އަވަށްޓެރި އިންޑިޔާގެ ޑިފެންސް މިނިސްޓަރު ރާޖްނާތް ސިންގް މާދަމާ ރާއްޖެ ވަޑައިގަންނަވާ ގޮތަށް ހަމަޖެހިއްޖެ އެވެ. 

އިންޑިޔާގެ ޑިފެންސް މިނިސްޓަރ ރާޖްނާތް ސިންގް ކުރެއްވި ޓްވީޓެއްގައި ވިދާޅުވީ، ރާއްޖެ އަށް ކުރައްވާ ޒިޔާރަތަކީ ރަސްމީ ޒިޔާރަތެއް ކަމަށެވެ.

އަދި އެ ޒިޔާރަތުގެ ތެރެއިން ރާއްޖޭގެ ޑިފެންސް މިނިސްޓަރ އަލްއުސްތާޒާ މާރިޔާ ދީދީ އާއި އެކު މަޝްވަރާ ބައްދަލު ވުމެއް ކުރިއަށް ދާނެ ކަމަށާ، އަދި އެ މަޝްވަރާތަކާއެކު އިންޑިޔާއާއި ދިވެހިރާއްޖެއާ ދެމެދުގައި އޮތް ގުޅުން އިތުރަށް ވަރުގަދަވެގެން ދާނެކަމަށް ވެސް ރާޖްނާތު ވިދާޅުވިއެވެ.

އަދި މި ޓްވީޓް ޝެއަރ ކުރައްވަމުން މިނިސްޓަރ މާރިޔާ ވިދާޅުވެފައިވަނީ އިންޑިޔާގެ ޑިފެންސް މިނިސްޓަރ ރާޖްނާތް ސިންގް އަށް މަރުހަބާ ކިޔުމަށް ތައްޔާރަށް ހުންނެވި ކަމަށެވެ.

އަދި ދެ ގައުމުގެ ދެމެދުގައި އުފެދިގެން ގޮސްފައި އޮތް ގުޅުމުގެ ސަބަބުން އަބަދުވެސް ހެޔޮ ނަތީޖާ ތަކެއް ނުކުމެގެން ގޮސްފައިވާ ކަމަށް ވިދާޅުވި އެވެ. އަދި ރާއްޖޭގެ ގުދުރަތީ ރީތި ކަމުގައި ހިތްގައިމު ތަޖުރިބާތަކެއް ރާޖްނާތް ސިންގް ކުރައްވާނެ ކަމަށް އުންމީދު ކުރައްވާ ކަމަށް މާރިޔާ ވިދާޅުވެފައި ވެއެވެ.