ފެނަކަ ކޯޕަރޭޝަނުން ސަޕްލަޔަރުންނަށް ފައިސާ ނުދޭތީ އާންމުންގެ ހުރި ކަންބޮޑުވުންތައް ފާހަގަކޮށް މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފި އެވެ.
މި މަޖިލީހަށް ހުށައެޅުއްވީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ.
އާދަމް ޝަރީފުގެ އެ މައްސަލައިގައި ވަނީ ފެނަކައިން ކުދި ވިޔަފަރާތިކަމަށް ދޭން ޖެހޭ ފައިސާ އަވަސް މުއްދަތެއްގައި ދިނުމާއެކު ފެނަކައިގެ ފައިނޭންޝަލް އޮޑިޓެއް ހެދުމަށް ގޮވާލާ ކަމަށެވެ.
އެއީ މިހާރުވެސް ފެނަކައިން ކުދި ވިޔަފާރިކަމަށް ދޭންޖެހޭ ފައިސާ ނުދީގެން އާންމުންގެ ހުރި ކަންބޮޑުވުންތަކާއެކު މަގުމައްޗަށް ނިކުމެ މުޒާހަރާ ކުރާ ހިސާބަށް ކަންކަން ގޮސްފައިވާތީކަން އެ މައްސަލައިގައި ފާހަގަކޮށްފައި ވެއެވެ.
"ފެނަކައިން ވިޔަފާރީގެ މުއާމަލާތްތައް ހިންގުމަށްފަހު މާލެއާއި ރަށްތަކުގެ ކުދި ވިޔަފާރިތަކަށާއި ކުންފުނިތަކަށް 2.8 ބިލިއަނަށްވުރެ ގިނަ އަދަދެއްގެ ފައިސާ ދަރާފައިވާއިރު އެ ފައިސާ ނުލިބި ގިނަ ދުވަސްވުމުގެ ސަބަބުން ކުދި ވިޔަފާރިތަކާއި ކުންފުނިތަކަށް މާލީ ދަތިތަކާއި ކުރިމަތިވެ މުވައްޒަފުންނަށް މުސާރަ ނުދެވި އަދި ކުލި ދެއްކުންފަދަ ކަންކަން ކުރަން ދަތިވެ ބައެއް ވިޔަފާރިތައް ހުއްޓި ބައެއް ކުންފުނިތައް ބަނގުރޫޓުވުމާއި ހިސާބަށް ގޮސްފައިވާ ހިނދު ފެނަކައިން ސަޕްލަޔަރުންނަށް ދޭންޖެހޭ ފައިސާ ނުލިބުމުގެ ސަބަބުން އެކަމުގެ ޝަކުވާތައް ތަކުރާރުކޮށް ކުރުމުންވެސް ފައިސާ ނުލިބުމުން ބައެއް ފަރާތްތަކުން ފެނަކަ ކުރިމަތީގައި މުޒާހަރާކުރާ ހިސާބަށް ފެނަކައިގެ ހާލަތު ގޯސްވެއްޖެ"
އާދަމް ޝަރީފު
އާދަމް ޝަރީފު ވިދާޅުވީ ކުންފުނިތަކަށް ދައްކަން ޖެހޭ ފައިސާ ނުދައްކާތީ ފެނަކައާއި މެދު ކުދި ވިޔަފާރިތަކާއި އާންމުން ކުރާ އިތުބާރު ގެއްލިފައިވާކަމަށެވެ.
އެހެންނަމަވެސް، އެއިން އެއްވެސްކަމަށް ބެލުމެއްނެތި އިންތިޚާބުތަކާއި ސިޔާސީ ކަންކަމަށް ފެނަކައިން ބޮޑެތި ޚަރަދުތަކެއް ކުރަމުންދާކަމަށް އާދަމް ޝަރީފު ވިދާޅުވިއެވެ. އަދި ކުންފުނި ހިންގުމާއި ވިޔަފާރި ހިންގުމުގައި ކޮރަޕްޝަނުގެ އެތައް ކަމެއް އެ ކުންފުނިން ހިންގަމުންދާކަން ވެސް ފާހަގަކުރެއްވި އެވެ.
އެއާއެކު އާދަމް ޝަރީފުވަނީ ފެނަކައިން ކުދި ވިފަރާތިތަކާއި ކުންފުނިތަކަށް ދޭން ޖެހޭ ފައިސާ ލަސްނުކޮށް ދިނުމަށް ގޮވާލާފަ އެވެ.
އެ ކުއްލި މައްސަލައަށް ބަހުސްކުރުމަށް ފެންނަކަމަށް ވޯޓުދެއްވީ ވޯޓުގައި ބައިވެރިވި ބޭފުޅުންގެ ތެރެއިން 15 ބޭފުޅުންނެވެ. ނުފެންނަކަމަށް 18 ބޭފުޅުން ވޯޓުދެއްވާފައި ވެއެވެ. އެއާއެކު އެ މައްސަލަ ވަނީ މަޖިލީހުން ބޭރުކޮށްލާފަ އެވެ.
Advertisement
This content is created and paid for by advertisers and does not involve Voice Journalists
