ޕްލާސްޓިކް ކޮތަޅުން ފީ ނަގަން ފެށުމުގެ ކުރިން، މި ވީ ހަތަރު މަސް ދުވަހުގެ ތެރޭގައި ރައްޔިތުން ހޭލުންތެރި ކުރުމަށް ވަރަށް ގިނަ މަސައްކަތް ކުރެވިފައިވާ ކަމަށް އެންވަޔަރަމެންޓް މިނިސްޓަރު އާމިނަތު ޝައުނާ ވިދާޅުވެއްޖެއެވެ.
ޝައުނާ މިފަދައިން ވިދާޅުވެފައި ވަނީ، މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި، ޕްލާސްޓިކް ކޮތަޅުން ފީ ނަގަން ފެށުމުގެ ކުރިން ރައްޔިތުން އެކަމަށް ހޭލުންތެރި ކުރުމަށް ކުރެވިފައިވަނީ ކޮންކޮށް މަސައްކަތް ތަކެއްތޯ މަޖިލީހުގެ މަކުނުދޫ ދާއިރާގެ މެންބަރު މުހައްމަދު ރާއީ ކުރެއްވި ސުވާލަށް ޖަވާބަށް ދެއްވަމުންނެވެ.
އެގޮތުން ޝައުނާ ވިދާޅުވީ, ކުނި މެނޭޖް ކުރުމުގެ ގާނޫނުގައި އެ މާއްދާ ހިމެނިފައިވާތީ، އެކަމާއި ގުޅިގެން ރައްޔިތުން އަހުލުވެރި ކުރުމަށް މީރާ އާއި، ވެމްކޯ އާއި ގުޅިގެން މުޅި ރާއްޖޭގައި ހޭލުންތެރި ކުރުމުގެ ޕްރޮގްރާމް ހިންގާފައިވާ ކަމަށެވެ.
"އެގޮތުން ވަކިން ޚާއްސަކޮށް މާލެ ސަރަހައްދަށް ޚާއްސަ ކޮށްގެން ހުޅުމާލެ އާއި، މާލޭގައިވެސް މިކަންކަން ވަނީ ކުރިއަށް ގެންދެވިފައި. އިންފޮމޭޝަން ސެޝަންތައްވެސް ބޭއްވިން. ރޯޑް ޝޯތައްވެސް ބޭއްވި. އަދި ސޯޝަލް މީޑިއާގައި، ޓުވިޓާ، އިންސްޓަގްރާމް އާއި މި ވަސީލަތްތައް ބޭނުންކޮށްގެން ވެސް ހޭލުންތެރި ކުރުމުގެ ޕްރޮގްރާމް ހިންގިން."
"އަޅުގަނޑުމެންނަށް 79 ރަށުގައި މި ޕްރޮގްރާމް ވަނީ ހިންގިފައި. ނ،ރ،ބ،ޅ ގެ 40 ރަށެއްގައި، ކ، އއ، އދ، ވ ގެ 32 ރަށެއްގައި، މ، ފ، ދ، ތ، ލ ގެ 6 ރަށެއްގައި އަޅުގަމޑުމެންނަށް ވަނީ ހޭލުންތެރި ކުރުމުގެ ޕްރޮގްރާމް ތައް ހިންގިފައި. ވިމެންސް ޑިވެލޮޕްމަންޓް ކޮމިޓީތަކާއި އެކީގައި އަޅުގަނޑުމެން ވަނީ އެގްރީމެންޓެއްގެ ދަށުން ދޮރުން ދޮރަށް ހިނގައި މިކަން ކަމާއި ގުޅޭގޮތުން ކަންކަން ހިންގިފައި. މާލޭގައި 250 ގެއަށް އަޅުގަނޑުމެން ވަނިން. އަޅުގަނޑުމެން ނޫސް ބަޔާންތައް ނެރުނިން. އަޅުގަނޑުމެން މި ކަންކަމާއި ގުޅޭގޮތުން ހޭލުންތެރި ކުރުމަށް ޓީވީ ޕްރޮގްރާމް ތަކަށް އަރައި ރޭޑިއޯ ޕްރޮގްރާމްތަކުގައިވެސް މި ވާހަކަތައް ދެއްކިން."
މިނިސްޓަރު އާމިނަތު ޝައުނާ
މިއާއެކު ޝައުނާ ވިދާޅުވީ، މިފަދަ ކަންކަން ތަންފީޒުކުރުމަށް މަސައްކަތް ކުރަމުންދާއިރު، ސިޔާސަތު ތައް ތަންފީޒު ކުރަން ތިބޭ ބައެއް ފަރާތްތަކުން އެކަމަށް ސަމާލުކަން ނުދެއްވާ ކަމަށާ، އެކަމާއި މެދު ހިތާމަ ކުރައްވާ ކަމަށެވެ.
Advertisement
This content is created and paid for by advertisers and does not involve Voice Journalists
