އެމެރިކާގެ ކުރީގެ ރައީސް ޑޮނަލްޑް ޓްރަމްޕް ހައްޔަރުކޮށްފިއެވެ.

ޓްރަމްޕް ހައްޔަރުކޮށްފައިމިވަނީ އޭނާ އާއި ގުޅުން އޮތް ބަރަހަނާ ފިލްމު ކުޅޭ އަންހެނެއް ކަމަށްވާ ސްޓޯމީ ޑެނިއަލްސްގެ އަނގަބަންދުކުރުމަށް އޭނާއަށް 130،000 ޑޮލަރު ދިން މައްސަލައަކާއި ގުޅިގެނެވެ.

މިކަމެއް ހިނގީ ޓްރަމްޕް ހިލަރީ ކްލިންޓަން އާއި ވާދަކޮށް ވެރިކަމަށް އިންތިޚާބު ވި، 2016 ގެ އިންތިޚާބު ކައިރިވެފައިވަނިކޮށެވެ. ސްޓޯމީ ބުނެފައިވަނީ އޭނާ އާއި ޓްރަމްޕް އާއި ދެމެދު 2006 ވަނަ އަހަރު ލޯބީގެ ގުޅުމެއް އޮތްކަމަށެވެ. ނަމަވެސް އެކަމަށް ޓްރަމްޕް އަންނަނީ ދެކޮޅުހަދަމުންނެވެ.

2016 ގެ އިންތިޚާބުގެ ތެރޭގައި އެވާހަކަ މީޑިއާއަށް ފާޅުކުރުމަށް ސްޓޯމީ ކުރި މަސައްކަތް ހުއްޓުވީ ޓްރަމްޕުގެ ކުރީގެ ވަކީލު މައިކަލް ކޮއެންއެވެ. އޭނާ ވަނީ ސްޓޯމީ އަށް ފައިސާ ދީގެން އެކަން ހުއްޓުވައިފައެވެ.

ކުރިއަށް އޮތް އިންތިޚާބުގައި ވާދަކުރުމަށް ރިޕަބްލިކަން ޕާޓީގެ ޓިކެޓް ހޯދުމަށް ކެމްޕެއިން ކުރަމުންދިޔަ ޓްރަމްޕް ނިޔުޔޯކްގެ ކޯޓަށް ހާޒިރުވެފައިވަނީ ސީކްރެޓް ސާވިސްގެ ބޮޑީ ގާޑުންގެ ހިމާޔަތުގައެވެ. ޓްރަމްޕް މިއަދު ކޯޓަށް ހާޒިރު ކުރެވުނީ އޭނާގެ މައްޗަށް ކުރެވޭ ދައުވާތަކުގެ އަޑުއެހުމަށެވެ.

ޓްރަމްޕް އަކީ މިހާތަނަށް ޖިނާއީ ދައުވާއެއް ކުރެވުނު އެމެރިކާގެ ފުރަތަމަ ރައީސް އެވެ.