މަސްވެރިކަން ކުރުމަށް އެހާ ބޭރަށް ނުނިކުތަސް މަސް ބާނާ ކަމަށާއި ދެކުނުގެ މަސްވެރިން މަސްބާނަނީ ކޮންމެ ފަހަރަކު 100 މޭލަށް ނުކުމެގެން ނޫން ކަމަށް ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަ ދައްކަވަމުންނެވެ.

މިނިސްޓަރ ވިދާޅުވީ ރާއްޖޭގެ މަސްވެރިން 100 މޭލު ބޭަރަށް ނުކުތުމަކީ އެކަށީގެންވާ ކަމެއް ކަމަށާއި އަދި އެއަށްވުރެ ބޭރަށްވެސް ނުކުމެދާނެ ކަމަށެވެ. ނަމަވެސް ބޭރަށް ނުކުމެ މަސް ބޭނިތޯ ނުވަތަ ނޫންތޯ ބެލުން މުހިންމު ނޫން ކަމަށެވެ.

Advertisement

"މިހާރު ކޮންމެހެނެއް ވިޔަސް މި ދެންނެވީ ދެކުނުން އެންމެ ބޭރަށް އެންމެ ކުޑަކޮށް މިއޮތީ 141 ނޯޓިކަލް މޭލު އަޅުގަނޑަށް ފާހަގަ ކުރެވޭ ގޮތުން ދެން މިކަން ސަރުކާރުން ރަސްމީކޮށް މި ދެންނެވި ޗާޓް ކުރަހާ، ދައްކާނެ. އެކަމަކު މި ދެންނެވީ އަޅުގަނޑަށް ނޯޓް ކުރެވޭ ގޮތުން 142 މޭލު އެންމެ ކުޑަކޮށް އޮންނާނީ،" މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ އާއްމުކޮށް މަސްވެރިން މަސް ބާނަނީ 100 މޭލަށްވުރެ އައްދަށުން ކަމަށެވެ. އަދި ރަށާ ކައިިރިން މަސް ބޭނުނު ވަރަކަށް މަސްވެރިންނަށް ފައިދާ ވާނެ ކަމަށާއި ސަބަބަކީ ތެލު ހަރަދު ކުޑަވެފައި ތެލަށް ބަރޯސާވާ މިންވަރު ކުޑަވާނެތީ ކަމަށެވެ.

"އެހެނެއްކަމަކު ބޮޑެތި ދޯނިފަހަރު ހަމަ ބޭރަށް ނުކުންނާނެ. އެކަމު މިހާރު އެއޮތީ އެ މިން ކަނޑައަޅާފަ. ދެން މަސްވެރިން ކައިރީގަ އަޅުގަނޑުމެން އަހަން ޖެހޭނީ އެމީހުން 200 މޭލަށް، 250 މޭލަށް ނޫނިއްޔާ ޗާގޯސް ހިމެނޭ ރަށްތައް ކައިރިއަށް ގޮސް މަސް ބޭނިތޯ" މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ މަސްވެރިން އެހާ ބޭރަށް ދާކަމަށް ރިކޯޑުތަކުން ނުދައްކާ ކަމަށެވެ.

ގިނަ ދޯނިފަހަރުގައި ޓްރެކިންގް ހަރުކޮށްފައި ހުންނަކަށން ފާހަގަ ކުރައްވައި މިނިސްޓަރު ވިދާޅުވީ ޓްރެކިން ހަރުކޮށްފައި ހުރި ދޯނިފަހަރު ހަމަ ގައިމުވެސް ރާއްޖޭގެ ސަރަހައްދު ފަހަނައަޅާ 200 މޭލު ނުވަތަ150 މޭލު ބޭރަށް ނުކުންނަ ކަމަށް ރެކޯޑު ނުކުރެވޭ ކަމަށެވެ.