މޫސުން ގޯސްވެ، މިހާރު ކުރިއަށްދާ، ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ބައި-އިލެކްޝަންއަށް ވޯޓު ލުމުގެ ވަގުތު އިތުރުކޮށްފިއެވެ.
އިލެކްޝަންސް ކޮމިޝަނުން ބުނީ، ވޯޓުނެގުމަށް ހަމަޖެހިފައިވާ ވަގުތުގައި މޫސުން ގޯސްވުމުގެ ސަބަބުން ވޯޓުލާން ދިޔުމަށް ދަތިވެފައިވާތީ، ވޯޓުލުމުގެ ވަގުތު މިއަދު 17:00އަށް އިތުރުކުރެވިފައިވާ ކަމަށެވެ.
ބައި-އިލެކްޝަންގެ ވޯޓްލުން ކުރިއަށް ގެންދިއުމަށް ކުރިން ހަމަޖެހިފައި ވަނީ ހެނދުނު 08:00 އިން ހަވީރު 04:00 އަށް ކަމަށް އިލެކްޝަންސް ކޮމިޝަން (އީސީ) އިން ވަނީ އަންގާފައެވެ.
މިދާއިރާގެ ބައި-އިލެކްޝަންގައި 3 ސިޔާސީ ޕާޓީގެ ކެނޑިޑޭޓުން ވާދަ ކުރެއެވެ. އެއީ ޕީޕީއެމްގެ ފަރާތުން ހުސައިން ރިޒާ، އެމްޑީޕީގެ ފަރާތުން އިބްރާހިމް ޝާޒް އަދި އެމްއެންޕީގެ ފަރާތުން އަލީ އާރިފްއެވެ.
މި ދާއިރާގެ ރަށްތައް ކަމަށްވާ ގުރައިދޫއާއި މާފުއްޓާއި ގުޅީގެ އިތުރުން މާލޭގައި ވޯޓް ފޮށި ބަހައްޓާފައި ވެއެވެ. އެގޮތުން މާފުށީގައި 3 ވޯޓް ފޮށި ބެހެއްޓިފައިވާއިރު ގުރައިދޫގައި 2 ވޯޓް ފޮށި އަދި މާލެއާއި ގުޅީގައި 1 ވޯޓް ފޮށި ބެހެއްޓިފައިވެއެވެ.
ކ. ގުޅި އަދި މާފުށީގައި ވޯޓްފޮށި ބެހައްޓާފއިވަނީ އެ ރަށު ސްކޫލްގައެވެ. ކ. ގުރައިދޫގައި އެރަށު ކައުންސިލް އިދާރާގެ މީޓިންގ ރޫމްގައި އެއް ވޯޓްފޮށި ބެހެއްޓިފައިވާއިރު އަނެއް ވޯޓްފޮށި ބަހައްޓާފައިވަނީ އެ ރަށު ޔޫތް ސެންޓަރުގައެވެ. މާލޭގައި ވޯޓް ފޮށީ ބަހައްޓާފައިވަނީ ޢިއްޒުއްދީން ސްކޫލްގައެވެ.
ގުރައިދޫ ދާއިރާގެ ބައި-އިލެކްޝަނަށް ވޯޓް ލުމުގެ ހައްގު ލިބިގެންވަނީ ޖުމްލަ 3423 މީހުންނަށެވެ.
މި ދާއިރާގެ ގޮނޑި ހުސްވެފައިވަނީ ކުރިން އެ މަގާމު ފުރުއްވަމުންދިޔަ ޕީޕީއެމްގެ މެންބަރު އިބްރާހީމް ރިޒާ އަވަހާރާވުމާއި ގުޅިގެންނެވެ.
Advertisement
This content is created and paid for by advertisers and does not involve Voice Journalists
