އަދުގެ އެމްޑީޕީ ސަރުކާރުން ވަނީ ސަރުކާރު ހިއްސާވާ ކުންފުނިތައް ދަރުވާލައި ބަނގުރޫޓް ކޮށްލާފައި ކަމަށް ކުރީގެ އެންވަޔަރަންމަންޓް މިނިސްޓަރު ޠާރިގު އިބްރާހިމް ވިދާޅުވެއްޖެއެވެ.

ޠާރިގު މިފަދައިން ވިދާޅުވީ ތިލަމާލެ ބްރިޖު އެޅުމަށް ހަވާލުކޮށްފައިވާ އިންޑިއާގެ އެފްކޮންސް ކުންފުނި ހިންގަމުންދާ ޝާޕޫރުޖީ ޕަލޯންޖީ (އެސްޕީ) ގުރޫޕްގެ ދަރަނި އިންތިހާއަށް ބޮޑުވުމުގެ ސަބަބުން އެ ދަރަނި އަދާކުރުމަށް އެފްކޮންސް ކުންފުނި ވިއްކާލުމަށް ނިންމުމާއި ގުޅިގެން ކުރެއްވި ޓުވީޓެއްގައެވެ. 

ޠާރިގް ވިދާޅުވީ، އެފްކޮންސް ކުންފުނި ދަރަނިވެރިވެފައިވާ ފަދައިން، އަދުގެ ނާގާބިލް އެމްޑީޕީ ސަރުކާރުން، ސަރުކާރު ހިއްސާވާ ކުންފުނިތައްވެސް ދަރުވާލާފައިވާ ކަމަށެވެ. އަދި، އެމްޑީޕީ އަށް އިތުރު 5 އަހަރުގެ ދައުރެއް ލިބިއްޖެނަމަ، ސަރުކާރު ހިއްސާވާަ ދިވެހިންގެ ހުރިހާ ކުންފުނިތައް ވިއްކާލާނެ ކަމަށްވެސް އޭނާ ވިދާޅުވި އެވެ. 

Advertisement

ސަރުކާރު ހިއްސާވާ ކުންފުނިތަކުގެ ދަރަނި ބޮޑުވެފައިވާ ކަމަށްބުނެ އެމްޑީޕީގެ ފިކުރެއްގެ ދިރުން ފެކްޝަނުގެ ބައެއް މެންބަރުންވެސް ވަނީ ކަންބޮޑުވުން ފާޅުކޮށްފަ އެވެ. 

އެގޮތުން ދާދި ފަހުން އެސްޓީއޯގެ މެނޭޖިން ޑިރެކްޓަރުގެ މަގާމުން ވަކިކުރެވުނު ހުސައިން އަމްރު ވަނީ ފެނަކައިގެ ހުރިހާ އެސެޓެއް ވިއްކިޔަސް ދަރަނި ނުދެއްކޭވަރަށް އެ ކުންފުނި ދަރާފައިވާ ކަމަށް ވިދާޅުވެފައެވެ.