މިހާރަކަށް އައިސް ވަރަށް ގިނައިން މިއުޒިކާއި އެކު މަދަހަ ކިޔަމުން އަންނަތަން ފެންނަ ކަމަށާ، އެ ފަދަ މަދަހަ ތަކުގައި "އަހަރެެން الله ދެކެ ލޯބިވަމޭ" ބުނާއިރު އެ ވެވެނީ ކޮން ކަހަލަ ލޯތްބެއްތޯ ސައުދީ އަރަބިއާގެ އަލް-ޚޯބަރް އަށް އުފަން މަޝްހޫރު ދީނީ ޢިލްމުވެރިޔާ ޝެއިޚް އާސިމް ޙަކީމް ސުވާލުކުރައްވައިފިއެވެ.

މިއުޒިކާއިއެކު މަދަހަ ކިޔުމާއި ގުޅިގެން ޝެއިޚް ދެއްވި ދަރުހެއްގައި ވިދާޅުވީ، ބައެއް މީހުން މަދަހަ ކިޔާއިރު، ޕިޔާނޯ އާއި ވަޔޮލިން އާއި ގިޓާ ޖަހަމުން އެމީހުންގެ މަދަހަ ތަކުގައި "އޭ الله އަހަރެން الله ދެކެ ލޯބިވަމޭ" ކިޔަމުން ދާ ކަމަށެވެ. އެހެންނަމަވެސް އެފަދައިން الله ޙަރާމް ކުރެއްވި ކަމެއް ކުރަމުން އެކަލާނގެ ދެކެ ލޯބިވަމޭ ބުނާއިރު އެ ވެވެނީ ކޮންކަހަލަ ލޯތްބެއް ތޯ އޭނާ ވަނީ ސުވާލު ކުރައްވާފައެވެ. 

މިއާއެކު، އޭނާ ވަނީ ބައެއް އެފަދަ މަދަހަ ތަކުގައި ރަސޫލާ ޞައްލައްالله ޢަލައިހި ވަސައްލަމްއަށް ޘަނާ ކިޔައި، ތައުހީދުގެ ކަލިމަތައްވެސް ތަކުރާރުކޮށް ކިޔަމުންދާކަން ފާހަގަކުރައްވާފައެވެ. އަދި އެފަދައިން ކަންކުރުމަކީ الله ސުބުޙާނަހޫވަތަޢާލާގެ ހަނދުމަކުރުންވެސް ފުރައްސާރަ އަކަށް ވެގެންދާފަދަ ކަމެއް ކަމަށާ، އެމީހުން އެފަދައިން ކަންކޮށް މަދަހަ ކިޔަމުން ދަނީ ކުޑަ ފައިސާ ކޮޅަކަށް ކަމަށްވެސް ޝެއިޚު ވިދާޅުވި އެވެ. 

Advertisement

"މިއީ ރަނގަޅު ކަމެއް ނޫން. ރަނގަޅު ވާހަކަ އަކާއި، މާނަ އަކާއި ޢިބުރަތެއް ހުރި ލިރިކްސް ތައް އެއީ ދީނުގައި ހުއްދަ ކަމެއް. އެއާއިއެކު އެއްވެސް މިއުޒިކު ސާމާނެއް ބޭނުންކޮށްގެން ނުވާނެ. އެފަދަ އެއްޗެއް ބޭނުން ކޮށްފިނަމަ އެކަން އެއީ ހަރާމް ކަމެއް. އެއީ އިސްލާމް ދީނެއް ނޫން" ޝެއިޚް ވިދާޅުވި އެވެ. 

ޝެއިޚް މިފަދައިން ދަރުސް ދެއްވާފައިވާއިރު, ދިވެހިރާއްޖޭގައިވެސް މިއުޒިކާއި އެކު މަދަހަތައް ކިޔުން މިހާރު ވަނީ އާއްމުވެފައެވެ. އައުރަ ނިވާ ނުކޮށް، ނުވަތަ ކޮށްގެން ވިޔަސް، މިއުޒިކު ކުޅެމުން، މިއުޒިކުގެ ރާގާއި އެކު މަދަހަ ކިޔަމުންދާ މަންޒަރުތައް ދައުލަތުގެ މީޑިއާ މެދުވެރިކޮށް އަންނަނީ ދައްކަމުންނެވެ. މިފަދަ ކަންކަމާއި ގުޅިގެން ދީނަށް ލޯބިކުރާ ގިނަ ބަޔަކު އަންނަނީ ނުރުހުން ފާޅުކުރަމުންނެވެ.