ރާއްޖެއަށް މި އަހަރުގެ ފިތުރު އީދު ދުވަހަކީ މާދަމާކަން އިސްލާމިކް މިނިސްޓްރީން އިއުލާނު ކޮށްފިއެވެ.
1444 ވަނަ އަހަރުގެ ޝައްވާލު މަހުގެ ހަނދު ސާބިތު ކުރުމަށް މިރޭ ބޭއްވި ޖަލްސާގައި ވާހަކަ ދައްކަވަމުން އިސްލާމިކް މިނިސްޓަރު ޑރ. އަހުމަދު ޒާހިރު ޢަލީ ވަނީ، މިއަހަރުގެ ފިތުރު ޢީދު ދުވަހަކީ މާދަމާ, 21 އޭޕްރިލް 2023 ވާ ހުކުރު ދުވަސް ކަމުގައި ކަނޑައަޅައިފައިވާ ކަން އިޢުލާން ކުރައްވާފައެވެ.
އެގޮތުން މިނިސްޓަރު ވިދާޅުވީ، ރާއްޖެ އާއި ރާއްޖެ ކައިރީ ހިސާބުތަކަށް، މިއަދު, 20 އޭޕްރިލް 2023 ވަނަ ދުވަހުގެ އިރުއޮއްސޭއިރު، 1444 ވަނަ އަހަރުގެ ޝައްވާލު މަހުގެ ހަނދު، ފެންމަތީގައި ހުންނާނެ ކަމަށް އިތުބާރު ހުރި ފަލަކީ ހިސާބުން ދައްކާ ކަމަށެވެ.
އަދި މީގެ އިތުރުން، ބައެއް އިސްލާމީ ގައުމުތަކަށް، މިއަދު އިރުއޮއްސުމަށްފަހުގައި 1444 ވަނަ އަހަރުގެ ޝައްވާލު މަހުގެ ހަނދު ފެނިފައިވާ ކަމަށް ރަސްމީގޮތުން މައުލޫމާތު ލިބިފައިވާތީ ރަމަޟާން މަހާއި ޝައްވާލު މަހުގެ ހަނދު ސާބިތު ކުރުމަށް ރާއްޖެއިން ގެންގުޅޭ އުސޫލުގެ ދަށުން، މާދަމާ، 21 އޭޕްރިލް 2023 އަކީ މި އަހަރުގެ ފިތުރު ޢީދު ކަމުގައި ކަނޑައެޅިފައިވާ ކަމަށް މިނިސްޓަރް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
