2018 ވަނަ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގަންނަވަން އެކުލަވައިލެއްވި މެނިފެސްޓޯ އާއި އެމަނިކުފާނުގެ ޢަމަލުފުޅާއި ދިމާނުވާ ކަމަށް އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވިދާޅުވެއްޖެއެވެ.
އަމްރު އަށް އަމާޒުކޮށް އެމްޑީޕީ އަކީ ވަކި މީހެއް ނޫން ކަމަށް އޮންލައިން ނޫހަކުން ލިޔެފައިވާ އާޓިކަލް އަކަށް ރައްދު ދެއްވައި އޭނާ ކުރެއްވި ޓްވީޓެއްގައި ވިދާޅުވީ، އެމްޑީޕީ އަކީ ފިކުރެއް ކަމަށެވެ. އަދި އެ ފިކުރު ޕާޓީއިން ފޮހެވުމުން އެހެން ޕާޓީތަކާ އެމްޑީޕީ އަކާ ތަފާތެއް ނެތް ކަމަށްވެސް އޭނާ ވިދާޅުވި އެވެ.
"އެއީ (އެމްޑީޕީ އަކީ) ފިކުރެއް. ރާއްޖެ ބަދަލުކުރަން ބޭނުންވި ފިކުރެއް. އެ ފިކުރު ޕާޓީއިން ފޮހެވުމުން އެހެން ޕާޓީތަކާ އެމްޑީޕީ އަކާ ތަފާތެއް ނެތް. ޕާޓީގަ ފިކުރު ދިރެންޖެހޭ!" އަމްރު ވިދާޅުވި އެވެ.
މިއާއެކު އަމްރު ވިދާޅުވީ، މެނިފެސްޓޯ ހެދީ ވަރަށް ގިނަ ރައްޔިތުންގެ ޚިޔާލު ހޯދައިގެން އެ ފާސްކުރީ ޤައުމީ މަޖިލިހުން ކަމަށެވެ. އަދި ޤައުމީ މަޖިލީހަށް މެނިފެސްޓޯ ހުށަހެޅީ އޭނާ ކަމަށާ، އެއަށްފަހު ކޮންގްރެސްއަށް ހުށަހެޅީވެސް އޭނާ ކަން އަމްރު ފާހަގަކުރެއްވިއެވެ.
"އެޔާ (މެނިފެސްޓޯ އާއި) އަމަލާ ދިމާނުވާ ވާހަކަ މި ދައްކަނީ." އަމްރު ވިދާޅުވި އެވެ.
އެމްޑީޕީގެ އެތެރޭގެ ހަމަނުޖެހުންތައް އިތުރުވެ ޕާޓީ ދެބައިވެފައިވާއިރު، އަމްރު އަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފިކުރެއްގެ ދިރުން ފެކްޝަނުގެ ހަރަކާތްތެރި މެންބަރެކެވެ. އެސްޓީއޯގެ އެމްޑީ ކަމުގެ މަގާމުގައި ހުންނެވިއިރު ސަރުކާރުގެ ސިޔާސަތު ތަކަށް ފާޑުވިދާޅުނުވިނަމަވެސް، މަގާމުން ވަކިކުރުމާއި އެކު އޭނާ އަންނަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
