ޤަޠަރާއި ދެކޮޅަށް އިޒްރާއިލަށް ޖާސޫސް ކޮށްދިން ކަމުގެ ތުހުމަތު އިންޑިޔާގެ ކުރީގެ 8 ނޭވީ އޮފިސަރެއްގެ މައްޗަށް ކޮށްފިއެވެ.

މި 8 މީހުންގެ މައްޗަށް މި ކަމުގެ ތުހުމަތުތައް ކުރެވި، މިހާރު އަންނަނީ މައްސަލައާއި ގުޅިގެން އަޑު އެހުންތައް ކުރިއަށް ގެންދަމުންމެވެ.

އެމީހުންގެ މައްޗަށް ތުހުމަތު ކުރެވިފައިވަނީ ޤަޠަރުން ހިންގަމުން ގެންދާ ހައި ޓެކް ސަބްމެރިން އަކާއި ގުޅޭ މައުލޫމާތު އެއްކުރުމުގެ ތުހުމަތެވެ. އެސަބްމެރިންނަކީ އިޓަލީގައި އުފައްދާފައިވާ ސަބްމެރިންނެކެވެ. އިންޑިޔާގެ އެ 8 މީހުންނަކީ ޤަޠަރުގެ ދަހްރާ ގްލޯބަލް ޓެކްނޮލޮޖީސް އެންޑް ކޮންސަލްޓަންސީ ނަމަކަށް ކިޔާ ކުންފުންޏެއްގައި މަސައްކަތް ކުރާ ބައެކެވެ. އަދި އެކުންފުންޏަކީ ޤަޠަރުގެ ޑިފެންސް އާއި އެހެނިހެން އޮތޯރިޓީ ތަކުގެ ލޯކަލް ބިޒްނަސް ޕާޓްނަރު ކަމުގައި މީޑިއާ ގައި ބުނެފައިވެއެެވެ.

މި 8 މީހުން ހައްޔަރު ކޮށްފައިވަނީ 2022 ވަނަ އަހަރުގެ އޮގަސްޓް މަހު ގެ ތެރޭގައެވެ. އޭރު ރަސްމީ ކޮށް އެއްވެސް ތުހުމަތެއް އެމީހުންގެ މައްޗަށް ކޮށްފައި ނުވިނަމަވެސް، އޭރު ވެސް އެމީހުން އިޒްރާއިލަށް ޖާސޫސްކޮށްދޭކަން އޮތީ ޝައްކު ކުރެވިފައެވެ.

އިންޑިޔާގެ އިންޓެލިޖެންސް އިން ބުނެފައިވަނީ އިންޑިޔާއިން ވެސް އަދި އިންޑިޔާގެ އެއްވެސް ރައްޔިތަކުވެސް ޤަޠަރުގެ ސަލާމަތާއި ގުޅުން ހުރި މިފަދަ އެއްވެސް ކަމެއްގައި ހިއްސާ ނުވާ ކަން ޔަޤީން ކޮށްދޭން އެތައް މަސައްކަތެެއް ކުރެވިފައި ވާ ކަމަށެވެ. ނަމަވެސް އެ ޤައުމުން އެވާހަކަތައް ޤަބޫލުކުރުމަށް އެއްބަސް ވެފައި ނުވާ ކަމަށެވެ. އަދި ޤަޠަރުގެ ސަބްމެރިން ޕްރޮޖެކްޓާއި ގުޅޭ  މައުލޫމާތު އިޒްރާއިލާއި ހިއްސާކޮށްފަައިވާ ކަމަށް އެ ޤައުމުން ޤަބޫލު ކޮށްފައިވާ ކަމަށެވެ.