ތ. ކަނޑޫދޫ މިރުސް ބާޒާރުގައި ގިނަވެ، ނުވިކިގެން އުކާލަން ފަށައިފިއެވެ.

ރޯދަމަސް ފެށުނު އިރު ކިލޯއެއް 250 އަށް، 300 ރުފިޔާއަށް ވިއްކި ކަނޑޫދޫ މިރުހުގެ އަގު ދަށްވަމުންގޮސް މިހާރު މިރުސް ކިލޯއެއް ވިއްކަނީ 80-90 ރުފިޔާއަށެވެ.

ކަނޑޫދޫ މިރުސް ވިއްކާ ފަރާތެއް ކަމުގައިވާ މުހައްމަދު އާރިފް "ވޮއިސް" އަށް މައުލޫމާތު ދެމުން ބުނީ، މިރުސް އުކާލަން ޖެހެނީ މިރުސް ލިބޭ މިންވަރު ގިނަވެފައި ވިކޭ މިންވަރު މަދުވުމުން ކަމަށެވެ.

ކަނޑޫދޫއިން މާލެއަށް ބޯޓު އަންނަ ކޮންމެ ފަހަރަކު 500 ކިލޯ، 600 ކިލޯ، ނުވަތަ 800 ކިލޯއިން މިރުސް ގެންނަގަން ފާހަގަކޮށް އާރިފް ބުނީ ހަފްތާއަކު ޓަނެއްހާ މިރުސް ލިބޭ ކަމަށެވެ.

މިދިޔަ ދެހަފްތާ ތެރޭގައި 2000 ކިލޯ، 3000 ކިލޯ މިރުސް ލިބުނު ކަމަށް އާރިފް ބުންޏެވެ. ނަމަވެސް މި ރޯދަމަހު މިރުހުގެ ވިޔަފާރި ވަރަށް ބޮޑަށް ދަށްވި ސީދާ ސަބަބެއް ނޭނގޭ ކަމަށް އާރިފް ބުންޏެވެ.

"ދެން އަނެއްކޮޅުން ވާގޮތަކީ ލ މިރުސް ފުދޭވަރަކަށް ގިނައިން ރާއްޖެތެރެއަށް ގެންދޭ. ސީދާ ޑައިރެކްޓްކޮށް ލާމުން. އެހެންވެގެންދޯ ބޮޑަށް" އާރިފް ބުންޏެވެ.

މީގެ އިތުރުން އާރިފް ބުނީ ރޯދަމަހުގެ ކުރިއަށް އޮތް ދުވަސްތަކުގައިވެސް މިރުހުގެ އަގު މަތިވާނެ ކަމަށް ނުބެލެވޭ ކަމަށާއި އަދިވެސް އަގު ދަށްވާނެ ކަމަށް ލަފާކުރެވޭ ކަމަށެވެ.

ހަފްތާއަކު ތިން ދުވަހު މިރުސް ޝިޕްމަންޓް އަންނަ ކަނޑޫދޫގައި މިރުސް ހައްދާ މީހުން ގިނަވުމަކީ ބާޒާރަށް މިރުސް ނެރޭ މިންވަރު ގިނަވާ ސަބަބެއް ކަމަށް އާރިފް ފާހަގަ ކުރިއެވެ. އަދި މިރުސް ގަންނަ މީހުން މަދުވުމުން މިރުސް ހަލާކުވަނީ ކަމަށާއި އާ ޝިޕްމަންޓް އައުމުން ކުރީގެ މިރުސް އުކާލަން ޖެހެނީ ކަމަށް އާރިފް ބުންޏެވެ.

"ވަރަށް ގިނައިން ބާޒާރުން މިރުސް އުކައިފިން. މިދިޔަ ދެ ހަފްތާގެ ތެރޭގައި ގާތްގަނޑަށް ބައި ޓަނެއްހާ މިރުސް އުކާފަ ހުންނާނެ" އާރިފް ބުންޏެވެ.