް މެމްބަރުން ވިދާޅުވަނީ ސަރުކާރުގެ މަގާމުތަކުގައި ތިއްބެވި ބައެއް ފަރާތްތައް މަގާމުން ވަކިކުރަން ނިންމީ އެ ބޭފުޅުންނަކީ ރައީސް ޞާލިހުގެ ސިޔާސަތާއި ދެކޮޅު ބޭފުޅުންނަށް ވުމުންކަމަށެވެ. އަދި ދެކޮޅު މީހުންނާއެކު ސަރުކާރު ހިންގަން ދަތިވާނެތީ ކަމަށެވެ. 

ރައީސް ޞާލިހަށް ތާއީދުކުރައްވާ މެމްބަރުން ގެންދަވަނީ ރައީސް ޞާލިހަށް ތާއީދު ނުކުރައްވާ ފަރާތްތައް ސަރުކާރުގެ މަގާމުތަކުން އިސްތިއުފާދެއްވުމަށް ގޮވާލައްވަމުންނެވެ.