ފަލަސްޠީނުގެ ޖާރުއްސަލަމްގައި ހުންނަ މުސްލިމުންގެ މުޤައްދަސް އެއް  މިސްކިތް ކަމަށްވާ އަލް އަޤްސާ މިސްކިތުގައި ނަމާދުކުރަން ތިބި ފަލަސްޠީނުގެ ގިނަ ޢަދެއްދެއްގެ ބަޔަކަށް އިޒްރާއިލް ސިފައިން ހަމަލާދީފިއެވެ.

ބުދަދުވަހުގެ ފަތިސް ވަގުތުގައި އިޒްރާއިލް ސިފައިން ދިން މިހަމަލާތަކުގައި ފަލަސްޠީނުގެ 7 މީހަކު ވަރަށް ބޮޑަށް ޒަހަމްވެފައި ވާކަމަށް މަންޒަރުދުށް މީހަކު އަލްޖަޒީރާއަށް ބުނެފައިވެއެވެ.

ފަލަސްޠީނުގެ ރެޑްކްރޮސެންޓުން ބުނެފައިވަނީ ހަމަލާތަކުގެ ސަބަބުން ބަޔަކަށް އަނިޔާވި ކަމަށެވެ. ސީދާ ޢަދަދެއް އެމީހުން ހާމަ ކޮށްފައެއް ނުވެއެވެ. އަދި އެމީހުން ބުނެފައިވަނީ ހަމަލާތަކުގައި ޒަހަމްވި މީހުންނަށް ފަރުވާ ދިނުމަށް ޤުދުސް އާއި ހަމައަށް އަވަސްފަރުވާދޭ ފަރާތްތައް ދިޔަނުދީ އިޒްރާއިލް ސިފައިން ހުރަސްއެޅިކަމަށެވެ.

Advertisement

އޭރު މިސްކިތުގެ ހަރިންމަ ތެރޭގައި ޤުރުއާން ކިޔަވަން ހުރި އުމުރުން ދުވަސްވީ އަންހެނަކު ބުނެފައިވަނީ އިޒްރާއިލް ސިފައިން މިސްކިތަށް ވަދެގަނެ ސްޓަން ގްރެނެޑްސް އިން މިސްކިތަށް ހަމަލާދީފައި ވާކަމަށެވެ. އަދި އިޒްރާއިލް ސިފައިންގެ މީހަކު އޭނާގެ މޭމަތީގައި ޖެހުމުގެ ސަބަބުން ނޭވާލާން ދަތިވަމުން ދާކަމަށް  އެމީހާބުނެފައިވެއެވެ.

އިޒްރާއިލް ސިފައިން ނެރެފައިވާ ބަޔާނުގައި ބުނެފައިވަނީ އެމީހުން އަޤްސާއަށް ހަމަލާދިނީ މޫނު ނިވާކޮށްގެން ތިބި ބަޔަކު އޮއްގަލާއި ބަޑިބޭސް އަދި ދަނޑިބުރިތައް ހިފައިގެން އަޤްސާތެރެއަށް ވަދެ ފިލައިތިބުމުން ކަމަށާއި، މިލިޓަރީ ރެއިޑަށް މިސްކިތަށް ވަންނަން އުޅުމުން އެ ގްރޫޕުން އެމީހުނަށް އެއެއްޗެހިން ހަމަލާދިން ކަމަށެވެ. ނަމަވެސް އެފަދަ އެއްވެސް ވާހަކައެއް އެއްވެސް މީޑިއާއެއްގައި ރިޕޯޓު ކޮށްފައެއް ނުވެއެވެ.

އަޤްސާގައި ނަމާދަށް ތިބި މީހުންގެ ގައިގައި އިޒްރާއިލް ސިފައިން ތަޅާ އަނިޔާކުރާ މަންޒަރު ދައްކުވައިދޭ ވީޑިއޯ ކްލިޕްތައް ދަނީ އިންޓަރނެޓްގައި ދައުރުވަމުންނެވެ. އިޒްރާއިލް ސިފައިންވަނީ ރޭވެސް އަޤްސާގެ ތެރެއިން އެތައް ބަޔަކު ހައްޔަރުކޮށްފައެވެ. 

އިޒްރާއިލް ސިފައިންވަނީ އަލް އަޤްސާގެ އަލް ގިބިއްލީ ނަމާދު ހޯލްގައި ނަމާދަށް ތިބި ފަލަސްޠީނުގެ އަންހެނުންނާއި ކުޑަކުދިނަށްވެސް އެކިވަރުގެ އަނިޔާތައް ދީފައެވެ. ކޮންމެ އަހަރެއްގެ ރަމަޟާން މަހާއި އެކުވެއް އިޒްރާއިލްގެ ޔަހޫދީންގެ ދުއްތުރާތައް ފަލަސްޠީނުގެ ޢާންމުނަށް ވަރަށް ބޮޑުވެއެވެ.