އަމީނީ މަގުން ގަސް ނަގަނީ، ނުނަގާ ނުވެގެންކަން މޭޔަރަށް އެނގިލައްވާނެ ކަމަށް ރޯޑް ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރ މޫސާ ޢަލީމަނިކު (މޫކޭ) ވިދާޅުވެއްޖެއެވެ.

މޫކޭ މިހެން ވިދާޅުވީ، މާލެ ސިޓީ ކައުންސިލުން މާލެ ފެހި ކުރާއިރު ސަރުކާރުން ގަސް ކަނޑާ ހުސްކުރަނީ ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވުމާ ގުޅިގެންނެވެ.

މުއިއްޒު ވިދާޅުވީ މާލެ ސިޓީ ކައުންސިލުން ގަސް އިންދުމާއި މާލެ ފެހި ކުރުމުގެ މަސައްކަތް ކުރަމުންދާއިރު ސަރުކާރުގެ ކިބައިން ފެންނަނީ ގަސްތައް ކަނޑާ ހުސްކުރަމުންދާތަން ކަމަށާއި އަމީނީ މަގުގެ ގަސްތައް އެއްކޮށް ނަގަމުންދަނީ މާލެ ސިޓީ ކައުންސިލް އިން އެކަމާ ދެކޮޅު ހަދަމުން ދަނިކޮށް ކަމަށެވެ.

އެކަމާ ގުޅިގެން، މާލެ ސިޓީ ކައުންސިލުން ފޮނުވާފައިވާ ސިޓީއެއް ހިއްސާކުރަމުން މޫކޭ ވިދާޅުވީ، އާމީނީ މަގުން ގަސް ނަގަނީ ކޮންމެހެން ނުނަގާ ނުވެގެންކަން މޭޔަރަށް މާބޮޑަށް އެނގިލައްވާނެ ކަމަށެވެ. އަދި އެއީ އެއްވެސް ބަޔަކު ކުރާ ހިތުން ކުރާނެ ކަމެއް ނޫން ކަމަށް މޫކޭ ވިދާޅުވިއެވެ.

މޫކޭ ހިއްސާކުރި ސިޓީއަކީ މިދިޔަ އަހަރުގެ ސެޕްޓެމްބަހު މަހުގެ ތެރޭގައި މާލެ ސިޓީ ކައުންސިލުން އާރްޑީސީއަށް ފޮނުވާފައިވާ ސިޓީއެކެވެ. އެ ސިޓީގައި ބުނެފައި ވަނީ މަގުމަތިން އޭރު ނަގަން ހަމަޖެހިފައިވާ ގިނަ ގަސްތައް ނައްތާލަން ބޭނުންވާ ކަމަށާއި ބޭނުން ކުރެވޭ ޒާތުގެ ގަސްތައް ބޭނުންވާ ފަރާތްތަކަށް ހަދިޔާކުރުމަށް ކަނޑައަޅާފައިވާ ކަމަށެވެ.