އެޗްޑީސީގެ ނަން އާބަންކޯއަށް ބަދަލުކުރިޔަސް އެ ކުންފުނިން ކޮށްފައިވާ ވައްކަންތައް ޕީޕީއެމްގެ ވެރިކަމެއްގައި ބަލާނެކަމަށް މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފު (ސެންބެ) ވިދާޅުވެއްޖެ އެވެ. 

ސެންބެ މިފަދައިން ވިދާޅުވެފައިވަނީ އެޗްޑީސީ ރީބްރޭންޑުކޮށް އެ ކުންފުނީގެ ނަން އާބަންކޯއަށް ރަސްމީކޮށް ބަދަލުކުރުމާއި ގުޅިގެން ކުރެއްވި ޓްވީޓެއްގަ އެވެ. 

ސެންބެ ވިދާޅުވީ ނަން ބަދަލު ކުރިޔަސް އެޗްޑީސީން ކޮށްފައިވާ ވައްކަންތައް ބަދަލުނުވާ ކަމަށެވެ. އެ ކުންފުނި މެދުވެރިކޮށް ރާއްޖޭގެ އަގުބޮޑެތި ބިންތައް ބަހާ ހުސްކޮށްފައިވާ ކަމަށާއި، ނަން ބަދަލުކުރުމުން އެ ޖަރީމާތައް ނުފޮރުވޭނެކަމަށް އޭނާ ވިދާޅުވިއެވެ. 

Advertisement

އެއާއެކު ސެންބެ ވިދާޅުވީ މި ސަރުކާރު މި ދަނީ ނިމެން ކަމަށާއި، އެ ހިސާބުން އެ ކުންފުނިން ކޮށްފައިވާ ވައްކަންތައް ބަލާނެކަމަށް ސެންބެ ވަނީ ވިދާޅުވެފަ އެވެ. 

އެޗްޑީސީއަށް 22 އަހަރު ފުރިފައިވާއިރު، އެ ކުންފުނިން ވަނީ އެޗްޑީސީގެ ނަން އާބަންކޯއަށް ބަދަލުކޮށްފަ އެވެ. 

އެޗްޑީސީ މެދުވެރިކޮށް ހުޅުމާލެއިން ބޮޑެތި ބިންތައް ނުއަގުގައި ބަހާފައިވާކަމުގެ މައްސަލަތަކެއް ވަނީ ފެންވަތިވެގެން ގޮސްފައެވެ. 

އެޗްޑީސީ މެދުވެރިކޮށް ބިންތައް ނުއަގުގައި ބަހާފައިވާ މައްސަލަ ޕީޕީއެމްގެ ވެރިކަމެއްގައި ބަލާނެކަމަށް އިދިކޮޅު ކޯލިޝަނުން ވަނީ މީގެކުރިންވެސް ބުނެފަ އެވެ.