އަރަބިއްޔާ ސްކޫލުގައި ތައުލީމު ހާސިލުކުރަމުންދާ އަންހެން ދަރިވަރުންގެ ތެރެއިން މޫނު ބުރުގާ އަޅާ ކުދިންގެ މޫނު ބުރުގާ، އެކުދިންގެ ނުރުހުމުގައި ނަގުވައި، އެކުދިން ބޮޑުވެގެން ޓެރަރިސްޓުންނަށް ވާން ބޭނުންވަނީތޯ ސުވާލު ކުރި ކަމަށް ތުހުމަތު ކޮށްފިއެވެ.
މިފަދަ ތުހުމަތެއް ކޮށްފައި ވަނީ އަރަބިއްޔާގެ ދަރިވަރުންގެ ތެރެއިން މޫނުބުރުގާ އެޅި ދަރިވަރުންގެ މޫނު ބުރުގާ ނެގުމަށް އަންގައި، އެ ކުދިންނާމެދު ތަފާތުކުރުން ގެންގުޅޭ މައްސަލަ ޖެންޑާ މިނިސްޓްރީއަށް ހުށަހަޅައި، އެކަމުގެ ތަފްސީލް ހާމަކުރައްވައި ޖެންޑާ މިނިސްޓަރު އައިޝަތު މުހައްމަދު ދީދީއަށް ކުރީގެ ބަންޑާރަ ނައިބު އާޒިމާ ޝުކޫރު ފޮނުއްވި ސިޓީގައެެވެ.
އެގޮތުން އެ ސިޓީގައި ވިދާޅުވެފައިވަނީ އެ މިނިސްޓްރީއަށް މި މައްސަލަ ހުށަހަޅަން ނިންމީ އަރަބިއްޔާސްކޫލްގައި ތަޢުލީމް ޙާޞިލުކުރަމުންދާ އަންހެންކުދިންގެ ތެރެއިން، މޫނު ކަޝްފުކޮށްގެން މުޖްތަމަޢުގެ ތެރެއަށް ނިކުތުމަށް ޢުޒުރުވެރިވާ ކުދިންގެ ތަޢުލީމްގެ ޙައްޤު ގެއްލޭގޮތަށް ސަރުކާރުން ގަވާއިދުތަކާއި ސިޔާސަތުތައް އެކުލަވާލައްވައި ތަންފީޛުކުރައްވަމުން ގެންދަވާތިއްޔާއި، ސްކޫލްގެ ތެރޭގައި އެކުދިންނާ ދޭތެރޭ ތަފާތުކޮށް ކަންކުރެވެމުންދާތީ، އެކަންކަމުގެ ސަބަބުން އެކުދިންގެ ތަޢުލީމަށް އަދި ނަފްސާނީ ދުޅެހެޔޮކަމަށް ބޮޑެތި ގެއްލުންތަކެއްވެ، އެކުދިންގެ މުސްތަޤްބަލަށް ފޫނުބެއްދޭނޭ ވަރުގެ ގެއްލުންތަކެއް ވަމުންދާތީ ކަމަށެވެ. އަދި ކުޑަކުދިންނާއި އަދި އަންހެނުންގެ ޙައްޤުތައް ރައްކާތެރިކުރުމުގެ އެންމެ އިސް ޒިންމާ ޤާނޫނުން މަތިކޮށްފައިވާ ވަނީ ޖެންޑާ މިނިސްޓްރީ އަށް ކަމަށްވާތީ އެ މިނިސްޓްރީގެ ސަމާލުކަމަށް އެކަން ގެނައުމަށް ކަމަށެވެ.
އަރަބިއްޔާ ސުކޫލުގެ މޫނުބުރުގާ އެޅި ދަރިވަރުންނާއި މެދު ޢަމަލު ކުރަމުންދާގޮތް ހާމަ ކުރައްވައި އާޒިމާގެ ސިޓީގައި އިތުރަށް ބުނެފައިވަނީ އަރަބިއްޔާގެ މޫނުބުރުގާ އަޅާ ދަރިވަރުން މީގެ ކުރިން އެކަން ކުރަމުންދިޔައީ ލިބިފައިވާ ހުއްދައިގެ ދަށުން ނަމަވެސް، މި ފަހުން އެ ސްކޫލުގެ ޑެޕިއުޓީ ޕްރިންސިޕަލް ވަނީ އެ ކުދިންނާ ބައްދަލުކޮށް މޫނުބުރުގާ ނޭޅޭނެ ކަމަށް އަންގާފައި ކަމަށެވެ. އަދި ސްކޫލުން އެ ކުދިންގެ ބެލެނިވެރިންނާއި ބައްދަލުކޮށް މޫނުބުރުގާ އަޅައިގެން ސްކޫލަށް ނާދެވޭނެ ކަމަށް އަންގާ ސްކޫލުގެ ޔުނީފޯމު ކޯޑުގައި މޫނުބުރުގާ ނުހިމެނޭހެން ސިޓީއެއްވެސް ފޮނުވާފައި ކަމަށް އާޒިމާ ވިދާޅުވެފައި އެވެ.
މީގެއިތުރުން، އެ ސްކޫލުން އަންނަނީ މޫނުބުރުގާ އަޅާކުދިން ވަކިން ކައުންސެލާ ރޫމަށް ގެންގޮސް، ގޭގެ ދިރިއުޅުމުގައި ކަންކަން ހުންނަގޮތާއި، ގޭގެ އިޖްތިމާޢީ ކަންކަމުގެ ވާހަކައާއި ޒާތީ ވާހަކަތައް އަހާފައި ކަމަށާ އެކަމުގެ ސަބަބުން އެ ވާހަކަތައް ސްކޫލް ކުދިންގެ މެދުގައި ދައްކަން ފަށައި، މޫނު ބުރުގާ އެޅި ކުދިންނަށް އެކުދިން ބޭނުންނުވާ ކަހަލަ ސަމާލުކަމެއް ސްކޫލްތެރެއިން ލިބެން ފަށާފައިވާކަންވެސް އާޒިމާ ވަނީ ފާހަގަކުރައްވާފަ އެވެ.
"އަދި މީގެ އިތުރުން، ކުދިން އިމްތިޙާނު ހަދަން ތިއްބައި ހޯލަށް ވަދެ، ކުދިންނަށް މާސްކު ނަގަން އަންގައި، އެކުދިން މޫނު ކަޝްފުވުމުން އިސްދަށަށް ޖެހުމުން، އިސްއުފުލަން އަންގައި އިސްއުފުލަން މަޖުބޫރުކޮށްފައެވެ. މިއީ ކުދިން އިމްތިހާނު ހަދަންތިއްބައި ކުދިންނާ ދޭތެރޭ ކަންކުރެވިފައިވާގޮތެވެ. އަދި ހަމައެއާއެކު، ބައެއް ކުދިންގެ ނިޤާބު އެކުދިންގެ ނުރުހުމުގައި ނެގުމަށްފަހު، މާސްކު އަޅުވުން ފަދަ ޙާދިސާތައް ހިނގާފައި އެބަހުއްޓެވެ."
"އަދި "ތިޔަކުދިން ބޭނުންވަނީ ބޮޑުވެގެން ޓެރަރިސްޓަކަށްވާންހޭ؟" މިފަދަ ވިޔާނުދާ އަދި ކުދިންނާ މުޚާޠަބުކޮށްގެން ނުވާނޭ ބަސްމަގު ބޭނުންކޮށްގެން މުޚާޠަބުކޮށް، ކުދިންގެ އަގުދަށް ކޮށްލާފައި އެބަހުއްޓެވެ."
މީގެ އިތުރުން އާޒިމާގެ ސިޓީގަައި އިތުރަށް ވިދާޅުވީ، ރާއްޖެއިން ބައިނަލްއަގުވާމީ އެކި މުއާހަދާ ތަކުގައި ބައިވެރިވެ އަންހެނުންނާއި ކުޑަކުދިންގެ ރައްކާތެރިކަން ކަށަވަރުކޮށްދެމުންދާކަމުގެ ބައިނަލްއަގުވާމީ ދުނިޔެއަށް ޔަގީންކަން ދެމުންދިޔަ ނަމަވެސް ދައުލަތުގެ ސިޔާސަތުތައް މިފަދައިން ބެހެއްޓުމަކީ އަންހެނުންގެ ހައްގުގައި ކުރާ ކަމަށް ބުނާ މަސައްކަތްތައް ފަހަތަށް ޖެހޭނެ ކަމެއް ކަމުގައި ދެކޭ ކަމަށެވެ.
މިއާއެކު އޭނާ ވަނީ ސަރުކާރުގެ ތަޢުލީމުގެ ސިޔާސަތުތައް ބައްޓަންކުރައްވަނީ މޫނު ކަޝްފުކޮށްގެން މުޖްތަމަޢަށް ނިކުންނަން ބޭނުންނުވާ ކުދިންގެ ތަޢުލީމު ލިބިގަތުމުގެ ޙައްޤުތަކަށް އަދި އެނޫންވެސް ކުއްޖެއްގެ ތަޢުލީމުލިބިގަތުމުގެ ޙައްޤަކަށް ގެއްލުމެއްނުވާނޭގޮތުގައި ކަން ޔަޤީންކޮށްދެއްވުމަށް އެދި ޖެންޑަރ މިނިސްޓަރުގެ ކިބައިން އިލްތިމާސް ކުރައްވާފައެވެ.
Advertisement
This content is created and paid for by advertisers and does not involve Voice Journalists
