55 މިލިއަން ރުފިޔާ ދެ އަހަރު ބައި ވެރިކަން ކޮށްފައިވާ ފަރާތަކަށް ޚަރަދުކުރުމަކީ ދައުލަތުގެ ބަޖެޓަށް ކުޅަދާނަ ކަމަކަށް ނުވާނެކަމަށް މަޖިލީހުގެ ހެންވޭރު އުތުރު ދާއިރާގެ މެމްބަރު ހުސެއިން ޝަމީމު (އަނދުން ހުސެއިން) ވިދާޅުވެއްޖެ އެވެ.
ޝަމީމު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.
ޝަމީމުގެ ވާހަކަފުޅު ފައްޓަވަމުން ވިދާޅޫވީ ދިވެހިރާއްޖޭގެ ސަރުކާރުގެ ބަޖެޓަކީ ކޮކާކޯލާ ކުންފުނީގެ އެޑްވަޓައިސިން ކުންފުނީގެ ބަޖެޓަށްވުރެ ވެސް ކުޑަ ބަޖެޓަށް ކަމަށެވެ.
އެހެންކަމުން މިފަދަ ކުޑަ ބަޖެޓަކުން ރައްޔިތުންނަށް ބޭނުންޖެހިފައިވާ ކަންތައްތަކެއް ފުއްދުމަށް މަސައްކަތް ކުރާ ހާލަތުގައި ދައުލަތުން ބަލަން ޖެހޭ ފަރާތަކަށް ޚަރަދުކުރާއިރު އިސްރާފު ނުވާނެހެން ޚަރަދުތައް ކުޑަ ކުރުމަކީ ކޮންމެހެން ކުރަން ޖެހޭ ކަމެއްކަން އޭނާ ފާހަގަކުރެއްވި އެވެ.
މަޖިލީހުގެ ރައީސް މުޙައްމަދު ނަޝީދުގެ ނަންފުޅު ވިދާޅުނުވެ ޝަމީމު ވިދާޅުވީ މިހާރުވެސް ދައުލަތުން ވަކި ބޭފުޅަކަށް ރާއްޖޭގެ ކޮންމެ ރައްޔިތެއްގެ ބޮލަކަށް 80 ރުފިޔާގެ މަގުން ޚަރަދުކުރަމުންދާ ކަމަށެވެ. އަދި އެގޮތަށް ވަކި ބޭފުޅަކަށް ޚަރަދުކުރުމަކީ ސަރުކާރުގެ ކުޑަ ބަޖެޓަށް ކެތްވާނެވަރުގެ ކަމަކަށް ނުވާނެކަމަށް ޝަމީމު ވިދާޅުވި އެވެ.
ޝަމީމުގެ އެ ވާހަކަތަކާއި ގުޅިގެން ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ވަނީ ނިޒާމީ ނުގުތާއެއް ނަންގަވާ ރަޝީދުގެ ސެކިއުރިޓީއާއި ގުޅުވާ އެފަދަ މޭރުމުން މަޖިލީހުގައި ވާހަކަ ނުދެއްކޭނެކަމަށް ވިދާޅުވެފަ އެވެ. އަދި ނަޝީދަށް ކުރާ ޚަރަދުގެ ވާހަކަ ދައްކަނީ ސަރުކާރުގެ އިނާޔަތްތައް ކުޑަކޮށް އަނެއްކާވެސް ނަޝީދަށް ޙަމަލާއެއް ދެވޭނެ ފަދަ ހާލަތު އުފަންކުރުމަށްކަމަށް ބޮންޑާ ތުހުމަތު ކުރެއްވި އެވެ.
ބޮންޑާގެ އެ ވާހަކަތަކަށްފަހު ޝަމީމު ވިދާޅުވީ އޭނާ އެ އިޝާރާތްކުރެއްވީ ނަޝީދުގެ ސެކިއުރިޓީއަށް ކުރާ ޚަރަދުތަކަށް ނޫން ކަމަށެވެ. އެހެން ނަމަވެސް ދައުލަތުން ޖުމްލަކޮށް ނަޝީދަށް ކުރާ ބޮޑު ޚަރަދަށް ކަމަށެވެ.
އެގޮތުން މި ސަރުކާރުން ނަޝީދަށް އެކަނި 55 މިލިއަން ރުފިޔާ ޚަރަދުކުރައްވާ ކަމަށާއި، އެއީ ދައުލަތުގެ މާލިއްޔަތަށް ކެތްވާނެ ވަރުގެ ކަމެއް ނޫންކަމަށް ޝަމީމު ވިދާޅުވި އެވެ. އަދި އެ ޚަރަދުތަކަކީ ރީ-ސްޓްރަކްޗާކުރަން ޖެހޭ ޚަރަދުތަކެއް ކަމަށް ޝަމީމު ވިދާޅުވި އެވެ.
"މީ ކުޑަ ކުޑަ ގައުމެއް. ވަރަށް ކުޑަ ބަޖެޓެއްގެ ގައުމެއް. 55 މިލިއަން ރުފިޔާ ރާއްޖޭގެ ވެރިކަމުގައި ދެ އަހަރާއި ބައި ވެރިކަން ކުރައްވާފައި ފައިބައި ހުންނެވި ބޭފުޅެއްގެ އިސްތަށިފުޅަށް ޚަރަދުކުރެވިގެން ދިއުމަކީ މިއީ އަޅުގަނޑުމެން ފަދަ ކުޑަ ބަޖެޓެއް އޮންނަ ގައުމަކަށް އެކަށީގެންވާ ކަމެއް ނޫން. މީ ރީސްޓްރަކްޗާކުރަން ވިސްނަން ޖެހޭ ކަމެއް"
ހެންވޭރު އުތުރު ދާއިރާގެ މެމްބަރު ހުސެއިން ޝަމީމު (އަނދުން ހުސެއިން)
ނަޝީދަށް ކުރާ ބޮޑު ޚަރަދުގެ ވާހަކަ ދައްކަވަން ފެއްޓެވުމާއި ގުޅިގެން ރައްޔިތުންގެ މަޖިލީހުގައި އެވަގުތު ތިއްބެވި ނަޝީދަށް ތާއީދު ކުރައްވާ އެމްޑީޕީގެ މަޖިލިސް މެމްބަރުން ވަނީ ނިޒާމީ ނުގުތާ ނަންގަވާ ޝަމީމުގެ ވާހަކައަށް ހުރަސްއަޅުއްވާފަ އެވެ. އަދި މަޖިލީހުގައި ނަޝީދަށް ދައުލަތުން ކުރާ ޚަރަދުގެ ވާހަކަތައް ނުދެއްކޭނެކަމަށް އެ މެމްބަރުން ތަކުރާރުކޮށް ވިދާޅުވަމުން ގެންދެވި އެވެ.
އެހެން ނަމަވެސް ޝަމީމު ވިދާޅުވީ ދެ އަހރު ބައި ވެރިކަން ކުރި ފަރާތަކަށް ދައުލަތުން 55 މިލިއަން ޚަރަދު ކުރުމަކީ ބޮޑުވަރެއް ކަމަށެވެ. އެއީ އިސްރާފެއް ކަމަށާއި، އެ އިސްރާފު ކުޑަކުރަން ޖެހޭކަމަށް އޭނާ ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
