އިިކޮޅުން މަސައްކަތް ކުރަނީ ފެނަކަ ހަލާކުކޮށްލުމަށް ކަމަށް ރައްޔިތުންގެ މަޖިލީހިގެ މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެއެވެ.

ޝަރީފް މިހެން ވިދާޅުވީ އޭނާ ކުރެއްވެވި ޓުވީޓެއްގައެވެ. 

ޝަރީފްގެ ޓުވީޓުގައި ވިދާޅުވީ ފެނަކައިން ރައްޔިތުންނަށް އެކަށީގެންވާ ޚިދުމަތެެއް ފޯރުކޮށްދޭތީ އިދިކޮޅުން އެކުންފުނި ހަލާކުކޮށްލެވޭތޯ އުޅޭ ކަމަށެވެ.

"ވިޔަފާރި އުސޫލުން އަބަދުބެސް މަސައްކަތް ކުރުވާނެ ކޮމްޕެނީއެއް ވިއްޔާ، ދައްކަން ކިތަންމެ ބިލެއްވެސް ހުންނާނެ، ދައްކަމުންވެސް ދާނެ، އެއީ އެކަން ހިނގާގޮތް" ޝަރީފް ވިދާޅުވެފައި ވެއެވެ. 

ޝަރީފް މިފަދައިން ޓްވީޓް ކުރައްވާފައިވާއިރު ދާދި ފަހަކުން ފެނަކަ އޮފީސް ހުންނަ  ތަނުގެ ގޯތި ތެރޭގައި ބަޔަކު ވަނީ ފެނަކައިން ލިބެން ޖެހޭ ފައިސާތަކެއް ނުލިބި ލަސްވަމުން ދާތީ މުޒާހަރާކޮށްފައެވެ. 

އަދި މިކަމާއި ގުޅިގެން މަޖިލީހަށް ކުއްލި މައްސަލައެއް ހުށައެޅުމުން އެ މައްސަލަ ވަނީ މަޖިލީހުން ބޭރުކޮށްލައިފައެވެ.

ފެނަކައިގެ އެކި މަސައްކަތްތަކަށް ބޭނުންވާ ތަކެތި ސަޕްލައިކޮށްދޭ ސަޕަލަޔަރުން މާފަންނުގައި ހުންނަ ފެނަކަ އޮފިހުގެ ގޯތިތެރޭގައި އެމީހުންގެ ޝުޢޫރުތައް ލިޔެފައިވާ ޕޯސްޓަރުތައް ހިފައިގެން ކުރި މުޒާހަރާގައި ބޭނުންކުރި އެއް ޕޯސްޓަރެއްގައި ބުނެފައިވަނީ އެ މީހުންކުރި މަސައްކަތުގެ އަގަށްވާ 9،450،897ރ ނުދީ ލަސްވާތާ 7 މަސް ދުވަސް ވެއްޖެ ކަމަށެވެ. 

ފެނަކައިން އެތައް ބަޔަކަށް ދޭން ޖެހޭ ފައިސާ ނުދޭ މައްސަލަ ފެންމަތިވެފައިވާއިރު، މިހާތަނަށް އެ ކުންފުނިން އެކަމާ ގުޅޭގޮތުން ވާހަކަ ދައްކާފައެއް ނުވެ އެވެ. އަދި މުޒާހަރާ އާއި ގުޅިގެންވެސް އެއްވެސް އެއްޗެެއް ރަސްމީ ހައިސިއްޔަތަކުން ފެނަކައިން ހާމަކޮށްފައެއް ނުވެއެވެ.

ދާދި ފަހުން އެސްޓީއޯގެ އެމްޑީ ކަމުން ވަކިކުރެވުނު އަމްރުވެސް ވަނީ ފެނަކައިގެން ހިންގުން ވަރަށް ބޮޑަށް ދޯދިޔާވެފައި ވާކަން ފާހަގަ ކޮށްފައެވެ. 

ހަމަމިޔާއިއެކު ތެޔޮ ގަތުމަށްފަހު ފެނަކައިން އެސްޓީއޯ އަށް ދައްކަން ޖެހި ނުދައްކާ އޮތް ފައިސާގެ އަދަދު 1.8 ބިލިއަން ރުފިޔާއަށް އަރާ ކަމަށް ވެސް މީޑިއާ އަށް ވަނީ އެނގިފައެވެ.