ސަރުކާރުގެ ފެން ކުންފުނި ފެނަކް ކޯޕަރޭޝަން އޮޑިޓް ކުރުމަށް ގޮވާލާ ރައްޔިތުންގެ މަޖިލީހަށް ޤަރާރެއް ހުށައަޅުއްވައިފި އެވެ.
މި ޤަރާރު މަޖިލީހަށް ހުށައަޅުއްވާފައިވަނީ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ.
އެ ޤަރާރުގައި އާދަމް ޝަރީފު ވަނީ ފެނަކައަށް ތަކެތި ފޯރުކޮށްދީފައިވާ ސަޕްލަޔަރުންނާއި ކޮންޓްރެކްޓަރުންނަށް ދައްކަންޖެހޭ ފައިސާއާއި ކުންފުނީގެ އެހެނިހެން ދަރަނި އަދާކުރާނެ ގޮތުގެ ޕްލޭނެއް އެކުލަވައިލުމާއެކު، ކުންފުނީގެ މާލީ އޮޑިޓެއް ހެދުމަށް ގޮވާލައްވާފަ އެވެ.
އާދަމް ޝަރީފުގެ އެ ގަރާރުގައި ވަނީ ންކައިގެ ދަރަނި 2.8 ބިލިއަން ރުފިޔާއަށްވުރެ މައްޗަށް އަރާފައިވާއިރު، އެ ކުންފުނިން ދައްކަންޖެހޭ ފައިސާ ނުލިބުމުގެ ސަބަބުން ކުދި އަދި މެދުފަންތީގެ ކުންފުނިތަކަށް މާލީ ދަތިތައް ކުރިމަތިވެ، ވިޔަފާރި ހުއްޓި މުވައްޒަފުންނަށް މުސާރަނުދެވޭ މައްސަލަ ކުރިމަތިވެފައިވާކަން ފާހަގަކުރައްވާފަ އެވެ.
އޭގެއިތުރުން ފެނަކައިން ދޭންޖެހޭ ފައިސާ ނުދިނުމުގެ ސަބަބުން އެ ކުންފުނީގެ އިތުބާރު އާންމުންނާއި ވިޔަފާރިތަކުގެ ކުރިމަތީގައި ގެއްލިފައިވާކަން އެ ޤަރާރުގައި ފާހަގަކޮށްފައި ވެއެވެ.
ފެނަކައިން ދައްކަންޖެހޭ ފައިސާ ލިބިފައި ނުވާތީ ސަޕްލަޔަރުން ވަނީ މިދިޔަ ހަފްތާ ފެނަކައިގެ މައި އޮފީސް ކުރިމަތީ މުޒާހަރާކޮށްފަ އެވެ.
އެ ޤަރާރުގައި ގޮވާލާފައިވަނީ ފެނަކައިން ދައްކަންޖެހޭ ދަރަނި ލަސްނުކޮށް ދެވޭނެ އިންތިޒާމެއް ހަމަޖައްސައިދެވޭތޯ ބެލުމާއެކު، ފެނަކައިގެ އިދާރީ އަދި މާލީ އޮޑިޓެއް ހަދައި ކައިރި މުސްތަޤުބަލެއްގައި ފެނަކައިގެ ދަރަނި އަދާކުރާނެ ގޮތުގެ ޕްލޭނެއް އެކުލަވާލުމަށް ގޮވާލާފަ އެވެ.
ފެނަކަ އޮޑިޓް ކުރުމަށް ގޮވާލާ މަޖިލީހަށް ޤަރާރެއް ހުށައަޅާފައިވާއިރު، ފެނަކައިން ސަޕްލަޔަރުންނަށް ދައްކަން ޖެހޭ ފައިސާ ނުދައްކާތީ ރައްޔިތުންގެ މަޖިލީހުގެ ނިމިދިޔަ ހަފްތާގެ ޖަލްސާއަށް ވަނީ ކުއްލި މައްސަލައެއްވެސް ހުށައަޅާފަ އެވެ. އެހެން ނަމަވެސް އެ ކުއްލި މައްސަލަ ވަނީ އެދުވަހު ބޭރުކޮށްލާފަ އެވެ.
Advertisement
This content is created and paid for by advertisers and does not involve Voice Journalists
