ހިޔާ ފުލެޓުތަކުގައި ނިއްވާ ނުލައި އުކާލާ ސިނގިރޭޓް ފިލްޓަރު ތަކުގެ ސަބަބުން އަލިފާނުގެ ހާދިސާތައް ތަކުރާރު ވަމުންދާތީ އެފަދައިން ކަން ކުރާ ފަރާތްތައް ދެނެގަނެ އެ ފަރާތްތަކުގެ އަތުން ފުލެޓް އަތުލަފާނެ ކަމުގެ އިންޒާރު އާބަންކޯއިން ދީފި އެވެ.

ހިޔާ ޓަވަރުގެ ޔުނިޓެއްގައި މިރޭވެސް އަލިފާނުގެ ހާދިސާއެއް ހިނގާފައިވާއިރު އެކަމާއި ގުޅިގެން އާބަންކޯއިން ނެރުނު ބަޔާނެއްގައި ބުނީ، މި ހާދިސާ ހިނގާފައިވާނީ ނިވާ ނުލާ އެއްލާލެވުނު ސިގިރެޓެއްގެ ސަބަބުން ކަމަށް ޝައްކު ކުރެވޭ ކަމަަަށެވެެ. 

އަދި އެފަދަ ކަން ކަން ކުރުމަކީ މަނާ ކަމެއް ކަން ފާހަގަކޮށް އާބަންކޯއިން އިތުރަށް ބުނީ، އެންމެ މީހަކު ކުރާ މިފަދަ އަމަލެއްގެ ސަބަބުން އެތައް ރައްޔިތުންގެ ފުރާނައާއި މުދަލަށް ގެއްލުންވެ މިފަދަ އަމަލެއްގެ ސަބަބުން މިއަށްވުރެވެސް ނުރައްކާތެރި ހާދިސާއެއް ކުރިމަތިވުމުގެ ފުރުސަތުވެސް އޮތް ކަމަށެވެ.  

އެހެން ކަމުން އެފަދަ ޢަމަލުތައް ކުރާ ފަރާތްތައް 1000ރ އާއި 100,000ރ ގެ އަދަދަކުން ޖޫރިމަނާ ކުރެވޭނެ ކަމަށާ އަދި ހަމައެހެންމެ، އެފަދަ ފަރާތްތަކުގެ އަތުން ފުލެޓް އަތުލުމުގެ ފުރުސަތު ވެސް އޮންނާނެ ކަމަށް އާބަންކޯއިން ބުނެއެވެ.  

"މިފަދަ އަމަލުތައް ކުރާ ފަރާތްތަކާއި ޔުނިޓްތައް ދެނެގަނެ ހަރުކަށި ފިޔަވަޅު އަޅާނެ ވާހަކަ ދެންނެވީމެވެ. މި ފަދަ ހާދިސާތައް ތަހުޤީޤު ކުރުމަށްފަހު ރައްޔިތުންގެ ސަލާމަތަށް އިހްމާލުވެފައިވާ ފަރާތްތަކުގެ ޔުނިޓް އަތުލުމުގެ ފުރުސަތުވެސް އޮންނާނެއެވެ." އާބަންކޯއިން ބުނެފައިވެއެވެ. 

މިއާއެކު އާބަންކޯއިން ވަނީ އެކަކު އަނެކަކަށް އިހްތިރާމްކޮށް، އެކުގައި ދިރިއުޅޭ އަވަށްޓެރިންގެ ރައްކާތެރިކަމާއިމެދެ ފަރުވާތެރިވެ މިފަދަ ކަންކަން ތަކުރާރުވިޔަ ނުދިނުމަށްޓަކައި ހުޅުމާލޭގެ ފްލެޓްތަކުގައި ދިރިއުޅޭ ރައްޔިތުން އެ ކުންފުންޏާއި ގުޅިގެން މަސައްކަތް ކުރުމަށް އިލްތިމާސް ކޮށްފައެވެ.