ބިހާއެކު އެހެން ކާއެއްޗެހި އެއް ކޮތަޅަކަށް އެޅުން ރަނގަޅު ނޫން ކަމަށް އެތެރެހަށީގެ ޑޮކްޓަރު މުޙައްމަދު ޢަލީ ވިދާޅުވެއްޖެއެވެ.

ބައެއްފަހަރަށް ރޯބިހުގެ ބޭރުގައި ހުންނަ ޖަރާސީމު، އެހެނިހެން ކާއެއްޗެއްސަށް އަރާކަން ފާހަގަ ކުރައްވައި ޑރ. ވިދާޅުވީ އޭގެ ސަބަބުން ބޭރަށް ހިންގާ ރޯގާ ޖެހުމުގެ ފުރުސަތު އިތުރުވާ ކަމަށެވެ.

"އެއްކޮތަޅަށް އެއްޗެހި އަޅަމުން ގޮސް. ރޯ ބިހާ އެހެނިހެން ކާއެއްޗެހި އެއްކޮތަޅަށް އެޅުން ރަނގަޅެއް ނޫން" ޑރ. ވިދާޅުވިއެވެ.

މީގެ އިތުރުން ޑރ. ވިދާޅުވީީ ރަނގަޅު ކޮށްލަންވެގެން ބިހުގެ ބޭރު ޑިޓަރޖެންޑެއްލައިގެން ދޮވުނަސް އެގޮތް ކަމުނުދާ ކަމަށެވެ. އެގޮތަށް ކަންތައް ކުރުމުން ބިހުގެ ތޮށިގަނޑުގައި ހުންނަ ކުދިކުދި ވިދުތައް ބޮޑަށް ހުޅުވި، ބޭރުގައި  ހުންނަ ޖަރާސީމު ބިހުގެ އެތެރެއަށް ވަނުމަށް މަގުފަހިވާ ކަމަށް ޑރ. ފާހަގަ ކުރެއްވިއެވެ.

"ބިސް ގަންނައިރު ބިހުގެ ބޭރު ރީތި ބިސް ގަތުން އެންމެ ރަނގަޅީ." ޑރ. ވިދާޅުވިއެވެ.

ޑރ މިހެން ވިދާޅުވެފައި މިވަނީ، ކޮތަޅުން ޓެކްސް ނަގަން ފެށުމާއެކު، ގަންނަ ހުރިހާ ބާވައެއްގެ ކާއެއްޗެއް އެއް ކޮތަޅަށް އަޅައިފާނެ ކަމަށް ބަލާފައެވެ.

ކުނި މެނޭޖުކުރުމުގެ ޤާނޫނަށް ގެނައި އިސްލާހުގެ ދަށުން ޕްލާސްޓިކް ކޮތަޅުން 2 ރުފިޔާ ނަގަން ވަނީ ފަށާފައެވެ.

ޕްލާސްޓިކް ކޮޓަޅުން ނަގާ ޓެކްސް އެ ވިޔަފާރިއަކުން މީރާއަށް ދައްކަން ޖެހެއެވެ. އެފީ މީރާއަށް ދައްކަން ޖެހެނީ ޖީއެސްޓީ ދައްކާއިރު، އެއާއި އެއްކޮށެވެ. 

ކޮންމެ ޕްލާސްޓިކް ކޮތަޅަކުން ޓެކްސް ނަގަން ފަށާފައިވާއިރު، މި ޓެކްސް ނުނަގާ ޕްލާސްޓިކް ކޮތަޅު ދީފިނަމަ 5000 ރުފިޔާއާއި 50000 ރުފިޔާއާއި ދެމެދުގެ އަދަދަކުން ޖޫރިމަނާ ކުރެވޭނެ އެވެ. 

މީރާއިން އާންމުކޮށްފައިވާ ޕްލާސްޓިކް ކޮތަޅުގެ ފީ ގައިޑު އަދި ޖީއެސްޓީއަށް ރަޖިސްޓާ ކޮށްފައިވާ ފަރާތްތަކުން ޕްލާސްޓިކް ކޮތަޅުން ފީ ނެގުމުގެ ޤަވައިދުގައި ބުނާގޮތުން ޖީއެސްޓީ ރަޖިސްޓްރީކުރުން ލާޒިމުވާ ވިޔަފާރިއަކުން ޖީއެސްޓީއަށް ރަޖިސްޓްރީ ނުކޮށް ވިއްކާ ނުވަތަ ފޯރުކޮށްދޭ ޕްލާސްޓިކް ކޮތަޅަކުން ޓެކްސް ނަގައި އެ ފައިސާ މީރާއަށް ދައްކަން ޖެހޭނެ އެވެ. 

އޭގެ އިތުރުން ޖީއެސްޓީ ނުނަގާ މުދަލެއް ފޯރުކޯށްދިން ނަމަވެސް އެ މުދާ އެޅުމަށް ޕްލާސްޓިކް ކޮތަޅު ބޭނުންކުރާނަމަ ކޮތަޅުން ޓެކްސް ނަގަން ޖެހޭނެ އެވެ.