ގެއްލިގެން ހޯދަމުން ދަނިކޮށް 31 މާރިޗު 2023 ވަނަ ދުވަހު ގދ. ކަނޑުހުޅުދޫ ފަޅުތެރޭގައި މަރުވެފައި އޮއްވައި ފެނުނު ޖާމިން އަބްދުލްކަރީމް މަރުވީ އޭނާގެ ހަރަކާތްތައް މޮނީޓާ ކުރުމަށް ފުލުހުގައި އެދިފައި ވަނިކޮށް ކަމަށް ޖެންޑާ މިނިސްޓްރީން ހާމަކޮށްފި އެވެ. 

ޖާމިން ގެއްލިގެން ހޯދަމުންދަނިކޮށް ކަނޑުހުޅުދޫ ފަޅުތެރޭގައި އޮއްވާ ފެނިގެން ހޮސްިޓަލަށް ގެންދިޔައިރުވެސް އޮތީ މަރުވެފައެވެ. އޭނާ އަކީ ނަފްސާނީ ބަލި ހުންނަ ފަރާތެއްކަން ވަނީ ދެނެގަނެވިފައެވެ. 

ޖެންޑާ މިނިސްޓްރީން ބުނީ ޖާމިންއަށް ބޭނުންވާ ނަފްސާނީ ފަރުވާ ދިނުމަށް 2022 މާޗް މަހު މާލެ ގެނެވި، ސެންޓަރ ފޯރ މެންޓަލް ހެލްތުން އޭނާ ހޮސްޕިޓަލްގައި އެނދުމަތިކޮށް ފޯރުކޮށްދެވިފައިވާ ކަމަށެވެ. 

Advertisement

ފަރުވާއަށްފަހު ހާލަތަށް ރަނގަޅު ބަދަލެއް އައުމުން އާއިލާގެ އަމިއްލަ ނިންމުމާއި އެކު، އަނބުރާ ރަށަށް ބަދަލުކުރެވިފައިވާ ކަމަށާއި، އެފަހުން އަނެއްކާވެސް ހާލަތު ގޯސްވަމުންދާތީ އާއިލާގެ އެދުމުގެ މަތިން ޑޮކްޓަރަށް ދެއްކުމުގެ އިންތިޒާމު ހަޖައްސާފައިވާނެ ކަމަށް ޖެންޑާއިން ވަނީ ބުނެފައެވެ. 

ޖެންޑާ މިނިސްޓްރީން ބުނީ ޖާމިނުގެ ހާލަތާއި މެދު އެ މިނިސްޓްރީއާއި އެ ރަށު ކައުންސިލާއި ފުލުހުން ހިމެނޭހެން މަޝްވަރާ ކުރެވިފައިވާ ކަމަށެވެ.

އެ މިނިސްޓްރީން ބެލި ބެލުމުން ކަންބޮޑުވުން ހުރި ކަންތައްތަކެއް ޖާމިނުގެ ފަރާތުން ފާހަގަކުރެވިފައި ވާތީ މާޗުމަހުގެ 30 ވަނަ ދުވަހުގެ ރޭ (ޖާމިން މަރުވި ދުވެހުގެ ކުރީ ރޭ) ދިވެހި ފުލުހުންގެ ޚިދުމަތުގެ ސަމާލުކަމަށް އެކަން ގެނެސް ޖާމިނުގެ ހަރަކާތްތައް މޮނިޓާކޮށްދިނުމަށް އެދިފައިވާނެ ކަމަށެވެ. 

މި ހާސިދާއާއި ގުޅޭގޮތުން ފުލުހުންގެ އިދާރާއިން އަދި ވަކިއެއްޗެއް ހާމަކޮށްފައެއް ނުވެއެވެ. އެހެން ނަމަވެސް އެ މައްސަލަ ބަލަމުންދާކަމަށް އެ އިދާރާއިން ވަނީ ބުނެފައެވެ.