ނިމިގެން މިދިޔައީ ބަރަކާތްތެރި ވެގެންވާ ރަމަޟާން މަހެވެ. ރަމަޟާން މަހަށްފަހު އަހަރެމެންނާއި ބައްދަލު ކޮށްފައި މިވަނީވެސް އަޅުކަމުގެ މަހެކެވެ. އާދެ ޝައްވާލު މަހެވެ. ޝައްވާލު މަހަކީ ޙައްޖުގެ (أشهرالحجٍ)މަސްތަކުގެ ތެރެއިންވާ މަހެކެވެ. ޙައްޖުގެ މަސްތަކަކީ ޝައްވާލު، ޛުލްޤައިދާ، ޛުލްޙިއްޖާ މިތިން މަހެވެ. އެއީ މަސްތަކެއްގެ މުހިންމުކަމަށްޓަކައި، އަޅުކަންކުރުމުގައި މުރާލިވުމާއި ރޯދަ ހިފުމުގެ ބޭނުމުގައި، މާތްالله ޚާއްޞަކުރެއްވި މަސްތަކެވެ. 

ރަމަޟާން މަސް ނިމުމަށްފަހު ޝައްވާލު މަހުން 6 ރޯދަ ހިފުމަކީ ހެޔޮޢަމަލުގެ ތިލަފަތް ބަރުކޮށްލަން ލިބިގެންދާ އަގުހުރި ރަނުގެ ފުރުޞަތެކެވެ. ޝައްވާލު މަހުގެ 6 ދުވަހުގެ ރޯދަހިފުމަށް ލޮބުވެތި ނަބިއްޔާ ޞައްލަالله ޢަލައިހި ވަސައްލަމް ވަނީ އުއްމަތަށް އިރުޝާދު ދެއްވާފައެވެ. އޭގެ މާތްކަން ބަޔާން ކުރައްވާފައެވެ. މި ހަ ރޯދަ ހިފުމަށް ބާރުއަޅުއްވާފައިވެއެވެ.

ރަސޫލާ عليه الصلاة والسلام ޙަދީޘްކުރެއްވިއެވެ.

«مَنْ صَامَ رَمَضَانَ ثُمَّ أَتْبَعَهُ سِتًّا مِنْ شَوَّالٍ، كَانَ كَصِيَامِ الدَّهْرِ» [1]

މާނައީ: "ރަމަޟާން މަހު ރޯދަ ހިފާ، ދެން އެއަށްފަހު ޝައްވާލުމަހު ހަ ރޯދަ ހިފައިފިމީހާ ދަންނައެވެ. އޭނާ މުޅި އަހަރު ރޯދަހިފި ފަދައެވެ."

މި ހަދީޘުންވެސް ޝައްވާލުމަހުގެ ހަ ރޯދަ ހިފުމަކީ އިތުރުކަން ބޮޑުވެގެންވާ ގިނަގުނަ ސަވާބު ލިބޭ އަޅުކަމެއް ކަން އެގެއެވެ.

މީގެ އިތުރުން ވެސް، ޝައްވާލު މަހުގެ ހަ ރޯދަ ހިފުމަކީ ސުންނަތް ވެގެންވާ އަޅުކަމެއް ކަމުގައި ވާއިރު، ސުންނަތް އަޅުކަންތައް އަދާކުރުމުން ލިބޭ އަޖުރު އެ ރޯދައިންވެސް ލިބިގެންދާނެ ކަމަށް ޢިލްމުވެރިން ވިދާޅުވެއެވެ.

އެގޮތުން ފަޟުކަންތައް ކުރުމުގައި އުނިވެފައިވާ ކަންތައްތަކުގެ އުނިކަން ފޫބައްދައި ދޭނެ ކަމަށް ޢިލްމުވެރިން ފާހަގަކުރައްވައެވެ. އެހެނީ ޤިޔާމަތް ދުވަހު ނަމާދުގެ ހިސާބު ބެއްލެވޭ ހިނދު ފުރިހަމަ ނުވާ ކަންތައް ފޫބެއްދުމުގެ ގޮތުން މީހާކޮށްފައިވާ ސުންނަތް ކަންތައް ޖަމާކުރެވޭ ހުއްޓެވެ. އަދި އެއިން ކުރީގެ ކަންތަކަށް ސަވާބު ޖަމާކުރެވޭނެކަން ޙަދީޘުން އެގިފައިވެއެވެ.

އަދި ހަމައެހެންމެ، އޭގެ ސަބަބުން އަޅާ އޭނާ ހެއްދެވި ކަލާނގެ އާއި ކުތްތަންވުން އިތުރުވުމާއި އެކަލާނގެ ރުހިވޮޑިގަތުމާއި ލޯބި ހާސިލުވެ، ފަރުޟު ކަންތައް އަދާކުރުމަށް ފަސޭހަވެ މަގުފަހިވުމާއި މެދު ނުކެޑި އެކަމުގައި ދެމިހުރުމުގެ ހިތްވަރު މިފަދަ ސުންނަތް އަޅުކަންތައް އަދާ ކުރުމުން ލިބިގެންދެއެވެ. 

އެހެންކަމުން މި ޚާއްސަ މައްސަރުގެ އަޖުރު ފުރިހަމަ ގޮތުގައި ލިބިގަތުމަށް ހަ ރޯދަ ހިފައި، ގިނަ ގިނައިން ގުރުޢާން ކިޔަވައި، ފަރުޟު ނަމާދުތަކާއި ސުންނަތް ނަމާދުތައްވެސް އަދާކޮށް، ހެޔޮ ޢަމަލުތައް ގިނައިން ކުރުމުގައި ސާބިތުވެ ތިބުމަށް ޢިލްމުވެރިން ނަސޭހަތްތެރިވެއެވެ. 

ޝައްވާލު މަހަކީ އިސްލާމީ ތާރީޚް ގައިވެސް ފާހަގަކޮށްލެވޭ ގިނަ ކަންތައްތަކެއް ހިނގައިފައިވާ މަހެކެވެ.

އޭގެތެރޭގައި، ކީރިތި ރަސޫލާ، ޢައިޝަތުގެފާނާ ކައިވެނި ބައްލަވައިގަތުމާއި، ޢުމައިރު ބިން ވަހުބުކިޔާ މީހަކާއި، ޞަފްވާން ބިން އުމައްޔާ ކިޔާމީހަކުވެގެން އިތުރު އެކަލޭގެފާނުގެ ފުރާނަފުޅަށް ގެއްލުންދޭން ރޭވިގެންދިޔުމާއި، ހިޖްރައިން ތިންވަނަ އަހަރުގެ ޝައްވާލުމަހުގެ ތެރޭގައި، އުޙުދު ހަނގުރާމަ ކުރެވިގެންދިއުން ހިމެނެއެވެ. އުހުދު ހަނގުރާމަ އަކީ ޙަމްޒާ ބިން ޢަބްދުލްމުއްޠަލިބާއި އެނޫންވެސް އެތައް ޞަޙާބީ ބޭކަލުންނެއް ޝަހީދުވެގެންދިޔަ ހަނގުރާމަ އެކެވެ. މީގެ އިތުރުން ޙުނައިނު ހަނގުރާމަވެސް ކުރެވިގެންދިޔައީ ޝައްވާލު މަހެއްގައެވެ. އެއީ ހިޖްރައިން އަށްވަނަ އަހަރުގެ ޝައްވާލު މަހެވެ.