އިޒްރާއިލުން ފަލަސްޠީނުގެ ދެމީހެއްގެ ގަޔަށް ބަޑިޖަހައި ޝަހީދުކޮށްލައިފިއެވެ.

ފަލަސްޠީނުގެ ހުޅަނގު އައްސޭރީގައި ހިނގި މިހާދިސާގައި ޝަހީދުވެފައިވަނީ ސައުދު ޢަބްދުﷲ ސައުދު ޓީޓީ އަދި މުޙައްމަދު އަބޫ ދިރާ އެވެ.

އިޒްރާއިލް ސިފައިން ބުނެފައިވަނީ އެމީހުން ބަޑިން ހަމަލާދީ މަރާލި ދެމީހުންނަކީ ދެޓެރަރިސްޓުން ކަމަށެވެ. އަދި އެދެމީހުން އިޒްރާއިލްގެ ބަޔަކަށް ހަމަލާދިން ކަމަށްވެސް އިޒްރާއިލްގެ ޑިފެންސް މިނިސްޓަރު ވަނީ ބުނެފައެވެ. އަދި އިޒްރާއިލް ސިފައިން އެދެމީހުންގެ ގަޔަށް ބަޑިޖަހުމަށް ހިންގުނު އޮޕަރޭޝަންގެ ސަބަބުން އެދެމީހުން އިޒްރާއިލްގެ އާންމުންނަށް އަމާޒުކޮށް ދޭން އުޅުނު ހަމަލާ ނާކާމިޔާބު ކޮށް އިޒްރާއިލްގެ އާންމުން ރައްކާތެރިކުރެވިފައިވާ ކަމަށްވެސް އޭނާ ވަނީ ބުނެފައެވެ.

Advertisement

ފަލަސްޠީނުގެ ލޯކަލް މީޑިއާ އަށް މައުލޫމާތު ފޯރުކޮށްދޭ ފަރާތަކުން ބުނެފައިވަނީ އިޒްރާއިލް ސިފައިން ބަޑިޖަހައި ޝަހީދު ކޮށްލި ދެމީހުންގެ ހަށިގަނޑު އިޒްރާއިލް ސިފައިން ގެންގޮސްފައިވާކަމަށެވެ.

ޝަހީދުވި ދެމީހުންގެ ތެރެއިން ސައުދު ޢަބްދުﷲ ސައުދު ޓީޓީ އަކީ ފަލަސްޠީނުގެ ސިފައިންގެ ތެރޭގައި މަސައްކަތް ކޮށްފައިވާ މީހެކެވެ. އަދި މުޙައްމަދު އަބޫ ދިރާ ވަނީ އިޒްރާއިލް ޖަލުގައި 7 އަހަރު ހޭދަ ކޮށްފައިވާ މީހެއް ކަމަށް އަލްޖަޒީރާގައި ބުނެފައިވެއެވެ.

ފާއިތުވި އަހަރު އިޒްރާއިލް ސިފައިންވަނީ އެމީހުން ވެރިވެގަނެފައިވާ ފަލަސްޠީނުން ހުޅަނގުއައްސޭރީގައި އެތައް ފަހަރަކު މިލިޓަރީ ރެއިޑްތައް ހިންގައިފައެވެ.

މިއަހަރުގެ ޖެނުއަރީ އިން ފެށިގެން އިޒްރާއިލްގެ ޔަހޫދީންގެ ހަމަލާތަކުގެ ސަބަބުން ފަލަސްޠީނުގެ 90 މީހަކު ވަނީ ޝަހީދުވެފައެވެ.

ރަމަޟާން މަސް ފެށުމާއި އެކު ފަލަސްޠީނުގެ ރައްޔިތުންގެ މެދުގައި ނުތަނަވަސްކަން އުފެދިފައިވާ މިންވަރު ވަނީ އިތުރުވެފައެވެ.

އިޒްރާއިލް ސިފައިން ވަނީ ރަމަޟާން މަސް ފެށުމާއި އެކު ޖާރުއްސަލަމްގައި ހުންނަ އަލް އަޤްޞާ މިސްކިތުގައި މިލިޓަރީ ރެއިޑް ތަކެއް ހިންގައިފައެވެ. އެގޮތުން ފާއިތުވި ހަފްތާގައި އަޤްސާ ގައި ފަލަސްޠީނުގެ ބަޔަކު އިޢްތިކާފަށް ތިއްބައި އެމިސްކިތުގެ ޙުރުމަތް ކެނޑޭނޭހެން އެމިސްކިތަށް ގަދަކަމުން ވަދެގަނެ ނަމާދުކުރުމަށާއި ޤުރުއާން ކިޔަވަން ތިބި މީހުންގެ ގައިގައި ތަޅައި އަނިޔާ ކޮށް ކަރުނަ ގޭސް ޖަހައި ހަދައިފައިވެއެވެ.

މިމައްސަލަ ޢަރަބި އިސްލާމީ ގިނަ ޤައުމު ތަކުން ވަނީ ހަރުކަށި ޢިބާރާތުން ކުށްވެރިކޮށްފައެވެ.