ހުޅުމާލޭ 2 ވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން ހައުސިން މަޝްރޫޢު ހިންގުމަށް ހަވާލުކޮށްފައިވާ އިންޑިއާގެ ޖޭއެމްސީ ކުންފުނީގެ މަސައްކަތްތެރިން ފްލެޓުތައް ކައިރިއަށް ކުނިވާ ޒާތުގެ ގިނަ އަދަދެއްގެ ކުނި ޖަމާކުރަމުންދާތީ ހުރި ކަންބޮޑުވުންތައް ފާޅުކުރުމުން ކުނި އުކާލުމުގެ ބަދަލުގައި ގިނަ އަދަދެއްގެ ކުނި ހަމަ އެ ސަރަހައްދުގައި ވަޅުލައިފި އެވެ.
ޖޭއެމްސީގެ މަސައްކަތްތެރިން ކާން ގެނެސްފައި ހުރި ކުނި ކާއެއްޗެހި ފްލެޓުތައް ކައިރިއަށް އުކާލާފައިވާތީއާއި، އެ ސަރަހައްދަށް ކުނި ޖަމާކުރަމުންދާތީ އެކަން އާންމު ރައްޔިތަކު ވަނީ ކަމާ ބެހޭ މުއައްސަސާތަކުގެ ސަމާލުކަމަށް ގެނެސްފައެވެ.
އެ ސަރަހައްދަކީ ހިޔާ ފްލެޓުތަކާއި ކައިރި ސަރަހައްދަކަށްވުމުން ކުނި ގިނަވުމުގެ ސަބަބުން ނުބައިވަސް ދުވުމާއި މެހި ގިނަވުމާއި އަދިވެސް އިތުރު އުނދަގޫތައް އާންމުންނަށް ކުރިމަތިވަމުންދާކަން އޭނާ ފާހަގަކުރިއެވެ.
އޭގެ އިތުރުން ގިނަ އަދަދެއްގެ ކުނި ރައްކާތެރިކަމާއެކު ނައްތާލުމުގެ ބަދަލުގައި އެއް ސަރަހައްދަކަށް އަޅާފައި ހުރުމަކީ ނުރައްކާތެރި ބަލިމަޑުކަމެއް ފެތުރިގެން ހިނގައިދާނެ ކަމަކަށް ވާތީ އެކަމުގެ ކަންބޮޑުވުން ވެސް އާންމު ރައްޔިތުންވަނީ ފާޅުކޮށްފަ އެވެ.
ޖޭއެމްސީން ފްލެޓު ސަރަހައްދަށް އުކާލާފައި ހުރި ބައެއް ކުނިތައް
އެކަން މުއައްސަސާތަކުގެ ސަމާލުކަމަށް ގެނައި ފަރާތުން "ވޮއިސް" އަށް މައުލޫމާތު ދިން ގޮތުގައި ޖޭއެމްސީން ގާތްގަނޑަކަށް 12 ޓަނުގެ ކުނި ފްލެޓުތައް ސަރަހައްދަށް އުކާފާއި ހުއްޓެވެ. އޭގެ ތެރޭގައި އެ ކުންފުނީގެ މަސައްކަތްތެރިން ކެއުމަށް ގެނައި ހަލާކުވެ ކުނިވެފައި ހުރި ތަކެތިވެސް ހިމެނޭކަމަށް އޭނާ ކިޔައިދިނެވެ.
އެ ސަހަރައްދުގައި ކުނި އަޅާނެ ޑަސްޓްބިންތައް ވެސް އެކަށީގެންވާ ގޮތެއްގައި ބަހައްޓާފައި ނުހުންނަ ކަމަށާއި، މުޅި ސަރަހައްދަށް ކުނިއަޅައި ގޮނޑުކޮށްފައިވާކަން ފަހި ދިރިއުޅުން ކޯޕަރޭޝަނާއި ހައުސިން ޑިވެލޮޕްމަންޓު ކޯޕަރޭޝަން އަދި އެންވަޔަރުމަންޓު ޕްރޮޓެކްޝަން އޭޖެންސީ (އީޕީއޭ)ގެ ސަމާލުކަމަށްވެސް ގެނެސްފައިވާކަމަށް އޭނާ ކިޔައިދިނެވެ.
އަދި އެ މައްސަލަ އީޕީއޭއިން ބަލަން ފެށުމާއެކު ޖޭއެމްސީން ގިނަ އަދަދެއްގެ ކުނި އެ ސަހަހައްދުގައި ވަޅުގަނޑެއް ކޮނެ ވަޅުލާފައިވާކަމަށް އެމީހާ ކިޔައިދިނެވެ.
ޖޭއެމްސީގެ ކުނިތައް ވަޅުލުމަށް ކޮންނަނީ
"ޖޭއެމްސީ މީހުން އުޅޭ އެކޮމޮޑޭޝަން ބްލޮކަށް އަޅުގަނޑު ވަނިން. ކުނިވަސް ދުވާވަރުން އެތަނުގައި ކެތް ނުވޭ. އެމީހުންނަށް ކާންދޭން ގެނެސްފައި ހުންނަނީވެސް ކުނި އެއްޗެހި. ދެން އެ މީހުންގެ ކުނިތައް ގޯނި ގޯންޏަށް އަޅާފަ އުކާފަ މި ހުންނަނީ. ގާތްގަނޑަކަށް 12 ޓަނުގެ ކުނި އެ ސަރަހައްދަށް އުކާލާފައި ހުރި. ދެން އެކަން ސަމާލުކަމަށް ގެނެސް އީޕީއޭއިން މައްސަލަ ބަލަން ފެށުމުން ޖޭއެމްސީ މީހުން މި ކުރި ކަމަކީ ވަޅުގަނޑެއް ކޮނެފަ ކުނިތައް ވަޅުލީ. ވަރަށް މަދު ކުންޏެއް އުކާލީ. ދެން ހަމަ ހުރި ހުރިހާ ކުންޏެއް ވަޅުލީ"
ވޮއިސް އަށް މައުލޫމާތު ދިން އާންމު ރައްޔިތެއް.
އެ ފަރާތުން ބުނީ އެ މައްސަލަ އީޕީއިން ބަލާނެކަމަށް ބުނި ފަހުން އެ ސަރަހައްދުގައި މިހާރު ޑަސްޓްބިން ވެސް ބަހައްޓާފައިވާކަމަށެވެ.
އީޕީއޭއިން މައްސަލަ ބަލާނެކަމަށް ބުނުމުން ފްލެޓު ސަރަހައްދުގައި ޑަސްތްބިން ބަހައްޓާފައި
ކުނިތައް އެ ސަރަހައްދުން ނެގިނަމަ ވެސް ކުނިތައް ވަޅުލާފއިވަނީ ރައްކާތެރިކަމާއެކު ކުނި ނައްތާލުމަށް އަމަލުކުރުމަށް އީޕީއޭއިން އެކުލަވާލާފައިވާ ގަވައިދާއި ޚިލާފަށްކަން ފާހަގަކޮށްލެވެއެވެ.
އެހާ ގިނަ އަދަދެއްގެ ކުނި އެ ސަރަހައްދުގައި ވަޅުލުމަކީ ވެސް ކަންބޮޑުވާ ކަމެއްގެ ގޮތުގައި އާންމުން ދަނީ ފާހަގަކުރަމުންނެވެ. ވޮއިސްއަށް މައުލޫމާތު ދިން ފަރާތުން ބުނީ އެހާ ގިނަ އަދަދެއްގެ ކުނި ވަޅުލުމަކީ ފެން ތަޣައްޔަރުވުމުގެ މައްސަލަ މުސްތަގުބަލުގައި ދިމާވެދާނެ ކަމެއް ކަމަށެވެ.
ޖޭއެމްސީން އީޕީއޭގެ ގަވައިދާއި ޚިލާފަށް ކުނި ވަޅުލި މައްސަލަ އެ އިދާރާއިން ދަނީ ބަލަމުންނެވެ. އަދި އެ މައްސަލަ ބަލާ ފިޔަވަޅު އަޅާނެކަމަށް އެ އިދާރާއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
