ޕާކިސްތާނުގެ ބަލޯކިސްތާނުގެ ހޫބު ސަރަޙައްދުގެ ބަކަރި ގެންގުޅޭ 82 އަހަރުގެ އަބްދުލްޤާދިރު ބަޚުޝް އުމްރާގެ އަޅުކަން އަދާ ކުރަން ހުއްޓައި ނަގާފައިވާ ވީޑިއޯ އަކަށް ގިނަބައެއްގެ ސަމާލުކަން ލިބިއްޖެއެވެ. 

އަބްދުލްޤާދިރުއަކީ އޭނާގެ ދަރިންނާއި އެކު ފަން ޖިފުޓި ގަނޑެއް ކަހަލަ ގެއެއްގައި ދިރިއުޅެމުން އަންނަ ވަރަށް ފަގީރު މީހެކެވެ. އޭނާ ދިރިއުޅުމަށް ކުރަމުން ދިޔަ މަސައްކަތަކީ ބަކަރި ގެންގުޅުމާއި އެ ވިއްކުމެވެ.

އެގޮތުން ބަކަރި ގެންގުޅެ ވިއްކަިައިގެން ލިބުނު ލާރިން އާއިލާގެ ކަންކަން ހަމަޖައްސަމުން އޭނާ އައީ ޢުމްރާގެ އަޅުކަން އަދާކުރުމަށް މައްކާއަށް ދިޔުމަށް ފައިސާ ރައްކާވެސް ކުރަމުންނެވެ. އެތައް އަހަރެއް ވަންދެން ފައިސާ ރައްކާ ކުރަމުން، އޭނާއަށް ޢުމްރާގެ އަޅުކަން އަދާ ކުރަންދާހާ ފައިސާ އެއްކުރެވުނީ 15 އަހަރު ދުވަހުންނެވެ. 

Advertisement

"އަހަރެން ޢުމްރާގެ އަޅުކަން އަދާކުރުމަށް ވަރަށް ބޮޑަށް ބޭނުންވި. އަދި އެކަމަށްޓަކައި މާތް اللهގެ ހަޟުރަތުގައި ވަރަށް ގިނައިން ދުޢާވެސް ކުރިން. ބަކަރި ގެންގުޅެ ވިއްކައިގެން ލިބުނު ފައިސާއިން އަހަރެން ޢުމާރާއަށް ދާނެ ފައިސާ ހޯދައި ޕާސްޕޯޓް ހެއްދިން. އަޟުހާ ޢީދު ދުވަހު ބަކަރި ވިއްކައިގެން ފައިސާ ހަމަކުރީ." އަބްދުލްޤާދިރު އަރަބް ނިޔުސް އަށް ދިން އިންޓަވިއުއެއްގައި ބުންޏެވެ.

އަބްދުލްޤާދިރު މަދީނާގެ މަސްޖިދުއްނަބަވީގައި އެކަނިމާއެކަނި އުޅެނިކޮށް އޭނާގެ ފޮޓޯ ނަގައި ވީޑިއޯކޮށް، ސައޫދިއަރަބިއާގެ ސޯޝަލް މީޑިއާގައި ވައިރަލްވާން ފެށިއިރު އޭނާއަށް މިފަދަ މަޝްހޫރުކަމެއް ލިބެމުންދާކަމެއްވެސް ނޭނގެއެވެ. އެހެނީ އެނާ އަކީ ފޯނެއްވެސް ގެންގުޅޭ މީހެއްނޫނެވެ.

ޢަބްދުލްޤާދިރު ވީޑިއޯ ފެނި ވަލީއަޙުދު މުޙައްމަދު ބިން ސަލްމާނުގެ އެޑްވައިޒަރެއް ކަމަށްވާ ތުރުކީ އަލް-ޝެއިޚް، ވެސް ވަނީ އަބުދުލްޤާދިރު ހޯދައިދިނުން އެދި ޓްވީޓެއްވެސް ކޮށްފައެވެ. އެހެންނަމަވެސް އެ ޓުވީޓު ކުރިއިރު އަބްދުލްޤާދިރުވަނީ އުމްރާގެ އަޅުކަން ނިންމައި އެނބުރި ޕާކިސްތާނަށް އައިސްފައެވެ. 

ޕާކިސްތާނުގައި ހުރެ އަރަބް އޮންލައިން ނޫހަށް އޭނާ ދިން އިންޓަވިއުއެއްގައި އޭނާ ވަނީ الله ތަޢާލާ އޭނާގެ އުއްމީދު ފުރިހަމަކޮށްދެއްވައިފި ކަމަށް ވަނީ ބުނެފައެވެ. އަދި މައްކާގައި ހޭދަވި ދުވަސްކޮޅުގެ ތެރޭގައި އޭނާ ކުރަމުން ދިޔަ އަސަރުގަދަ ދުޢާވެސް ވަނީ އެ ނޫހަށް ކިޔައި ދީފައެވެ. މީގެ އިތުރުން މިހާރުގެ އޭނާގެ އުއްމީދަކީ ޙައްޖުގެ އަޅުކަން އަދާ ކުރުން ކަމަށާ، ދެން މަސައްކަތް ފެށުން އޮތީ އެކަން ކުރުމަށް ކަމަށް ވަނީ ބުނެފައެވެ. 

ޢަބްދުލްޤާދިރުގެ މިވާހަކަތައް އެނގި އޭނާ ގަބޫލުކުރާނަމަ، ޙައްޖުގެ އަޅުކަމަށް ހިނގާ ޚަރަދު ދިނުމަށް މުއްސަނދި ފަރާތަކުން މިހާރު ހުށަހަޅާފައިވާ ކަމަށް އަރަބް ނޫހުން މައުލޫމާތުދެއެވެ..