އދ. ދިގުރަށް ގޮނޑުދޮށް ހިމާޔަތް ކުރުމުގެ މަޝްރޫޢު ސަރުކާރުން އެމްޓީސީސީއާ ހަވާލު ކޮށްފިއެވެ.

މި މަޝްރޫޢު ހަވާލުކުރުމަށް އިއްޔެ އެމްޓީސީސީގައި ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ  އެ ކުންފުނީގެ ޗީފް އެގްޒެކެޓިވް އޮފިސަރ އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ އެ މިނިސްޓްރީގެ ޑިރެކްޓަރ ޖެނެރަލް ފާތުމަތު ޝާނާ ފާރޫޤެވެ.

ދިގުރަށު ގޮނޑުދޮށް ހިމާޔަތް ކުރުމުގެ މަޝްރޫއު ހަވާލު ކުރުމުގެ ތެރެއިން -- ފޮޓޯ/ އެމްޓީސީސީ

ޖުމުލަ 700 މީހުން ދިރިއުޅޭ ހިތްގައިމު ރީތި ތުނޑިއެއް އޮންނަ ދިގުރަށަކީ ބާރު ސްޕީޑުގައި ގެސްޓްހައުސް ވިޔަފާރި ކުރިއަރާރައި ފަތުރުވެރިކަން ފައްކާވެފައިވާ ރަށެކެވެ. ރަށުގެ ރެޖިސްޓަރ ވެފައިވާ އާބާދީ 700 ގައި ލިޔުމުން އޮތް ނަމަވެސް ރަށުގައި ފުޅާވަމުން އަންނަ ފަތުރުވެރިކަމުގެ ސިނާއަތާއެކު، ރަށުގައި ދިރިއުޅޭ އާބާދީ 1000 އާއި ގާތް ކުރާނެކަމަށް ކައުންސިލުން މަޢުލޫމާތުދެއެވެ.

ހަމައެހެންމެ ހައި ސީސަންގައި ފަތުރުވެރިން ރަށަށް އަންނަން ފެށުމާއެކު، ރަށުގެ ދިރިއުޅޭ އާބާދީ 1500 އިން މައްޗަށް ދާކަންވެސް ކައުންސިލުން ފާހަގަކުރެއެވެ.

އެގޮތުން ރަށުގައި ރަޖިސްޓަރކޮށްގެން ހިންގާ 23 ގެސްޓްހައުސް އެރަށުގައި ހުރިއިރު، މުޅިއަކު 220 ކޮޓަރި މިހާރު އެބަހުއްޓެވެ. ގެސްޓްހައުސް ވިޔަފާރިއާއިއެކު، އެ ރަށުގައި މުދާ އުފުލާ ދޯނިތަކާއި، ޑައިވިންގ ދޯނިފަހަރާއި ލޯންޗް އަދި ޑިންގީތަށް ވަނީ ބޮޑުތަނުން އިތުރުވާން ފަށާފައެވެ.

އަދި ލޯކަލް ޓުއަރިޒަމާއެކު ފަރުމަހުގެ މަސްވެރިކަން ފުޅާވެ "ބިގް ގޭމް ފިޝިންގ" އަދި އެކްސްކާރޝަންސް އަށް އޮތް ތަރުހީބުވަނީ އިންތިހާއަށް ބޮޑުވެފައެވެ.

ނަމަވެސް، މި ރަށުގެ ރައްޔިތުންގެ ކަންބޮޑުވުމަކީ ރާއްޖޭގެ ގިނަ ރަށްރަށް ފަދައިން ދިގުރަށަކީވެސް ރަށް ގިރުމުގެ ބިރުވެރިކަން ދިމާވެފައިވާ ރަށަކަށް ވުމެވެ.

އެގޮތުން މި ރަށުގެ ހުޅަނގު އުތުރުފަރާތަށް ބަލައިލުމުން ރަށްގިރުމުގެ ހިތާމަވެރި މަންޒަރު ފެންނައިރު، މި ހިސާބުން ހަ މީޓަރުގެ ބޮޑު ސަރަހައްދެއް ގިރާފައިވާނެކަމަށް ކައުންސިލުން ލަފާކުރެއެވެ.

އަދި މިކަމުގެ ސަބަބުން ރަށުގެ އެތައް ރުއްގަހެއްވެސް ވަނީ ވެއްޓި ހަލާކުވެގެން ގޮސްފައެވެ. އެހެންކަމުން ސޮއެކުރެވިގެން މިދިޔަ ގޮނޑުދޮށް ހިމާޔަތް ކުރުމުގެ މަޝްރޫޢުގެ ސަބަބުން، މުސްތަޤުބަލުގައި މި ރަށު ރައްޔިތުންނަށް ދިމާވެފައިމިވާ ރަށްގިރުމުގެ މައްސަލައަށް ބޮޑު ހައްލެއް ލިބިގެންދާނެ ކަމަށް އެމްޓީސީސީން ބުނެއެވެ.

މި މަޝްރޫޢުގެ ދަށުން އެރަށުގައި 127 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 15 މީޓަރުގެ ސަރަޙައްދެއްގައި ގްރޮއިން ޖެހުމާއި، 420 މީޓަރުގެ ސަރަޙައްދެއްގައި ޖިއޯޓިއުބް ހަރުކުރުމާއި، 13556 ކިއުބިކް މީޓަރުގެ ސަރަޙައްދެއްގެ ގޮނޑުދޮށްރީޕްލެނިޝް ކުރުމުގެ މަސައްކަތް ހިމެނެއެވެ.

މި މަޝްރޫޢަކީ 11.91 މިލިއަން ރުފިޔާއަށް 150 ދުވަސް ތެރޭ ނިންމުމަށް ހަވާލުކޮށްފައިވާ މަޝްރޫޢުއެކެވެ.