ހުޅުމާލެ އިން ބީލަން އުސޫލުން ދިރިއުޅުމަށް ބިން ވިއްކުމަށް ހުޅުވައިލައިފިއެވެ.

އާބަންކޯ އިން ކޮށްފައިވާ އިއްލާނުގައި ބުނެފައިވަނީ ހުޅުމާލެއިން ބީލަމުގެ އުސޫލުން ދިރިއުޅުމަށް ޖުމްލަ 15 ބިމެއް "ބިޑް ޕޯޓަލް" މެދުވެރިކޮށް ގަތުމުގެ ފުރުސަތު ހުޅުވާލާކަމަށެވެ. އެގޮތުން ބީޗްފްރަންޓުން، 1،270.15 އަކަފޫޓާއި 1،803.28 އަކަފޫޓާއި ދެމެދުގެ ބޮޑުމިން ހުރި ފަސް ބިމަކާއި، ބީޗްސައިޑުން، 2،338.67 އަކަފޫޓާއި 1،644.83 އަކަފޫޓާއި ދެމެދުގެ ބޮޑުމިން ހުރި 10 ބިމެއް ދޫކުރުމަށް ވަނީ ހަމަޖެހިފައެވެ.

ބީލަން ހުށައަޅާ ފަރާތްތަކުގައި ހުންނަން ޖެހޭ ޝަރުތު ތަކުގެ ތެރޭގައި ހިމެނެނީ މީލާދީގޮތުން 18 އަހަރު ފުރިފައިވާ ދިވެހި ރައްޔިތެއް ކަމުގައި ވުން ނުވަތަ ދިވެހި ރާއްޖޭގައި ރަޖިސްޓަރ ކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުންޏެއް ކަމުގައިވުމެވެ.

ބީލަމުގެ އުސޫލުން ބިން ވިއްކުމަށް ހަމަޖެހިފައިވާ ފުރަތަމަ މަރުހަލާ އަކީ ޝައުގުވެރިވާ ބިމަށް އެކްސްޕްރެޝަން އޮފް އިންޓްރެސްޓް(އީއޯއައި) ހުށައެޅުމެވެ. ދެވަނަ މަރުހަލާ އަކީ އީއޯއައި ހުށައަޅައިފައިވާ ބިމަށް ބިޑް ހުށައެޅުމެވެ.

ޝައުގުވެރިވާ ފަރާތްތަކުން، ބީލަމުގެ އުސޫލުން ބިންގަތުމަށް ކުރިމަތިލުމަށް ހަމަޖެހިފައިވަނީ އޮންލައިން ޕޯޓަލް  /https://bids.urbanco.mv މެދުވެރިކޮށެވެ. އެހެންކަމުން، ބިން ގަތުމަށް އެދޭ ފަރާތްތަކުން، ޕޯޓަލް ގައި ރަޖިސްޓްރީ ކޮށް އާބަންކޯއިން ނެރެފައިވާ އިއްލާނުގައި ވާ ކަރުދާހާއި އެއްގޮތަށް ބީލަން ހުށައެޅުމަށް އެއިލާނުގައި ބުނެފައިވެއެވެ.

އަދި އިތުރު މައުލޫމާތު ހޯދުމަށް އާބަންކޯގެ ހޮޓްލައިން 1516 އަށް ގުޅުމަށް ވެސް އިއްލާނުގައި ބުނެފައިވެއެވެ.