އިޒްރާއިލް ސިފައިން ފަލަސްޠީނުގެ ނާބުލުސްގައި ހިންގި މިލިޓަރީ ރެއިޑެއްގައި ފަލަސްޠީނުގެ ތިން މީހަކު ޝަހީދު ކޮށްލައިފިއެވެ.

ބަޑިން ހަމަލާ ދީގެން މިތިން މީހުން ޝަހީދު ކޮށްލައިފައިވާއިރު މި ހަމަލާތަކުގެ ސަބަބުން އިތުރު ހަތަރު މީހަކު ޒަހަމްވެފައި ވެސް ވެއެވެ.

ފަލަސްޠީނުގެ ހެލްތް މިނިސްޓްރީ އިން ވަނީ ޝަހީދުވި ތިން މީހުންވެސް މަރުވެފައި ވަނީ އިޒްރާއިލް ސިފައިންގެ ބަޑީގެ ހަމަލާތަކުން ކަން ކަށަވަރު ކޮށްދީފައެވެ.

"ޝަހީދުވި ތިން މީހުންގެ ތެރެއިން ދެމީހުންގެ މޫނު ބަޑީގެ ވަޒަން އަރައިފައިވާ މިންވަރު ގިނަކަމުން ކާކު ކަން ވަކިނުވޭ" ފަލަސްޠީނުގެ ހެލްތް މިނިސްޓްރީ އިން ބުނެފައިވެއެވެ.

އިޒްރާއިލްގެ ފަރާތުން ބުނެފައިވަނީ ޝަހީދުވި ތިން މީހުންގެ ތެރެއިން ދެމީހުންނަކި އޭޕްރިލް 7 ވަނަ ދުވަހު ޖެރިކޯގައި ބަޑިން ހަމަލާދީ އެއްބަނޑު އެއްބަފާ ދެ އަންހެނުން މަރާލި މީހުން ކަމަށާއި، ހަމަ އެހާދިސާގައި ޒަހަމް ތަކަށް ފަރުވާ ހޯދަމުން ދަނިކޮށް އެ ދެއަންހެނުންގެ މަންމަ ވެސް މަރުވެފައި ވާކަމަށެވެ.

ނާބުލުސްގައި ހަރަކާތްތެެރިވާ ރެޑް ކްރަސެންޓުގެ އޮފިސަރުން ބުނެފައިވަނީ މި ހާދިސާގައި ވަޒަން އަރައި ޒަހަމް ވެގެން އިތުރު ހަތަރު މީހަކު އިތުރު ފަރުވާއަށް ހޮސްޕިޓަލަށް ގެންދެވިފައި ވާކަމަށެވެ. އަދި 150 އެއްހާ މީހުން ކަރުނަ ގޭހުގެ އަސަރު ކޮށްގެން ފަރުވާ ދެވިފައިވާކަމަށެވެ. އަދި އޭގެ ތެރޭގައި ސްކޫލް ކުދިންވެސް ހިމެނޭކަމަށް ރެޑްކްރަސެންޓުން ބުނެފައިވެއެވެ.
ނާބުލުސްގައި ހަރަކާތް ތެރިވާ ސިޔާސީ ފަރާތްތަކުން މިހަމަލާއާއި ދެކޮޅަށް އަޑު އުފުލުމަށް އެެއްވުން ތަކަކަށް ވަނީ ގޮވާލައިފައެވެ.

އަންގާރަ ދުވަހުގެރޭ އިޒްރާއިލް ސިފައިން ވަނީ ޣައްޒާގައި ފަލަސްޠީނުގެ 58 އަހަރުގެ ފިރިހެނަކު ޝަހީދު ކޮށްލައިފައެވެ. އަދި މިހާދިސާގައިވެސް އިތުރު 5 މީހަކު ވަނީ ޒަހަމްވެފައެވެ.
2023 ވަނަ އަހަރަށް ފެށުނު ފަހުން އިޒްރާއިލް ސިފައިން ފަލަސްޠީނުގެ 107 މީހަކު ޝަހީދު ކޮށްލައިފައިވެއެވެ. އޭގެ ތެރޭގައި 20 ކުޑަކުދިންވެސް ހިމެނެއެވެ .