2023 ވަނަ އަހަރުގެ ރިޔާސީ އިންތިޚާބުގައި ޖުމްހޫރީ ޕާޓީއާއެކު ކޯލިޝަން ހެދުމަށް އެ ޕާޓީން ވާދަވެރި ސިޔާސީ ޕާޓީ ޕީޕީއެމަށް ފޮނުވި ދައުވަތުގެ ޖަވާބު އިދިކޮޅު އިއްތިހާދު ވަގުތީގޮތުން ހިންގެވުމާއި ޕީއެންސީގެ ރައީސް އަބްދުއްރަހީމް އަބްދުالله ދެއްވައިފި އެވެ.
ޖޭޕީއާއެކު ކޯލިޝަން ހަދަން ޕީޕީއެމަށް ދިން ދައުވަތާއި ގުޅިގެން ކުރެއްވި ޓްވީޓެއްގައި އަބްދުއްރަހީމް ވިދާޅުވީ އެ ޕާޓީގެ ރިޔާސީ ކެންޑިޑޭޓެއް އެބަހުރިކަމަށެވެ. އެ ބޭފުޅަކީ ޕާޓީގެ ރައީސް އަބްދުالله ޔާމީން އަބްދުލްގައްޔޫމު ކަމަށެވެ.
އެހެންކަމުން ޕީޕީއެމް-ޕީއެންސީ ކޯލިޝަނުން އެހެން އެއްވެސް ސިޔާސީ ޕާޓީއެއްގެ ރިޔާސީ ކެންޑީޑޭޓަށް ތާއީދު ނުކުރައްވާނެ ކަމަށް އަބްދުއްރަހީމް ވިދާޅުވި އެވެ.
އެއާއެކު އަބްދުއްރަހީމް ވިދާޅުވީ ޤައުމާއި ރައްޔިތުންނަށް ހެޔޮއެދިވަޑައިގަންނަވާ ބޭފުޅުން ރައީސް ޔާމީންގެ ފަހަތްޕުޅަށް އެރުމަށް ދައުވަތުއަރުވާ ކަމަށެވެ. އަދި ޤައުމާއި ރައްޔިތުންނަށް އެންމެ ފައިދާ ބޮޑު ގޮތަކީވެސް ގިނަ ސިޔާސީ ޕާޓީތައް ޕީޕީއެމްގެ ފަހަތަށް އެރުންކަމަށް އޭނާ ވިދާޅުވި އެވެ.
"ޕީ.ޕީ.އެމް/ޕީ.އެން.ސީ ކޯލިޝަނަކުން އެހެން އެއްވެސް ޕާޓީ އެއްގެ ރިޔާސީ ކެނޑިޑޭޓަކަށް ތާއީދެއް ނުކުރާނެ.މިކޯލިޝަންގެ ރިޔާސީ ކެނޑިޑޭޓަކީ ރައީސް ޔާމީން.ގައުމަށް ހެޔޮ އެދި ވަޑައިގަންނަވާ ބޭފުޅުން މިކޯލިޝަނާ ގުޅިވަޑައިގަންނަވާ.އެއީ ގައުމާ ރައްޔިތުންނަށް އެންމެ ފައިދާ ހުރި ގޮތް"
ޕީއެންސީގެ ރައީސް އަބްދުއްރަހީމް އަބްދުالله
ވ. އާރަށު މުއާމަލާތާއި ގުޅުވާ ރައީސް ޔާމިންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރު މަހު އެމަނިކުފާނުގެ މައްޗަށް ޖަލު ހުކުމެއް ކޮށްފައިވީ ނަމަވެސް އެއީ ނުހައްޤުން އިއްވާފައިވާ ހުކުމެއް ކަމަށާއި، ހައިކޯޓުގައި އޮތް އިސްތިއުނާފު މައްސަލަ އެމަނިކޔފާނު ކާމިޔާބު ކުރައްވާނެކަމަށް އިދިކޮޅުން ދަނީ ބުނަމުންނެވެ.
އޭގެ އިތުރުން އެމަނިކުފާނު ރިޔާސީ އިންތިޚާބު އެއްބުރުން ކާމިޔާބުކުރައްވާނެ ކަމުގެ ޔަގީންކަންވެސް އޮތްކަމަށް އިދިކޮޅުން ދަނީ ބުނަމުންނެވެ.
އެހެންކަމުން ކުރިއަށް އޮތް ރިޔާސީ އިންތިޚާބުގައި އެހެން ހުރިހާ ސިޔާސީ ޕާޓީއަކުންވެސް ޕީޕީއެމް ފަހަތައް އެރުމަށް އިދިކޮޅުން ވަނީ މީގެ ކުރިންވެސް ގޮވާލާފަ އެވެ.
Advertisement
This content is created and paid for by advertisers and does not involve Voice Journalists
