ދިވެހިރާއްޖޭގެ ދެކުނުން އޮންނަ ފޯޅަވަހީގެ ސިޔާދަތީ ބާރުވެރިކަން ލިބުން އެންމެ ހައްގުކަން ބޮޑީ ދިވެހިންނަށް ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ. 

ނަޝީދު މިފަދައިން ވިދާޅުވެފައިވާ ފޯޅަވަހި މައްސަލައާއި ގުޅިގެން މަޖިލިސް މެމްބަރުންގެ ރަސްމީ ވަޓްސް އަޕް ގުރޫޕަށް ފޮނުއްވި ލިޔުމެއްގަ އެވެ. 

"ފޯއްޅަވަހި: ރާއްޖޭގެ ފަޅުރަށެއް" މި މައުލޫގައި ނަޝީދު ލިޔުއްވާފައިވާ އެ ލިޔުމުގައި ވިދާޅުވެފައިވަނީ ފޯޅަވަހީގެ ސިޔާދަތު ބަޔަކަށް ދޭނަމަ އެންމެ ހައްގުކަން ބޮޑު ބަޔަކީ ދިވެހިން ކަމަށެވެ. 

Advertisement

ރަޝީދު ފޮނުއްވި އެ ލިޔުމުގައި ވަނީ ތާރީހުގައި ހިނގާފައިވާ ކަންކަމަށް އަލިއަޅުވާލައްވާ އަދި ފޯޅަވަހި މައްސަލައިގައި މީގެކުރިން ކުރެވިފައިވާ ބައެއް ދިރާސާތަކަށް ބަލައި މުހިންމު މައުލޫމާތުތަކެއް ހިއްސާކޮށްފަ އެވެ. 

ނަޝީދުގެ އެ ލިޔުމުގައި ފާހަގަކޮށްފައިވާ ގޮތުގައި މޮރިޝަސްގައި ދިރިއުޅެމުންދަނީ ފޯޅަވަހީގެ މީހުންނެއް ނޫނެވެ. ފޯޅަވަހީގައި ބަނޑަހަ ޖަހައިގެން އުޅުނީ ދިވެހި މަސްވެރިން ކަމަށާއި، ޚާއްސަގޮތެއްގައި އެތަނުގައި އުޅުނު ގިނަ މީހުންނަކީ ފުވައްމުލަކަށް ނިސްބަތްވާ މީހުންކަމަށް ނަޝީދުގެ ލިޔުމުގައި ވެއެވެ. 

ނަޝީދު ވިދާޅުވީ ރަށް އުފެދިފައިވާ ގޮތަށް ބަލާލި ނަމަވެސް، އަދި ރަށަށް ދީފައިވާ ނަމާއި ވައްޓަފާޅިއަށް ބަލާލި ނަމަވެސް ފޯޅަވައްސާއި ފުވައްމުލަކާއި އެއްގޮތް ކަންތައްތަކެއް ހުންނަ ކަމަށެވެ. އެ ހުރިހާ ކަމަށް ބެލި ނަމަވެސް ފޯޅަވަހީގެ ސިޔާދަތު ލިބުން އެންމެ އައުލާކަން ބޮޑީ ދިވެހިންނަށްކަން ނަޝީދު ފާހަގަކުރައްވާފައި ވެއެވެ. 

ނަޝީދު ގެންދަވަނީ ފޯޅަވަހި މައްސަލައިގައި ދައުލަތުގެ ސްޓޭންޑް ބަދަލުކުރުމާއި ގުޅިގެން ނުރުހުން ފާޅުކުރައްވަމުން ނެވެ. 

އެ މައްސަލައިގައި ދައުލަތުގެ ސްޓޭންޑް ބަދަލުކޮށްފައިވަނީ މޮރިޝަސްއާއެކު ޑީލެއް ހަދައިގެން ކަމަށް ރައްޔިތުންގެ މަޖިލީހުގެ ބައެއް މެމްބަރުން ބޮޑެތި ތުހުމަތުތަކެއްވެސް ދަނީ ކުރެވެމުން ނެވެ. އެ މައްސަލައިގައި ގޮތް ނިންމުމަށް އަންނަ ހުކުރު ދުވަހު ވަނީ ބައިނަލްއަގްވާމީ ކޯޓުގައި ތާވަލުކޮށްފަ އެވެ.