އަލްބުރޫޖް ޖަމާޢަތުގެ ޙަވާލުގައި 1444 ހ ވަނަ އަހަރު ރަމަޟާން މަހު ޢުމުރާއަށް ގޮސް އުޅުނު ދިވެއްސަކު ނިޔާވެއްޖެ އެވެ. 

އަލްބުރޫޖް ޖަމާޢަތުގެ އިސްވެރިޔާ އަލްފާޟިލް ޢަދުނާނު ސަޢީދު މައުލޫމާތު ދެއްވާ ގޮތުގައި ނިޔާވެފައި ވަނީ އެ ޖަމާޢަތުގެ ޙަވާލުގައި ޢުމްރާއަށް ގޮސް އުޅުނު މީހެއް ކަމުގައިވާ ގއ.ކޮލަމާފުށީ ގަސްދޮށުގެ މުޙައްމަދު ޒަކީ (83 އަހަރު) އެވެ. އަދި އޭނާ ނިޔާވެފައި ވަނީ 25 އޭޕްރީލް 2023 ވިލޭރޭ މައްކާ ގަޑިން 12 ޖަހާ ކަންހާއިރު ކަމަށްވެސް އެ ޖަމާއަތުން މައުލޫމާތު ދެއެވެ.

މީގެ އިތުރުން، އެ ޖަމާއަތުން ބުނީ މުޙައްމަދު ޒަކީ ނިޔާވެފައިވަނީ މަދީނާ ޒިޔާރަތުގައި 2 ދުވަސް ހޭދަކުރުމަށްފަހު މިދަތުރުގައި އިތުރު ޢުމުރާއެއް ކުރުމަށް މަދީނާގެ މީޤާތު ޛުލް ޚުލައިފާއިން އިޙްރާމް ބަނދެގެން އައިސް މައްކާގެ ހޮޓަލަށް ފޯރިތާ ދާދި ކުޑަ ހިނދުކޮޅެއްގެ ތެރޭގައި ކަމަށެވެ.

މުޙައްމަދު ޒަކީ ޢުމާރާއަށް ގޮސްފައިވަނީ އޭނާގެ ޢާއިލާގެ މީހުންގެ ތެރެއިން، އަނބިކަނބަލުންނާއި 2 ފިރިހެން ދަރީންނާއި އަންހެން ދަރިއަކާއި ދެ ދަނބިދަރީންނާއި އެކު ކަމަށް އަލްބުރޫޖް ޖަމާޢަތުން މައުލޫމާތު ދެއެވެ.

މިއާއެކު އެ ޖަމާޢަތުން އިތުރަށް ބުނީ، ޖިއްދާގައި ހުންނަ ދިވެހި ކޮންސިއުލޭޓާއި މައްކާގައި ކިޔަވަން ތިއްބަވާ ދިވެހި ދަރިވަރުންގެ އެހީތެރިކަމާއެކު މުހައްމަދު ޒަކީގެ ޖަނާޒާގެ ކަންކަން ކުރިޔަށް ގެންދިޔުމަށް ސަޢޫދީ ޢަރަބިއްޔާގެ ޢުމުރާ އެޖެންޓާއެކު މަސައްކަތް ކުރަމުން އަންނަ ކަމަށެވެ. އަދި މިވަގުތު މައްޔިތާ ބޭއްވިފައިވަނީ މައްކާގެ ކިންގް ފައިޞަލް ހޮސްޕިޓަލްގެ މޯރޗަރީގައި ކަމަށާ، ޑޮކްޓަރުގެ ލިޔުން ލިބުމާއެކު ހިނެވުމަށްޓަކައި މައްކާގެ ހިނަވާގެއަށް ގެންދެވޭނެ ކަމަށެވެ.

.