ޕްލާސްޓިކް ކޮތަޅުން ޓެކްސްނެގުމަށްފަހު ސަރުކާރު ކުންފުނިތަކުން ކޮތަޅު ވިއްކަން ފަށައިފިއެވެ.

ވޭސްޓް މެނޭޖްމަންޓް ކޯޕަރޭޝަން (ވެމްކޯ) މިއަދު އާއްމުކުރި އިއުލާނެއްގައި ވާގޮތުން، 'ބިންލައިނަރ' ގަތުމަށް މިހާރު ޕްރި-އޯޑަރ ކުރެވޭނެއެވެ. އަދި އޯޑަރު ކުރެވޭނީ މަދުވެގެން 24 ކޮތަޅަށެވެ.

މި ކޮތަޅުތައް ވިއްކަނީ ލާޖް ކޮތަޅެއް 35 ރުފިޔާއަށް، އެކްޓްރާ ލާޖް ކޮތަޅާއި ތްރީއެކްސްއެލް ކޮތަޅު 165 ރުފިޔާއަށެވެ. 

ވެމްކޯއިން ބުނީ، ކޮތަޅު އޯޑަރު ކުރުމަށް ހާއްސަ ލިންކެއް ހެދިފައިވާނެ ކަމަށާއި، ސަރުކާރު ބަންދުނޫން ތިން ދުވަހުގެ ތެރޭގައި އޯޑަރުކުރި ކޮތަޅުތައް ލިބޭނެ ކަމަށެވެ.

ވެމްކޯއިން ބުނީ ކުނި މެނޭޖްކުރުމުގެ ޚިދްމަތްދޭ ފަރާތްތަކުން ކުނި އެޅުމަށް ޚާއްސަ ކޮށް ވިއްކާ "ބިންލައިނަރ" އަށް ޓެކްސްއެއް ނެގުމަށް ހަމަޖެހިފައިނުވާ ކަމަށެވެ. 

ތިމާވެށި ހިމާޔަތްކޮށް، ޕްލާސްޓިކް މަދު ކުރުމަށް ކަމަށް ބުނެ، އޭޕްރިލް މަހުން ފެށިގެން ވިޔަފާރިކުރާ ކޮންމެ ބާޒާރު ކޮތަޅަކުން ދެ ރުފިޔާ ނަގަން ވަނީ ފަށާފައެވެ.

އެއާއެކު ޕްލާސްޓިކް ކޮޓަޅުން ނަގާ ޓެކްސް އެ ވިޔަފާރިއަކުން މީރާއަށް ދައްކަން ޖެހެއެވެ. އެފީ މީރާއަށް ދައްކަން ޖެހެނީ ޖީއެސްޓީ ދައްކާއިރު، އެއާއި އެއްކޮށެވެ. 

އަދި މި ޓެކްސް ނުނަގާ ޕްލާސްޓިކް ކޮތަޅު ދީފިނަމަ 5000 ރުފިޔާއާއި 50000 ރުފިޔާއާއި ދެމެދުގެ އަދަދަކުން ޖޫރިމަނާ ކުރެވޭނެ އެވެ. 

އެހެން ނަމަވެސް މިހާރު ބިލު ފަރުމާކޮށްފައިވާ ގޮތުން ކޮތަޅު ބޮނޑީގެ އަގު ވަނީ އިންތިހާއަށް މައްޗަށް ގޮސްފައެވެ. 

ކުނި މެނޭޖް ކުރުމުގެ ގާނޫނަށް ގެނެވުނު އިސްލާހާއި ގުޅިގެން މިރާއިން ކުރި ޓުވީޓެއްގައި ބުނީ، ޕްލާސްޓިކް ކޮތަޅު ބޮނޑި ގޮތަށް ވިއްކި ނަމަވެސް، ބޮނޑި އަކު އިންނަ ކޮންމެ ކޮތަޅަކުން ދެ ރުފިޔާ ނަގަން ޖެހޭ ކަމަށެވެ.  

މިކަން މީރާ އިން އާންމުކޮށްފައިވާ 'ޕްލާސްޓިކް ކޮތަޅުގެ ފީ ގައިޑް'ގައި ވެސް އެ އީދާރާއިން ފާހަގަކޮށްފައިވެއެވެ. 

"ޕްލާސްޓިކް ކޮތަޅު ބޮނޑިއެއް ވިއްކި ނަމަވެސް ނުވަތަ ހިލޭ ދިން ނަމަވެސް، އެ ކޮތަޅު ބޮނޑީގައި ހިމެނޭ ކޮންމެ ކޮތަޅަކަށް 2ރ.ގެ ރޭޓުން ޕްލާސްޓިކް ކޮތަޅުގެ ފީ ނަގަންވާނެ އެވެ. އަދި ޕްލާސްޓިކް ކޮތަޅު ބޮނޑި ވިއްކާ ފަރާތަކީ ޖީ.އެސް.ޓީއަށް ރަޖިސްޓަރީކޮށްފައިވާ ފަރާތެއް ނަމަ، އޭގެ އަގުން ޖީއެސްޓީ ވެސް ނަގަންވާނެ އެވެ،" ޕްލާސްޓިކް ކޮތަޅުގެ ފީ ގައިޑުގައިވާ ސުވާލެއްގެ ޖަވާބުގައި ބުނެފައިވެއެވެ. 

މި އުސޫލާއި އެކު ބާޒާރުގައި ކޮތަޅު ބޮނޑީގެ އަގު ވަރަށް ބޮޑަށް ވަނީ މައްޗަށް އަރާފައެވެ. 

ކުދި - 220ރ. (ކުރިން 25ރ.)

މެދު - 228ރ. (ކުރިން 35ރ.)

ބޮޑު - 235ރ. (ކުރިން 48ރ.)

އެކްސްއެލް - 285ރ. (ކުރިން 115ރ.)

އެކްސްއެކްސްއެލް - 365ރ. (ކުރިން 220ރ.)

ޕްލާސްޓިކް ކޮތަޅުގެ އަގަށް އައި މި ބޮޑު ބަދަލާއި އެކު ވިޔަފާރި ވެރިންގެ އަތުން އެކަމަށްދާ ޚަރަދު އެތައް ގުނަ އަކަށް ބޮޑުވެގެން ގޮސްފައިވާއިރު އެކަމާއި ގުޅިގެން އެފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.