އިންޑިޔާގެ ސްކޫލްތަކުގައި ކިޔަވައިދޭ ޓެކްސްޓް ފޮތްތަކުން އެޤައުމުގެ ތާރީޚާއި ގުޅިފައިވާ މުސްލިމުންގެ ވާހަކަތައް އުނިކުރުމުގެ މަސައްކަތް ފަށައިފިއެވެ.

އެގޮތުން އެއްޒަމާނެއްގައި އިންޑިޔާގައި ވެރިކަން ކުރި މުގަލް އެމްޕަރާގެ ވާހަކަތަކާއި، އިންޑިޔާގެ ތާރީޚާއި ގުޅިފައިވާ މުސްލިމުންގެ ނަންތަކާއި އެމީހުންގެ ހޯދައިފައިވާ ކުރިއެރުންތަކާއި، ތާޖްމަހަލް ފަދަ ބިނާތައް ބިނާކުރުމުގެ ވާހަކަތައް އުނިކޮށްފައިވާ ކަމަށް އަލްޖަޒީރާއިން ބުނެފައިވެއެވެ.

މީގެ އިތުރުން 2002 ވަނަ އަހަރު ހިންދޫން މުސްލިމުންނާއި ދެކޮޅަށް ހިންގި އަނިޔާވެރި ޢަމަލުތަކުގެ ވާހަކަތައްވެސް ވަނީ އުނިކޮށްފައެވެ.

އިނގިރޭސިންގެ އަތުން އިންޑިޔާ މިނިވަންކުރުމަށް އެތައް މަސައްކަތްތަކެއް ކުރި މަހާތްމާ ގާންދީ އާ ގުޅޭ ތަރީޚީ ވާހަކަތަކާއި ގާންދީ އިންޑިޔާ މިނިވަން ކުރުމަށް ކުރި މަސައްކަތް ތައްވެސް ވަނީ އުނިކޮށްފައެވެ. މީގެ އިތުރުން ޑާވިންގެ ތިޔަރީގެ ވާހަކަތައް ވެސް ވަނީ އުނިކޮށްފައެވެ.

ހިންދީ ބަހުގެ ލެކްޗަރާއެއް ކަމަށްވާ އަޕޫރްވާނަންދު އަލްޖަޒީރާއާއި ވާހަކަ ދައްކަމުން ބުނެފައިވަނީ މި މަސައްކަތަކީ އިންޑިޔާ ހިންދޫންގެ ޤައުމަކަށް ހެދުމުގެ މަސައްކަތް ކަމަށެވެ. އަދި ހިންދޫންގެ ދިރިއުޅުމުގެ ވައްޓާފާޅި އިންޑިޔާގެ ދިރިއުޅުމުގެ ވައްޓަފާޅިއަކަށް ހެދުމުގެ މަސައްކަތް ކަމަށެވެ.

މިކަން ކުރުމަށްޓަކައި ކުރަންޖެހޭނެ ކަމަކީ އިންޑިޔާގެ އެއްޗެކޭ ބުނާ ހުރިހާ އެއްޗެއް ހިންދޫ އެއްޗަކަށް ހެދުން ކަމަށެވެ. އެހެންވީމަ އިންޑިޔާގެ ތާރީޚޭ ބުނުމުން ސިފަވާން ޖެހޭނީ ހިންދޫންގެ ތާރީޚު ކަމަށް އޭނާ ބުންޏެވެ.

އަޕޫރްވާނަންދު ބުނެފައިވަނީ މިހާރު ސަރުކާރުން މިކުރާ ކަމަކީ ޢަމަލީގޮތުން އިންޑީޔާއިން ފެންނަ މަންޒަރާއި ލިޔެވިފައި އޮތް އެއްޗަކާއި އެއްގޮތް ކުރުމުގެ މަސައްކަތް ކަމަށެވެ. އެގޮތުން ކުރިން މަގުތަކަށް ދީފައިވާ ނަންތައް ބަދަލުކުރުމާއި މިސްކިތްތައް ތަޅާލުން ފަދަ ކަންކަން އޭނާ ފާހަގަ ކުރިއެވެ.

ޓެކްސްޓް ފޮތްތަކަށް ގެނައުމަށް ހަމަޖެހިފައިވާ ބަދަލުތަކާއި ގުޅޭ ގޮތުން ލަފާ ދީފައިވަނީ އިންޑިޔާގެ ސަރުކާރުގެ ދަށުން ހިންގާ ނެޝަނަލް ކައުންސިލް އޮފް އެޑިޔުކޭޝަނަލް ރިސާރޗް އެންޑް ޓްރެއިނިންގް އިންނެވެ.

އަދި މިކަމުގެ އަސަރު 24،000 ސްކޫލެއްގެ އެތައް މިލިއަން ކުއްޖަކަށް ކުރާނެ ކަމަށް އަލްޖަޒީރާގައި ބުނެފައިވެއެވެ. ނަމަވެސް އެންސީއީއާރްޓީ އިން ބުނެފައިވަނީ މިބަދަލުގެ ސަބަބުން ޓެކްސްޓް ފޮތްތައް ރޭޝަނަލައިޒް ވެގެން ދާނެ ކަމަށެވެ. އަދި ޕެންޑަމިކް ގެ ސަބަބުން ދަރިވަރުންނަށް ދިމާވެފައިވާ ބުރަކަން ލުއި ވެގެން ދާނެ ކަމަށެވެ.

އިންޑިޔާގެ ސަރުކާރަށް ފާޑުކިޔާ ފަރާތްތަކުން ބުނެފައިވަނީ މިއީ ބީޖޭޕީ އިން ކުޅެމުންދާ ސިޔާސީ ކުޅިވަރުގެ ހަރަކާތެއް ކަމަށެވެ. އަދި އިންޑިޔާއަކީ ސެކިޔުލާ ޤައުމަކަށް ހެދުމަށް އެޕާޓީއިން ކުރަމުންދާ މަސައްކަތް ކަމަށެވެ.

ބީޖޭޕީގެ ސަރުކާރުގައި އިންޑިޔާގެ އެތައް މިސްކިތަކާއި، މުސްލިމުންގެ ގެދޮރު ތަޅައި ސުންނާފަތި ކޮށްފައިވެއެވެ.