އޯގަސްޓު މަހުގެ ނިޔަލަށް އަމީނީ މަގުގެ މަސައްކަތް މުޅިން ނިންމާލެވޭނެކަމަށް އެ މަސައްކަތް ހަވާލުކޮށްފައިވާ ރޯޑް ޑިވެލޮޕްމަންޓު ކޯޕަރޭޝަންގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ވިދާޅުވެއްޖެ އެވެ. 

އަމީނީ މަގުގެ މަސައްކަތް ކުރިއަށްދާ ގޮތާއި ގުޅޭގޮތުން ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން މޫކޭ ވިދާޅުވީ އަމީނީ މަގުގެ މަސައްކަތް ޕްލޭންކޮށްފައި އޮތް ގޮތަށް ގެންދިއުމުގައި ބޮޑެތި ގޮންޖެހުންތަކެއް ހުރި ކަމަށެވެ. އަދި އެ މަސައްކަތް މީގެކުރިން ނިންމަން އޮތް ތާރީޚަށް ނުނިންމި ލަސްވާތީ ގިނަ ފާޑުކިޔުންތަކެއް ވެސް އަމާޒުވަމުންދާ ކަމަށެވެ. 

އޭނާ ފާހަގަކުރެއްވި ގޮތުގައި މަސައްކަތް ނިންމުން ލަސްވެގެން ދިއުމުގެ އެންމެ ބޮޑު ސަބަބަކީ އެ މަސައްކަތާއި ހަވާލުވިއިރު ޕްލޭންކޮށްފައިވާ ގޮތަށް ރޭގަނޑު މަސައްކަތް ނުކުރެވުމެވެ.

އަމީނީ މަގަކީ އެކި ބޭނުންތަކަށް ވަރަށް ގިނަ ހޮޅިތަކާއި ކޭބަލްތައް ވަޅުލާފައިވާ މަގެއްކަމުން ރޭގަނޑު ގަޑީ މަސައްކަތް ކުރިއަށް ގެންދިއުމަކީ އެންމެ ރައްކާތެރި ގޮތް ކަމުގައި ނުވާތީ މަސައްކަތުގެ ވަގުތަށް ގެނެވުނު ބަދަލުތަކުގެ ސަބަބުން މަޝްރޫއު ދިގުލައިގެންދިޔަކަން އޭނާ ފާހަގަކުރެއްވި އެވެ. 

މޫކޭ ވިދާޅުވީ މިހާރު އަމީނީ މަގުގެ މަސައްކަތް ވަރަށް ހަލުވި ސްޕީޑުގައި ކުރިއަށްދާ ކަމަށެވެ. އަދި މިހާރު ކުރިއަށް ދާ ސްޕީޑުގައި އެކަން ކުރެވޭ ނަމަ އޮގަސްޓު މަހުގެ ނިޔަލަށް މުޅި މަޝްރޫއު ނިމި އަމީނީ މަގު އާންމުންނަށް ހުޅުވާލެވޭނެކަމަށް މޫކޭ ވިދާޅުވި އެވެ. 

އަމީނީ މަގުގައި ތާރުއެޅުމުގެ މަސައްކަތް ހައުސިން މިނިސްޓްރީން އާރްޑީސީއާ ހަވާލުކޮށްފައިވަނީ މިދިޔަ އަހަރުގެ ޖުލައި މަހުއެވެ. އެ މަޝްރޫއުގެ ދަށުން 1.7 ކިލޯ މީޓަރުގެ މަގުގައި ތާރު އެޅުމަށް ވަނީ ހަމަޖެހިފައެވެ. މި މަސައްކަތް އާރްޑީސީ އަށް ހަވާލު ކޮށްފައި ވަނީ 84.4 މިލިއަން ރުފިޔާ އަށެވެ.

ތާރު އަޅާ ނިންމައި ފުރަތަމަ ތިން ސެގްމަންޓު އާއްމުންނަށް ހުޅުވައިލީ މާޗް މަހުއެވެ. އަދި މިހާރު ކުރިއަށްދާ ސެގްމަންޓުގެ މަސައްކަތް ވެސް މޭ މަހުގެ ނިޔަލަށް ނިންމާލާ ހުޅުވާލެވޭނެކަމަށް ނޫކޭ ވަނީ ވިދާޅުވެފަ އެވެ.