މާލޭ މަސް މާރުކޭޓު ލޯކަލް މާރުކޭޓް ސަރަހައްދުގައި ޒަމާނީ މާރުކޭޓެއް އަޅަން މާލެ ސިޓީ ކައުންސިލުން ތައްޔާރުވާން ފަށާފައިވާ ކަމަށް މާލޭ މޭޔަރ ޑރ މުޙައްމަދު މުޢިއްޒު ވިދާޅުވެއްޖެއެވެ.
މި މާރުކޭޓް އަޅަން ހަމަޖެހިފައި ވަނީ މިހާރު ލޯކަލް މާރުކޭޓް ހުރި ސަރަހައްދުގައެވެ.
މުޢިއްޒު ވިދާޅުވީ އާ މާރުކޭޓް ތަރައްގީވެގެން އައުމުން މާރުކޭޓު ސަރަހައްދަށް ބޮޑު ލުޔެއް ލިބޭނެ ކަމަށެވެ. އަދި މި ޕްރޮޖެކްޓް ނިމިގެންދާއިރު ދަތުރުވެރިންގެ މާރުކޭޓާއި ލޯކަލް މާރުކޭޓު އަދި މަސްމާރުކޭޓު އެއް އިމާރާތަކަށް އަންނާނެ ކަމަށެވެ.
އާ މާރުކޭޓުގެ މަސައްކަތް ނިމުމުން އެތަނުގެ ޕާކިން މައްސަލަވެސް ހައްލުވާނެ ކަމަށް މޭޔަރު ވިދާޅުވިއެވެ.
"މި އާ މާރުކޭޓުގެ އެތެރޭގައި އަޅުގަނޑުމެން ޕާރކިން ފްލޯއެއްވެސް ހަދާނެ. އެހެންވީމާ މުޅި ސަރަހައްދަށް ވަރަށް ބޮޑު ލުޔެއް އަންނާނެ ކަމެއް މީ ” މޭޔަރު ވިދާޅުވިއެވެ.
މީގެ އިތުރުން މޭޔަރު ވިދާޅުވީ ޒަމާނީ މާރުކޭޓެއް ތަރައްގީ ކުރުމުގެ އިތުރުން މާލޭގެ ތަރައްގީއަށް ވަރަށް ގިނަ ޕްލޭންތައް ހަދަމުންދާ ކަމަށެވެ.
Advertisement
This content is created and paid for by advertisers and does not involve Voice Journalists
