ވިލާ ޓްރޭޑިންގ އިން ރާއްޖޭގެ ކުންފުނިތަކުގެ މެދުގައި ބާއްވާ އިސްލާމިކް ކުއިޒު މުބާރާތެއް ކަމަށްވާ "ރޯދަ ޓްރިވިއާ" ފަށައިފިއެވެ.

ވިލާ ޓްރޭޑިންގ އިން ބުނީ މި މުބާރާތަކީ، ބަރަކާތްތެރި ރަމަޟާން މަހުގެ ތެރޭގައި، ކުންފުނިތަކުގައި އިސްލާމްދީނާ ބެހޭ މައުލޫމާތު ފަތުރައި ދީނީ އިލްމު މުއްސަނދި ކުރުމުގެ ގޮތުން ބާއްވާ ހަރަކާތެއް ކަމަށެވެ.

އަދި ވިލާ ޓްރޭޑިންގެ ރަސްމީ މީސް މީޑިއާ ޕްލެޓްފޯމުތަކުގެ ތެރެއިން އިންސްޓަގްރާމް އަދި ފޭސްބުކްގައި ވެސް މި މުބާރާތުގެ ހުރިހާ އެޕިސޯޑުތަކެއް ދައްކާނެ ކަމަށް ވިލާ ޓްރޭޑިންގުން ބުނެއެވެ. އެގޮތުން މި މުބާރާތުގެ ފުރަތަމަ އެޕިސޯޑު ވަނީ މިހާރު ވިލާ މާޓުގެ މީސް މީޑިއާ ޕޭޖްތަކަށް ލާފައެވެ.

"ރޯދަ ޓްރިވިއާ" ގައި ބައިވެރިވި ބައެއް ކުންފުނިތަކުގެ ތެރޭގައި އެލައިޑް އިންޝުއަރެސް ކޮންޕެނީ، އަމާނާ ތަކާފުލް، އެސްޑީއެފްސީ، އެފްޑީސީ، ރާއްޖެ އޮންލައިން، އުރީދޫ މޯލްޑިވްސް، އެމްއެމްއޭ، ވިލާ ޓްރެވަލްސް، ވިލާ ކޮލްޖް އަދި ވިލާ ޝިޕިންގް އެންޑް ޓްރޭޑިންގ މި ކުއިޒުން ފެންނާނެ ކަމަށް ވިލާ ޓްރޭޑިންގ އިން ބުނެއެވެ.

ވިލާ ޓްރޭޑިންގ އިން އިތުރަށް ބުނީ، މި ކުއިޒް ކުރިއަށް ގެންދާނީ ރެޕިޑް ފަޔަރ ސްޓައިލްގައި ކަމަށެވެ. އަދި ކޮންމެ ޓީމަކަށް ވެސް ދެވިފައިވާ 1 މިނެޓް 30 ސިކުންތުގެ ތެރޭގައި ވީހާވެސް ގިނަ ސުވާލުތަކަށް ޖަވާބު ދޭން ވާނެ ކަމަށް ބުނެފައި ވެއެވެ.

މި މުބާރާތުގެ އެއްވަނަ ލިބޭ ޓީމަކަށް 4 މީހުންގެ 1 ރޭގެ ރިސޯޓް ދަތުރާއި ދެވަނައަށް ދާ ޓީމަކަށް ސިމްފޯނީ މޯލްޑިވްސް އިން ސްޕޮންސަރ ކުރާ 4 މީހުންގެ ކެއުމާއި، ތިންވަނައަށް ދާ ޓިމަކަށް ވިލާ މާޓުން ގިޕްޓް ވައުޗަރު ލިބިގެންދާނެއެވެ.

ވިލާ ޓްރޭޑިންގް އިން ބުނީ، މި މުބާރާތަކީ ހުރިހާ ބައިވެރިންނަށްވެސް ފޯރިގަދަ އަދި ތައުލީމީ މުބާރާތަކަށް ވާނެކަމަށެވެ. އަދި މީގެ އިތުރުން މުވައްޒަފުންގެ އިލްމް ދައްކާލުމުގެ ފުރުސަތު ލިބި، ރަނގަޅު އިނާމުތަކާއި، އެކު ކުންފުނިތަކުގެ މެދުގައި ވާދަވެރިކަން ދަމަހައްޓާނެ މުބާރާތަކަށް ވާނެ ކަމަށްވެސް ބުންޏެވެ.