ރަމަޟާން މަހާ ދިމާކޮށް ޚިދުމަތް ޖަމިއްޔާއިން ކުރިއަށް ގެންދިޔަ "އުފަލާއިއެކު" އިފްތާރު ކެމްޕެއިންގެ ދަށުން 2 ލައްކައަށްވުުރެ ގިނަ ރޯދަވިއްލާ ޕެކޭޖް ހަދިޔާކޮށްފިއެވެ.

މި ކެމްޕޭންގެ ދަށުން ހަތަރު ގައުގެއްގައި ރޯދަވިއްލުމުގެ އިންތިޒާމުތައް ހަމަޖައްސައިދެވުނު އިރު އޭގެ ތެރެއިން ބަންގްލަދޭޝް އަދި ރޮހިނގްޔާކޭމްޕްތަކަށް ޚިދުމަތް ޖަމްޢިއްޔާގެ ޓީމެއް ވަނީ ޒިޔާރަތްކޮށް އަމަލީގޮތުން މިކަމުގައި ބައިވެރިވެފައެވެ.

އަދި ޕާކިސްތާނާއި އަފްޣާނިސްތާންގައި ޑްރޮޕް އޮފް ކޮމްޕޭޝަން އޮގަނައިޒޭޝަން ފަދަ އިންޓަނޭޝަނަލް ޖަމްޢިއްޔާތަކާއި ގުޅިގެން އެހީފޯރުކޮށްދިނުމުގެ މަސައްކަތް ވަނީ ކުރިއަށް ގެންގޮސްފައެވެ.

ޚިދުމަތް ޖަމިްޢިއްޔާގެ ރައީސް މުހައަމްދު ސަމީހު މި ނޫހަށް މަޢުލޫމާތު ދިން ގޮތުގައި ޕެކޭޖްތަށް ބެހިފައިވަނީ ދިރިއުޅުމުގެ އަސާސީ ވަޞީލަތްތަށް މަދު ވަރަށް ފަގީރު ސަރަހައްދުތަަކަކަށެވެ.

އަދި ދިވެހި އަޚުންނާއި އުޚްތުންގެ ދީލަތި އެހީގެ ސަބަބުން މިރަމަޟާންމަހު އެނިކަމެތި ފަގީރުން ހިތްހަމަ ޖެހުމާއި އުފާވެރިކަން ގެނުވި ކަމަށާއި އެ ނިކަމެތިންގެ އިޚްލާސްތެރި ދުޢާ ވަނީ އެންމެހައި ދިވެހި ރައްޔިތުންނާއި އެކުގައި ކަމަށް ސަމީހު ވިދާޅުވިއެވެ.

އިފްތާރުގެ އެހީ މި ރޯދަމަހަށް ކުރި ޓާގެޓް ހަމަވުމާއިއެކު މިކެމްޕެއިންގައި އިތުރަށް އެހީނެގުންވަނީ ހުއްޓާލައިފައެވެ.

ސަމީހު ވިދާޅުވި ގޮތުގައި މިހާތަނަށް ލިބިފައވާ ފައިސާއިން 6 ރޯދައިގެ ނިޔަލަށް އެހީ ކުރިއަށް ގެންދެވޭނެއެވެ.

''އުފަލާއިއެކު'' އިފްތާރު ކެމްޕެއިން ނިމުނު ކަމުކަމުގައިވީ ނަމަވެސް އާންމު ސަދަގާތްތަކަށް އެޖަމްޢިއްޔާއިންވަނީ ''މަދަދު'' ގެ ނަމުގައި ޕްރޮގްމާމްއެއް ފަށާފައެވެ. އަދި މަދަދުގެ އެހީ މެދުކެނޑުމެއް ނެތި ކުރިއަށްދާނެ ކަމަށް ޚިދުމަތް ޖަމްޢިއްޔާއިން ހާމަކުރިއެވެ. މަދަދު’ ޕްރޮގްރާމްގައި އެހީތެރިކަން ފޯރުކޮށްދެވޭނޭ ކަންތައްތަކުގެ ތެރޭގައި:

● ދުނިޔޭގެ އެކި ކަންކޮޅުތަކުގައި ދިރިއުޅެމުންދާ ޔަތީމުންނަށާއި ފަގީރުންނަށް ކާބޯތަކެތި އަދި އަސާސީ ޚިދުމަތްތައް ފޯރުކޮށްދިނުން

● ނުކުޅެދުންތެރިކަން ހުންނަ ފަރާތްތަކަށް އެހީތެރިވުން

● މިސްކިތްތައް މަރާމާތު ކުރުމަށް އެހީތެރިކަން ފޯރުކޮށްދިނުން

● ރެފިއުޖީ ކޭމްޕްތަކުގައި ބޯހިޔާވެހިކަން ދަތިވެފައިވާ ފަރާތްތަކަށް އެކަމަށް މަގުފަހިކޮށްދިނުން

● ބޯފެނަށް ދަތިވެފައިވާ ފަރާތްތަކަށް ދާއިމީ ގޮތެއްގައި ބޯފެން ލިބޭނެ އިންތިޒާމު ޤާއިމު ކޮށްދިނުން

● ތައުލީމަށް ދަތިވެފައިވާ ހިސާބުތަކުގައި އެކަމުގެ ނިޒާމެއް ޤާއިމް ކޮށްދިނުން ހިމެނެއެވެ.

އެ ޖަމިއްޔާއިން ބުނީ، އެ ޖަމިއްޔާގެ އަމާޒަކީ މިފަދަ ހާލުގައި ޖެހިފައިވާ ފަގީރުންނާއި މިސްކީނުންގެ ދިރިއުޅުމަށް ކުޑަ ނަމަވެސް އެހީތެރިކަމެއް ފޯރުކޮށްދީ އެމީހުންގެ ދިރިއުޅުމަށް ހެޔޮބަދަލުތަކެއް ގެނައުން ކަމަށެވެ.

''މަދަދު'' ޕްރޮގްރާމްގައި ބައިވެރިވުމަށް ތިރީގައި މިވާ އެކައުންޓް ނަމްބަރު ޚިޔާރުކުަރައްވާށެވެ!

ބޭންކްގެ ނަން : ބީއެމްއެލް އިސްލާމިކް

އެކައުންޓްގެ ނަން : ޚިދުމަތް

އެކައުންޓް ނަމްބަރު (ރުފިޔާ):  7770000129941

އެކައުންޓް ނަމްބަރު (ޑޮލަރު) : 7770000129942

އިތުރު މައުލޫމާތު ހޯއްދެވުމަށް ޚިދުމަތް ޖަމިއްޔާގެ 7353339 ނަމްބަރަށް ގުޅުއްވުމުން ލިިބިގެންދާނެއެވެ.