ކޮވިޑް ޖެހިގެން 1 އަހަރު ނުފުރޭ 6 ތުއްތު ކުދިން އެޑްމިޓް ކޮށްގެން ފަރުވާދެމުންދާ ކަމަށް އައިޖީއެމްއެޗްގެ ކުޑަކުދިންގެ ހާއްސަ ޑޮކްޓަރ އަޙްމަދު ފައިޞަލް މިއަދު ވިދާޅުވެއްޖެއެވެ.

އެގޮތުން ޑރ. ފައިޞަލް މިއަދު ކުރި ޓްވީޓެއްގައި ވިދާޅުވެފައިވަނީ ކޮވިޑްޖެހިގެން މި ވަގުތު އެންދުމަތިކޮށްފައިތިބި 1 އަހަރުނުވާ 6 ތުއްތު ކުދިންގެ ތެރެއިން ބައެއް ކުދިން އެނދުމަތިކޮށްފައިވަނީ ކޮވިޑް ހުމާއިއެކު ފިޓުޖެހިގެން ކަމަށެވެ.

މިއާއިއެކު ޑރ. ފައިޞަލް ވަނީ ގޭގައި ހާއްސަކޮށް 1 އަހަރު ނުވާ ކުޑަކުދިން ތިބި ނަމަ އެ ކުއްޖާގެ ރައްކަލަކަށް ގޭގެ އެންމެންވެސް ކޮވިޑުން ރައްކާތެރިވުމަށް ފިޔަވަޅުތައް އެޅުއްވުމަށް އިލްތިމާސް ކޮށްފައެވެ.

ޑރ. ފައިޞަލް މިހެން ވިދާޅުވެފައިވަނީ އަނެއްކާވެސް ކޮވިޑް އަށް ފައްސި ވަމުންދާ ފަރާތްތައް އިތުރު ވަމުންދާ ދަނޑިވަޅެއްގައެވެ. އެގޮތުން އެޗްޕީއޭއިން 17 އޭޕްރީލްގައި އާންމު ކުރި ތަފާސްހިސާބުތަކުން ދައްކާ ގޮތުން 148 ފަރާތެއް ޕޮޒިޓިވް ވެފައިވާއިރު މީގެ ތެރެއިން 100 މީހުން ޕޮޒިޓިވް ވެފައިވަނީ މާލެ ސަރަހައްދުންނެވެ.

މިކަމުގެ ސަބަބުން ސިއްހަތާއި ގުޅުންހުރި އިދާރާތަކުން އަންނަނީ ބަލިތަކުން ރައްކާތެރިވުމަށް އެޅެންހުރި ފިޔަވަޅުތައް އެޅުމަށް ސަމާލުކަން ދިނުމަށް އާންމުންނަށް ތަކުރާރުކޮށް އިލްތިމާސް ކުރަމުންނެެވެ.