އިންޑިޔާގެ ހިންދޫން ފާހަގަ ކުރި "ރާމް ނަވާމީ" އޭ ކިޔާ އެމީހުންގެ ދީނީ މުނާސަބަތުގައި ހިންގި ހަރަކާތްތަކުގައި މުސްލިމުންނާއި ދެކޮޅަށް އިންޑީޔާގައި ކުރާ ޢަމަލުތައް ފެނިގެން ހިނގެއްޖެ ކަމަށް އޮގަނައިޒޭޝަން އޮފް އިސްލާމިކް ކޯޕަރޭޝަނުން ބުނެފިއެވެ.
އޯއައިސީ އިން މިގޮތައް ބުނުމުން އިންޑިޔާއިން ވަނީ މިކަމާއި ދެކޮޅުހަދައި އޯއައިސީގެ މިވާހަކަ ތަކަކީ ބައިނަލްއަޤްވާމީ މުޖްތަމަޢު އިންޑިޔާ އާއި ދެކޮޅުވެރިކުރުވުމަށް ހިންގާ އެޖެންޑާއެއް ކަމަށްބުނެފައެވެ.
އިންޑިޔާއިން މިކަމަށް ދެކޮޅުހަދައި އޯއައިސީ ގެ ބަސް ކުށްވެރި ކުރި ނަމަވެސް އިންޑިޔާގެ ހިންދޫން ފާހަގަ ކުރި "ރާމް ނަވާމީ" އޭ ކިޔާ މުނާސަބަތުގައި 9 ދުވަހަށް ދެމިގެންދާ ގޮތައް ހިންގި ހަރަކާތްތަކުގައި މުސްލިމުން ދިރިއުޅޭ ހިސާބުތަކުގައި ހިންދޫ ދީނުގެ އެކިއެކި ޝުޢޫރުތައް ފާޅުކުރަމުން އަޑު ގަދަކޮށް ކަނޑިއާއި ދަނޑިބުރި ފަދަ ތަކެތި ހިފައިގެން ހިނގިއިރު ނަފްރަތުން ފުރިގެންވާ ޝުޢޫރުތައް ވަނީ ފާޅުކޮށްފައެވެ. އަދި ބައެއް ހިސާބުތަކުގައި އޮއްގާ އުކައި މުސްލިމުންނަށް އަނިޔާ ދީފައިވެއެވެ. އަދި މުސްލިމުންގެ ގެދޮރާއި ފިހާރަ ތަކުގައި ހުޅުޖަހައިފައިވެސްވެއެވެ.
އިންޑިޔާގެ ލޯކަލް މީޑިއާތަކުން ރިޕޯޓް ކޮށްފައިވާ ގޮތުން މިހަރަކާތް ތަކުގެ ތެރޭގައި ދެމީހަކު މަރުވެފައިވެސްވެއެވެ. އެއީ މުސްލިމުންކަމެއް ނުވަތަ ނޫންކަމެއް ސާފުވެފައެއް ނުވެއެވެ.
އިންޑިޔާގެ ވެސްޓްބަންގާލް، ގުޖްރާތް، އުއްތަރް ޕްރަދޭޝް ފަދަ ސަރަހައްދުތަކުގައި މިފަދަ ހަރަކާތްތަކުގެ ސަބަބުން 100 އެއްހާ މީހުން ހައްޔަރުކޮށްފައިވާ ކަމަށް އަލްޖަޒީރާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
