ހުޅުމާލޭ ފަޅުގައި އަޅާފައި ހުރި ބާ ބޯޓުފަހަރުތައް އޮޔާދާތީ ސަމާލުވާން އާބަންކޯއިން އަންގައިފި އެވެ. 

އެކަން ބޯޓިން އެސޯސިއޭޝަނުން ވަނީ އެ ފަޅުގައި އަޅާފައިވާ އެހެން އުނޅަދުތަކުގެ އޮޑިވެރިންގެ ސަމާލުކަމަށް ގެނެސްފަ އެވެ. 

ބޯޓިންގ އެސޯސިއޭޝަނުން ބުނީ އެއްވެސް މީހަކު ނެތް، ބާ މަސްދޯނި ތަކެއް އޮޔާ ދިއުމަކީ ނުރައްކާތެރި ކަމެއް ކަމަށާއި، ފަޅުތެރޭގައި އޮޔާ ދާ ބޯޓުތަކުގެ ސަބަބުން އެ ސަރަހައްދުގައި އަޅާފައިވާ އެހެން އުޅަނދުތަކަށް ވެސް ނުރައްކާވެދާނެ ކަމަށް ބެލެވޭ ކަމަށެވެ. 

Advertisement

އެ އެސޯސިއޭޝަނުން ވަނީ ހުޅުމާލޭ ފަޅުގައި އަޅާފައިވާ ބާ ބޯޓު ފަހަރުތައް އޮޔާ ދާ މައްސަލަ އާބަންކޯގެ ސަމާލުކަމަށްވެސް ގެނެސްފަ އެވެ. 

ހުޅުމާލެ ފަޅުތެރޭގައި އަޅާފައިވާ ބޯޓުތަކެއްގެ ފައްތިޔާ ކަނޑައިގެން ގޮސް އޮޔާދާތީ ސަމާލުވާން އާބަންކޯއިންވެސް ވަނީ އަންގާފައި އެވެ. އޭގެ އިތުރުން ހުޅުމާލޭ ފަޅުތެރޭގައި މެރިން ޕޮލިހުންވެސް ހަރަކާތްތެރިވަމުން ގެންދިޔަ އެވެ.

އެ ފަޅުގައި ހުރި އޮޑިފަހަރުގެ ތެރެއިން، އޮޔާ ދަމުން ދަނީ މީގެ ކުރިން ރާއްޖޭގެ އިގްތިސޯދީ ސަރަހައްދުން ބޭރުގައި ލޭނު މަސްވެރިކަމުގައި ބޭނުންކުރި ވައްތަރުގެ އޮޑިތަކެކެވެ. އެ ބާވަތުގެ މަސްވެރިކަމުގައި މަސްވެރިކަމަށް ގެއްލުން ހުރި ގިނަ ކަންކަން ހިމެނޭތީ 2019 ވަނަ އަހަރު ސަރުކާރުން ވަނީ ލޭނު މަސްވެރިކަން މުޅިން މަނާ ކޮށްފަ އެވެ.

އޭރުންސުރެ ފެށިގެން އެ އޮޑިތައް ހުންނަނީ ބޭނުން ނުކޮށް ހުޅުމާލޭ ފަޅުތެރޭ އަޅާފަ އެވެ.

ހުޅުމާލޭ ފަޅުތެރޭގައި ގިނަ އަދަދެއްގެ ސަފާރީ ބޯޓުފަހަރުވެސް އަޅާފައި އޮންނައިރު، އޮޔާދާ ބޯޓުތަކުގެ މައްސަލަ ވީ އެންމެ އަވަހަކަށް ހައްލުކޮށްދިނުމަށް ބޯޓިން އެސޯސިއޭޝަނުން ވަނީ އެދިފައެވެ. އަދި އެފަދަ ބޯޓެއްގެ ސަބަބުން ލިބިދާނެ ގެއްލުމަށް ސަމާލުވުމަށް އެ އެސޯސިއޭޝަނުން ވެސް ވަނީ އިލްތިމާސްކޮށްފަ އެވެ.