މާލޭގައި ޕާކިންގް ބިލްޑިންގްތައް އެޅުނު ނަމަ މަގުމަތިން ޕާކިން ޒޯނު ނުދޭނެ ކަމަށް މާލޭ ސިޓީގެ މޭޔަރ ޑރ. މުހައްމަދު މުޢިއްޒު ވިދާޅުވެއްޖެއެވެ.
މޭޔަރ މިފަދައިން ވިދާޅުވެފައި މިވަނީ މާލެ ސިޓީ ކައުންސިލުން ކުރިއަށް ގެންދިޔަ ނޫސްވެރިންގެ ބައްދަލުވުމުގައެވެ.
މި ބައްދަލުވުމުގައި މާލޭ މޭޔަރު ޑރ. މުހައްމަދު މުއިއްޒު ވިދާޅުވީ މާލޭގެ އެންމެ ބޮޑު މައްސަައަކީ ގެދޮރުގެ މައްސަލަ ކަމަށާއި އަދި ދެވަނައަށް އެންމެ ބޮޑީ މަގުމައްޗާ ގުޅިފަ ހުރި ކަންކަން ކަމަށެވެ. އޭގެ ތެރޭގަ ޕާކިންގެ މައްސަލަ ހިމެނޭ ކަމަށެވެ.
"ޕާކިން މައްސަލަ ބޮޑުވެފަ އޮތުމުގެ ސަބަބުން ސަރުކާރުންވެސް ވަރަށް އިސްކަންދޭން ޖެހޭ. އެކަމަކު ނުފެނޭ އެއްވެސް ކަމެއް ކުރާތަނެއް. ކައުންސިލުން ވަރަށް މަސައްކަތް ކުރަމުން މި އަންނަނީ، ދެ އަހަރު މިވަނީ، ނަތީޖާއެއް ނުނެރެވިގެން މިއުޅެނީ ސަރުކާރުގެ އެއްބާރުލުން ނުލިބިގެން"
ޑރ. މުއިއްޒު ވިދާޅުވިއެވެ.
މުއިއްޒު ވިދާޅުވީ ޕާކިން ބިލްޑިންގްތައް އެޅުމަށްޓަކައި މާލޭގެ އެކި ހިސާބުތައް ފާހަގަކޮށް، ލޭންޑްޔޫސް ޕްލޭންއަކާއެކު ސަރުކާރަށް ހުށަހަޅައިގެންވެސް އެއްވެސް ކަމެއްގައި ހުއްދަ ނުލިބިގެން ކުރިއެރުން ނުލިބުނު ކަމަށެވެ.
މަދުވެގެން މާލޭގެ ހަތަރު ލޮކޭޝަންގަ ޕާކިން ބިލްޑިންގް އަޅަން ކައުންސިލުން ބޭނުންވެއެވެ.
މުއިއްޒު ވިދާޅުވީ، ކައުންސިލްގެ ބަޖެޓުން އެ މަސައްކަތް ކުރަން ސަރުކާރުން ބުނާ ކަމަށެވެ. ނަމަވެސް އެއީ އެކަން ކުރެވެން އޮތް ގޮތް ނޫން ކަމަށާއި އެއީ ބޮޑު ހަރަދެއް ހިނގާނެ ކަމެއް ކަމަށް މުއިއްޒު ވިދާޅުވިއެވެ.
މީގެ އިތުރުން މުއިއްޒު ވިދާޅުވީ ޕާކިންގް ބިލްޑިންގްތައް އެޅުނު ނަމަ މަގުމަތިން ޕާކިން ޒޯނު ނުދޭނެ ކަމަށާއި ޕާކިން ބިލްޑިންތައް އެޅިއްޖެ ނަމަ ޕާކިންގް ޖާގަ ދޭނީ އެތަނުގެ ތެރެއިން ކަމަށެވެ.
Advertisement
This content is created and paid for by advertisers and does not involve Voice Journalists
