ލާވާ ކޭކަކީ އެ ފެނުމުން ވެސް ކާން ބޭނުންވާހާ މީރު ކޭކެވެ. ރޯދަ ވީއްލާ ގަޑީގައި ފިނި ފިނި ވެނީލާ އައިސްކްރީމް އާއި އެކު ލާވާ ކޭކެއް ކާލުމުން ޔަގީނުންވެސް ހިތްހަމަޖެހުން ލިބޭނެއެވެ. އެހެންކަމުން މިއަދު ވޮއިސްގެ ބަދިގެއިން މި ގެނެސްދެނީ ޗޮކޮލެޓް ލާވާ ކޭކު ތައްޔާރުކުރާނެ ގޮތެވެ. 

3 މޭޒުމަތީ ސަމުސާ ފުށް

8 މޭޒުމަތީ ސަމުސާ އަންސޯލްޓެޑް ބަޓަރ

200 ގްރާމް ސެމީ ސްވީޓް ޗޮކްލެޓް ޗިޕްސް

1/4 ޖޯޑު ހަކުރު

1/4 ސައިސަމުސާ ލޮނު

2 ބިސް

2 ބިހުގެ ގޮބޮޅި

1 ސައިސަމުސާ ވެނީލާ އެސެންސް 

1) ކޭކު ފިހާ ކުދި ތަށީގައި ބަޓަރު ކޮޅެއް އުނގުޅާލާފައި އޭގައި ފުށް ވެސް ތުނި ފަށަލައެއް ގޮތަށް އުނގުޅާލާށެވެ. 

2) ތެއްޔަކަށް ކެކިކެކި ހުރި ހޫނުފެން އަޅާފައި އޭގެ މަތީގައި ބިއްލޫރި ތައްޓެއް ބަހައްޓައި ޗޮކްލެޓާއި ބަޓަރު ވިރެންދެން އެއްކުރާށެވެ. މިކްސިން ބޯލް ބަހައްޓާނީ ފެނުގައި ނުޖެހޭ ވަރަށެވެ.

3) އެއަށްފަހު މިކްސަރަކުން ބިހާއި، ގޮބޮޅި އަދި ހަކުރު، މަޑުމަޑު ރީނދޫކުލައެއް އަރަންދެން ގިރާށެވެ.

4) ދެން ކުރިން ވިރުވާފައި ހުރި ޗޮކްލެޓު ހޫނުކޮށް ހުއްޓާ ބިހާއި އެއްކުރާށެވެ. އެއްކުރާނީ ވެނީލާ އެސެންސުވެސް އަޅައިގެންނެވެ.

5) ބިހާއި ޗޮކްލެޓު ރަނގަޅަށް އެކުވުމުން މޭޒުމަތީ ސަމުސަލުގެ ތިން ސަމުސާ ފުށް ވެސް އަޅައި އެއްކުރާށެވެ.

6) ކޭކު ފުށްގަނޑު ހަތަރު ބައިކޮށްފައި ކޮންމެ ބައެއް ކޭކު ފިހާ ކުޑަ ތައްޓަށް އަޅާށެވެ. އަދި އަވަން ހޫނުކުރުމަށްފަހު 220 ޑިގްރީ ގައި ދިހައެއް ނުވަތަ ފަނަރަ މިނެޓު ވަންދެން ފިހެލާށެވެ.

7) ފިހަންވާނީ ކޭކުގެ ބޭރު ރަނގަޅަށް ރޯފިލައި ހަރުކޮށް ހުންނަ ވަރަށް އަދި މެދު މަޑުކޮށް ހުންނަ ވަރަށެވެ.

8) ކޭކު ފިހެވުމުން އެއް މިނެޓު ވަރު ބަހައްޓައި ހިހޫ ކުރުމަށްފަހު ތަށްޓަކަށް ފުށުން ޖަހާށެވެ. އަދި މައްޗަށް އައިސިން ޝުގަރ ކޮޅެއް ފުރޭނުމަށްފަހު، ވެނީލާ އައިސްކްރީމް އާއި އެކު ކާލާށެވެ.