ރިޔާސީ އިތުރު ދައުރަކަށް ކުރިމަތިލައްވަން ނިންމަވާފައިވާކަން އެމެރިކާގެ ރައީސް ޖޯ ބައިޑަން ރަސްމީކޮށް އިއުލާނު ކުރައްވައިފި އެވެ. 

އެމެރިކާގެ ރައީސް ބައިޑަން ރިޔާސީ އިތުރު ދައުރަކަށް ވާދަކުރައްވާނެކަން އިއުލާންކުރެއްވީ މިއަދު އާއްމުކުރެއްވި ވީޑިއޯ މެސެޖެއްގަ އެވެ. އަދި އެކަން އިއުލާންކުރައްވާފައި ވަނީ އެމަނިކުފާނު 2020 ވަނަ އަހަރުގެ ރިޔާސީ އިންތިހާބުގައި ވާދަކުރައްވާނެ އިއުލާން ކުރެއްވި މުނާސަބާއަށް 4 އަހަރު ފުރުނު ދުވަހު އެވެ.

އަންނަ އަހަރު ބާއްވާ ރިޔާސީ އިންތިހާބުގައި ވާދަކުރައްވަން ބައިޑަން ނިންމަވާފައި މިވަނީ އެކަމާއި ގުޅޭގޮތުން ގިނަ ބަޔަކު ސުވާލުކުރަމުންދާ ދަނޑިވަޅެއްގަ އެވެ.

އިންތިހާބުގައި ވާދަކުރައްވާނެކަން އިއުލާންކުރައްވަމުން 3 މިނެޓްގެ ވީޑިއޯ މެސެޖުގައި ބައިޑަން ވިދާޅުވީ މިއަދުވެސް ކުރަންޖެހިފައި އޮތީ ވެރިކަމާއި ހަވާލުވެވަޑައިގެންނެވިއިރު ކުރެއްވި މަސައްކަތްތައްކަމަ ށެވެ.

ބައިޑަން ވިދާޅުވީ މިއަދު ކުރިމަތީގައި އޮތީ ދެ ސުވާލެއްކަމަ ށެެވެ. އެއީ އިތުރަށް މިނިވަންކަން ހޯދަނީތޯ ނުވަތަ މިނިވަންކަން ހަނިކުރާނީތޯ އަދި އިތުރު ހައްގުތައް ހޯދާނީތޯ ނުވަތަ ހައްގުތައް ހަނިކުރުމުގެ ސުވާލުކަމަށް ބައިޑަން ވިދާޅުވި އެވެ.

ބައިޑަންގެ މެސެޖުގައި ވަނީ އިޤްތިޞާދާއި އެހެން ކަންކަމާއި ގުޅޭގޮތުން އެމެރިކާގެ ރައްޔިތުން ފާޅުކުރަމުންދާ ކަންބޮޑުވުންތަކަށް ހައްލު ގެނެސްދެއްވާނެކަމަށް ވިދާޅުވެފަ އެވެ.

2021 ވަނަ އަހަރުގެ ޖެނުއަރީމަހު ވެރިކަމާއި ހަވާލުވެވަޑައިގެންނެވި އުމުރުފުޅުން 80 އަހަރުގެ ބައިޑަންއަކީ އެމެރިކާގެ ވެރިކަމަށް ވަޑައިގެންނެވި އުމުރުން އެންމެ ދުވަސްވީ ބޭފުޅާ އެވެ.

ބައިޑަންގެ އުމުރުފުޅު މައްޗަށް ގޮސްފައިވުމަކީ އެމަނިކުފާނު ނިސްބަތްވާ ޑިމޮކްރެޓިކް ޕާޓީގެ މެމްބަރުންގެ ކަންބޮޑުވުމެކެެވެ. އިންތިހާބުގައި ވާދަކުރެއްވުމަށް ނިންމެވިޔަސް، ޑިމޮކްރެޓިކް ޕާޓީގެ ޓިކެޓް އެމަނިކުފާނަށް ކަށަވަރުވާނީ އަންނަ އަހަރުގެ އޮގަސްޓްމަހު ބާއްވާ ޕާޓީގެ ނެޝަނަލް ކޮންވެންޝަނުގަ އެވެ.

ރިޔާސީ އިތުރު ދައުރަކަށް ވާދަކުރައްވާނެކަން ބައިޑަން އިއުލާންކުރެއްވިއިރު، ވާދަވެރި ރިޕަބްލިކަން ޕާޓީން އިންތިހާބުގައި ވާދަކުރެއްވުން އެންމެ ގާތީ އެންމެފަހުން ވެސް ރިޔާސީ އިންތިހާބުގައި ބައިޑަންއާ ވާދަކުރެއްވި ޑޮނާލްޑް ޓްރަމްޕްއެވެ. އޭނާވެސް ވަނީ އިންތިހާބުގައި ވާދަކުރައްވާނެކަން އިއުކާންކޮށްފަ އެވެ.