މިހިނގާ އޭޕްރީލް މަހަކީ ރާއްޖެއަށް އެންމެ ހޫނުގަދަ މަސް ކަމަށްވާތީ، ހޫނުން ރައްކާތެރިވެ ތިބުމަށް މެޓް އޮފީހުން އިލްތިމާސްކޮށްފިއެވެ.

މެޓް އޮފީހުން ބުނީ މި ދުވަސްވަރު ވައި މަޑުވުމާއި، އޭގެ ސަބަބުން ވައިގެ ތެއްކަން މަތިކޮށް ހިފެހެއްޓިފައި ހުރުމުން ވައިގެ ހޫނުމިނަށް ވުރެއް އިހުސާސްކުރެވޭ ހޫނުމިން އެތައް ގުނައެއް މަތިވާ ކަމަށެވެ. އަދި މިއީ އިރުވައި މޫސުމުން ހުޅަނގު މޫސުމަށް ބަދަލުވާ ދުވަސްވަރު ކަމަށްވެސް މެޓުން ބުންޏެވެ.

އެގޮތުން ހދ. ހަނިމާދޫއާއި ގދ. ކައްދޫއަށް 32 ޑިގްރީސެލްޝިއެސްއަށް ހޫނިމިން މަތިވާނެ ކަމަށް ލަފާކޮށްފައި ވާއިރު، އެ ދެ ސަރަހައްދަށް 40 ޑިގްރީސެލްޝިއެސްއަށް ފިނިހޫނުމިން އިހުސާސް ކުރެވޭނެކަމަށް މެޓުން ބުންޏެވެ.

އިރުގެ ދޯދިންނާއި ހޫނުން ރައްކާތެރިވެ ތިބުމަށްޓަކައި ކުޑަ ބޭނުން ކުރުމާއި ކުލަ މަޑު، ހަށިގަނޑު ނިވައިވާ ވަރުގެ ދޫ ހެދުމަށް ލުމަށް މެޓުން އިލްތިމާސް ކުރެއެވެ.

އޭގެ އިތުރުން ބޮޑަށް ނިވައިވާފަދަ ފުޅާ ތޮތްޕެއް ބޭނުންކުރުމާއި، ގިނަ ވަގުތު އަވީގައި އުޅޭނަމަ ސަން ލޯޝަން ބޭނުން ކުރުމުގެ އިތުރުން ގިނައިން ފެންބުއިމަށް މެޓުން ވަނީ ހަނދާންކޮށްދީފައެވެ.

ހަމައެޔާއެކު، ގިނައިން ހަކުރު އެކުލެވޭ ބުއިންތައް ނުބޮއުމާއި ޔޫވީ ރޭޑިއޭޝަން ފިލްޓަރ ކޮށްދޭފަދަ އަވި އައިނެއް ބޭނުން ކުރުމަށް ވަނީ އިލްތިމާސް ކޮށްފައެވެ.

ހޫނުގަދަ ވުމުގެ ސަބަބުން ދިމާވެދާނެ ބައެއް ސިއްހީ މައްސަލަތައް:

* ވަރުދެެރަވުން

* އަކުނިވަޔަށް ދެމުން

* ބޮލުގައި ރިއްސާ ބޯ އެނބުރުން

* ހަށިގަނޑުން ފެން މަދުވުމުގެ ސަބަބުން ކުޑަކަމުދެވޭ މިންވަރު މަދުވުން އަދި ކުޑަކަމުދާއިރު ކުލަ ގަދަކޮށް ހުރުން

* ލޮލަށް ލިބޭ ގެއްލުން

* ހަށިގަނޑު އެނދުމުގެ ސަބަބުން ހަށިގަނޑު ރަތްވެ ފޮޅުނެގުން އަދި ކުދި ރަތް ބިހިނެގުން ހިމެނެއެވެ.

މެޓުން ބުނީ ހޫނުގަދަ ގަޑީގައި ތުއްތުކުދިން ބޭރަށް ނުގެންދިއުމަށް އެދޭ ކަމަށާއި އަދި ބޭރަށް ގެންދާނަމަ ރައްކާތެރިކަމުގެ ފިޔަވަޅު އެޅުން މުހިންމު ކަމަށެވެ. އަދި ގާތުން ކިރުދިނުމާއެކު ހަމަސް ވެފައިވާ ކުދިންނަށް ގިނައިން ދިޔާތަކެތި ދިނުމަށް މެޓުން އިލްތިމާސް ކުރެއެވެ.