އިންޑިޔާގެ ނިއުދިއްލީގައި ހުރި 250 އަހަރުވެފައި ހުރި މިސްކިތެއް ނޯޓިސް ދިނުމެއް ނެތި ތަޅައިލައިފިއެވެ.

އަންގާރަ ދުވަހުގެ ހެނދުނު ހެނދުނާ އިންޑިޔާގެ ލޭންޑް އެންޑް ޑިވަލޮޕްމެންޓް އޮފީހުގެ އޮފިސަރުންނާއި ފުލުހުން ހެވީލޯޑް ވެހިކަލް ތަކުގައި އައިސް އެމިސްކިތުގެރ އިމުގެ ތެރޭގައި ހިމެނޭ ބައެއް ތަޅައިލައިފައިވާކަމަށް މީޑިއާގައި ބުނެފައިވެއެވެ. އިންޑިޔާގެ ލޭންޑް އެންޑް ޑިވަލޮޕްމެންޓް އޮފީހުގެ ޗީފް ސުވާސިޝް ދާސް ބުނެފައިވަނީ މިސްކިތުގެ އެބައި ތަޅައިލައިފައިވަނީ ކޯޓު އަމުރެއްގެ ދަށުން ކަމަށެވެ.

"އިތުރު އެއްޗެއް ބުނާކަށް ނެތް މިކަމުގަ، މިސްކިތަކީ 250 އަހަރުވެފައި ހުރި ތަނެއް، ތަޅާލެވުނު ބަޔަކީ ވަރަށްފަހުން އިތުރުކުރެވުނު ތަނެއް" ސުވާސިޝް ބުނެފައިވެއެވެ.

އިސްލާމިކް ސެމިނަރީ މަދްރަސާ ތެހެފީޒުލް ޤުރުއާންގެ ޖެނެރަލް ސެކްރެޓަރީ މަޠްލޫބް ކަރީމް ޙާފިޡް ބުނެފައިވަނީ ލޭންޑް އެންޑް ޑިވަލޮޕްމެންޓުން މިކަންތައް ކޮށްފައިވަނީ ހެނދުނު 6:30 ހާއިރު ކަމަށާއި، އަދި އޭގެ ކުރިން އެކަމާއި ގުޅޭ ގޮތުން އެއްވެސް އެންގުމެއް އަންގައިފައި ނުވާ ކަމަށެވެ.

"އަހަރެން ހުރީ ގޭގަ، ފޯނު ކޯލެއް އައީ، މިސްކިތުގެ އެބައި ތަޅައިލުމަށް ޔުނިފޯމް އަޅައިގެން ތިބި ބޮޑު ފޯސް އެއް އައިކަމަށް ބުނީ" ޙާފިޡް ބުނެފައިވެއެވެ.

"އެތަނުގެ މައި ހޯލާއި އެހެން ކޮޓަރިތަކާއި މަދަރުސާވެސް 10 މިނިޓު ތެރޭގައި ތަޅައި ބިމާއި ހަމަކޮށްލައިފި، މި ބިމަކީ ވަޤްފް ބޯޑުގެ ބިމެއް، އަހަރެމެން ބެލިން ބޯޑަށް ވެސް އެއްވެސް ނޯޓިސް އެއް އައިސްފައިވޭތޯ އެތަން ތަޅައިލުމުގެ ކުރިން، އެކަމަކު އެބޯޑަކަށްވެސް އެއްވެސް ޤާނޫނީ ނޯޓިސް އެއް ފޮނުވައިފައެއް ނުވޭ، ތަޅައި ލެވުނު އިމާރާތަކީ ޤަވާއިދާއި ޚިލާފަށް ބިނާކުރެވިފައި ހުރި ތަނެއް ނޫން" ހާފިޡް އިތުރަށް ބުނެފައިވެއެވެ.

"ބައްޗޯ ވާލީ މަސްޖިދް" ގެ ނަމުން މަޝްހޫރު އެމިސްކިތަކީ ދެރަ ނިކަމެތި ފަޤީރު މުސްލިމް 120 ކުއްކަޖަކަށް ބޯހިޔާވަހިކަމާއި ކެއުމާއި ތަޢުލީމު ފޯރުކޮށްދެމުން ދިޔަ ތަނެކެވެ.

"އެކުދިންނަށް ކެއުން ފޯރުކޮށްދެވޭ، މިއީ އެކުދިންގެ ގެޔަކީވެސް ސްކޫލަކީވެސް، ދެން އެކުދިން ދާނީ ކޮންތާކަށް" ހާފިޡްގެ ވާހަކައިގައި ބުނެފައިވެއެވެ.

މިސްކިތުގެ ހަޒާންދާރުގެ މަޤާމުގައި ހުރި އިދްރިސް ޚާން ބުނީ މިމައްސަލައާއި ގުޅޭ ކޯޓުގެ އަޑުއެހުންތައް ލަސްކުރަމުން ދާކަމަށެވެ. އަދި ކުދިން ނިދުމަށް ބޭނުންކުރާ އެނދުތައްވެސް ހަލާކު ކޮށްލައިފައިވާކަމަށް އޭނާ ބުނެފައިވެއެވެ. ނަމަވެސް އިންޑިޔާ ސަރުކާރުގެ އޮފިސަރު ވަނީ އެކަން ދޮގު ކޮށްފައެވެ.