ޗީޒް ކޭކަކީ ތައްޔާރު ކޮށްލަން ފަސޭހަ ރަހަ މީރު ފޮނި ބާވަތެކެވެ. މިއަދު ވޮއިސް ގެ ބަދިގެއިން މި ގެނެސްދެނީ ފިހަން ނުޖެހޭ ބްލޫބެރީ ޗީޒް ކޭކު ތައްޔާރު ކޮށްލާނެ ގޮތެވެ. 

1 1/2 ޖޯޑު މުގުރާފައި ހުރި މާރީ ބިސްކޯދު

1 މޭޒުމަތީ ސަމުސާ ހަކުރު

8 މޭޒުމަތީ ސަމުސާ ބަޓަރ 

300 ގ ކްރީމް ޗީޒް

2/3 ޖޯޑު ހަކުރު

1 1/4 ޖޯޑު ވިޕިން ކްރީމް (ފިނި ކޮށްފައި)

2 މޭޒުމަތީ ސަމުސާ ލުނބޯ ހުތް 

250 ގ ބްލޫބެރީ (ފްރެސް ބްލޫބެރީ ނެތް ނަމަ ފްރޯޒެން ބްލޫބެރީ ވެސް ރަނގަޅު ވާނެ) 

1/3 ޖޯޑު ހަކުރު

1 މޭޒުމަތީ ސަމުސާ ލުނބޯ ހުތް

1) ތަށްޓެއްގެ ތެރޭގައި ބިސްކޯދާއި ހަކުރާ، ބަޓަރ ރަނގަޅަށް އެކުލަވާލާށެވެ. ދެން ކޭކު އަޅާ ޓްރޭއަކަށް އަޅުމަށްފަހު ރަނގަޅަށް އޮބާ އެއްވަރުކޮށްލާށެވެ. ދެން އައިސް އަލަމާރިއަށްލައި 30 މިނެޓް ވަންދެން ބަހައްޓާ ހަރުކޮށްލާށެވެ.

2) ބްލޫބެރީ ޓޮޕިންގްސް ހަދަން ބްލޫބެރީ އާއި ހަކުރާއި ލުނބޯހުތް މަޑު ގިނީގައި ތަވައެއްގެ ތެރޭގައި އެކުލަވާލާށެވެ. ގިނަ އިރު ވާވަރަށް ބްލޫބެރީ އިން ދިޔަ ނުކުމެ ސޯސް ގަނޑު ދިޔާވާން ފަށާނެއެވެ. ގާތްގަނޑަކަށް 20 މިނެޓް ވަންދެން ނުވަތަ ސިރަޕް އަށް ވާން ފެށުމުން އުނދުން ނިއްވާލާފައި ހިހޫ ކުރަން ބަހައްޓާލާށެވެ. 

3) ޗީޒް ކޭކު ހަދަން، ހެންޑް މިކްސަރަކުން ކްރީމް ޗީޒް އާއި ހަކުރު ރަނގަޅަށް، ފްލަފީ ވަންދެން އެކުލަވައިލާށެވެ. އެއަށްފަހު އިތުރު ތަށްޓެއްގައި ހެންޑް މިކްސަރ ބޭނުންކޮށްގެން ވިޕިން ކްރީމް ކޮޅު ވިޕް ކޮށްލާށެވެ. ދެން ސަމުސަލަކުން ކްރީމް ޗީޒް އާއި ވިޕިން ކްރީމް އެކުލަވަމުން އޭގެ ތެރެއަށް ލުނބޯހުތް ފޮދު އަޅުވަމުން ދާށެވެ. 

4) ދެން ޗީޒް ކޭކު މިކްސްޗަރ ބިސްކޯދު އެޅި ޓްރޭގެ ބިސްކޯދު މައްޗަށް އަޅާ ރީތިކޮށް އެއްވަރަށް އަތުރާލާށެވެ. އެއަށްފަހު، އޭގެ މައްޗަށް ބްލޫބެރީ ޓޮޕިންގްސް ވެސް ރަނގަޅަށް އަޅާލާށެވެ. ދެން 6 ގަޑި އިރު ނޫނީ އެއަށްވުރެ ގިނައިރު ވަންދެން އައިސްއަލަމާރި އަށްލައި ފިނި ކޮށްލާށެވެ.