ހޭންޑްބޯލް މޯލްޑިވްސް އިން އިންތިޒާމު ކޮށްގެން ކުރިއަށް ގެންދާ ހޭންޑްބޯލް ޗެމްޕިއަންޝިޕްގެ ޤަވާއިދު އިސްލާހު ކޮށް، މުބާރާތް މި މަހުގެ ފަހުކޮޅަށް ފަސްކޮށްފިއެވެ.
މި މުބާރާތް ބޭއްވުމަށް ކުރިން ހަމަޖައްސާފައި ވަނީ މި މަހުގެ 10 ވަނަ ދުވަހުއެވެ.
ހޭންޑްބޯލް މޯލްޑިވްސްއިން ކުރި އިއުލާނެއްގައި ބުނީ ހަވަނަ ހޭންޑްބޯލް ޗެމްޕިއަންޝިޕްގައި ބައިވެރިވެފައިވާ އެންމެހައި ފަރާތްތަކުގެ މަސްލަޙަތައް ރިޢާޔަތްކޮށް މުބާރާތުގެ ޤަވާއިދު އިސްލާޙްކުރުމަށްފަހު، މުބާރާތް ފެށުމަށް ހަމަޖެހިފައިވާ ތާރީޚް ބަދަލުކޮށް، އަލުން މުބާރާތުގައި ބައިވެރިވުމުގެ ފުރުސަތު ހުޅުވާލައި އެކަން އިއުލާންކުރުމަށް އެ އެސޯސިއޭޝަނުގެ އެގްޒެކެޓިވް ކޮމިޓީގެ ފަސް ވަނަ ބައްދަލުވުމުގައި ނިންމާފައިވާ ކަމަށެވެ.
އެހެންކަމުން މި މުބާރާތުގައި ބައިވެރިވުމަށް އެދޭ އެސޯސިއޭޝަންގެ މެމްބަރު ކްލަބްތަކުން، މުބާރާތުގައި ބައިވެރިވުމުގެ ރަޖިސްޓްރޭޝަން ފޯމު ފުރިހަމަ ކުރުމަށްފަހު މި މަހުގެ ހަތެއްވާ އާދީއްތަ ދުވަހުގެ 14:00 ގެ ކުރިން އެސޯސިއޭޝަންއަށް އީމެއިލް ކުރުމަށް އެސޯސިއޭޝަނުން ބުންޏެވެ.
މުބާރާތުގައި ބައިވެރިވާ ކުލަބުތަކުގެ ޓީމް ލިސްޓް ފުރިހަމަ ކުރުމަށްފަހު ހުށަހަޅަން ޖެހޭ ތާރީހަކީ މި މަހުގެ 14 މެއި 2023 ވާ އާދީއްތަ ދުވަހުގެ 14:00 ގެ ކުރިންނެވެ.
މުބާރާތް ފެށުމަށް ހަމަޖެހިފައި ވަނީ މި މަހުގެ 20 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
